Дуобатчыттарбыт Россия чемпионатыгар дьоһун ситиһиилэннилэр

Дьэ, Москва уобалаһын Одинцовскай оройуонугар дуобакка улахан дьоҥҥо Россия чемпионата уонна эдэрдэргэ дойду үрдүнэн биирдиилээн уонна хамаанданан бастыыр иһин күрэхтэһии ыытыллан түмүктэннэ. Бу түһүлгэ саха дуобатчыттарыгар ситиһиилээх буолла.

Нуучча дуобатыгар классикаҕа гроссмейстер Гаврил Колесов эрэллээхтик бастаата. Кини бүтэһик быһаарыылаах оонньууга биир дойдулааҕа эмиэ гроссмейстер Николай Стручкову кытта тэҥнэстэ. Манна сыһыары тутан эттэххэ, Николай Стручков түмүккэ бэһис көрдөрүүлэннэ. Кини нуучча дуобатыгар чаҕылханныы оонньууга бастакы миэстэҕэ тахсыбытын санатар оруннаах.

Маннык күүстээх састаапка Николай Гуляев уонна Андрей Федотов эмиэ үчүгэй оонньуулары көрдөрбүттэрин бэлиэтиэххэ сөп.

Сүүс харахтаах дуобакка гроссмейстер Матрена Ноговицына бүтэһик туурга кыайыыны ситиһэн бастаата уонна былырыын Дьокуускайга ыытыллыбыт аан дойду чемпионатын кыайыылааҕа Тамара Тансыккужинаны (Башкортостан) иккис миэстэҕэ үтүрүйдэ.

Бу көрүҥҥэ спорт маастардара Аяника Колодезникова алтыс, Тунаара Федорова сэттис, Сандаара Апросимова онус миэстэлэри ылан, куһаҕана суох көрдөрүүлэннилэр.

Оттон нуучча дуобатыгар маастар Ньургуяна Азарова үһүс миэстэҕэ тахсыыта эмиэ ситиһиинэн ааҕыллар. Бу көрүҥҥэ биһиэннэриттэн өссө Дайаана Кондратьева уонна Альбина Большакова уон күүстээхтэр ахсааннарыгар киирдилэр.

Бүтүн Россиятааҕы категориялаах судьуйа, республикатааҕы Дуобат-саахымат киинин инструктора Гаврил Петрович Винокуров:

Сүүс харахтаах уонна нуучча дуобатыгар классическай программаҕа Саха сирин сүүмэрдэммит хамаандата улахан ситиһиилэннэ. Оҕолор кыайыыларынан дуоһуйбакка, улахан дьоҥҥо пьедестал үрдүкү чыпчаалыгар дабайан таҕыстылар. Чемпионат бүтэһик туура кырдьык да быһаарыылаах буолла.

Чурапчылар чуораанчыктара тыаһаата, Россияны уһугуннардылар диэххэ сөп. Ол курдук, эр дьоҥҥо нуучча дуобатыгар Гаврил Колесов уонна дьахталлар ортолоругар сүүс харахтаах дуобат оонньуутугар Матрёна Ноговицына кыайыы көтөллөннүлэр.

Нуучча дуобатыгар дьахталлар икки ардыларыгар оонньууга бүтэһик туурга инники испит Аан дойду чемпионкатын Жанна Бупееваны (Саршаева диэн этэ кыыс сылдьан) биһиги кыыспыт Ньургуяна Азарова олус кыраһыабайдык кыайан уонна оонньообут  коэффициена үчүгэй буолан, үһүс бириистээх миэстэни ылла.

Аны аҕыйах хонугунан, алтынньы 4 күнүттэн Аан дойдуга бастыыр иһин чемпионат  саҕаланыа. Биир сомоҕо түмсүүлээх  Саха сирин хамаандатыгар үгэс быһыытынан кыайыыны баҕарабыт. Чемпионат Турция государствотыгар буолуоҕа.

Дьэ кырдьык, дуобатчыттар дьоһун ситиһиилэннилэр. Манан сибээстээн Саха Республикатын дуобакка федерациятын, күүс-көмө, өйөбүл буолбут спорт салайааччыларын, тренердэри уонна чуолаан спортсменнары бэйэлэрин, Россия чемпионатыгар ситиһиилээх кыттыыларынан эҕэрдэлиибит, өссө үрдүк кыайыылары баҕарабыт!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *