Доҕорум кинигэтин сүрэхтэниитигэр сырыттым

Иллэрээ күн Чурапчыга, улуустааҕы библиотекаҕа Россия Суруналыыстарын сойууһун чилиэнэ, Россия Бочуоттаах кинематографиһа, Үлэ, спорт, Саха сирин киинэтин бэтэрээнэ, улуустааҕы “Саҥа олох” хаһыат уопсастыбаннай кэрэспэдьиэнэ Платон Васильевич Коркин “Кинилэр ааттара ааттаныа” кинигэтин сүрэхтэниитэ буолан ааста. Кинигэ туһунан биһиги сайтпыт (dzulurgan.ru) сырдатан турар. Ону Сонуннар рубрикаттан булан ааҕаргытыгар сүбэлиибит.

Тэрээһини улуустааҕы киин библиотека сэбиэдиссэйэ Вера Аполлоновна Платонова бэйэтинэн иилээн-саҕалаан, үүннээн-тэһииннээн ыытта.

Саҥа кинигэни сүрэхтээһин бэрт таһымнаахтык ааста. Бу үөрүүлээх түгэҥҥэ Чурапчы улууһун баһылыга Андрей Ноговицын, улуус сэбиэтин бэрэссэдээтэлэ Афанасий Захаров, Чурапчы нэһилиэгин баһылыгын эбээһинэһин толорооччу Алексей Егоров, “Саха сирэ” хаһыат кылаабынай редактора Родион Кривогорницын, Дьокуускай куораттан, улуус нэһилиэктэриттэн анаан-минээн ааттаан-суоллаан кэлэн кыттыыны ыллылар. Кинигэ ааптарын эҕэрдэлээтилэр, баҕа санааларын эттилэр. Платон Васильевич бөрүөтэ сыппаабатыгар, айар үлэтэ өссө сайда, кэҥии турарыгар баҕардылар.

Кинилэр Платон Васильевич – туспа буочардаах суруналыыс буоларын, ырытан суруйарын, ааҕааччы көрө олорорун курдук сырдатарын, ис сүрэҕиттэн кыһалларын, улуус биир маанылаах суруналыыһа буоларын, сырдык санаалаах бэйэ киһитин, өрүү мичээрдии сылдьарын тоһоҕолоон бэлиэтээбиттэрин киһи кэрэхсиир.

Бу, ааптар олоҕун тухары суруйбут үлэтин үйэтитэн кинигэ оҥорон таһаарбыттарынан быйыл 70 сааһын туолбут Платон Васильевич бастатан туран, “Саҥа олох” хаһыат редакциятыгар, чуолаан редактор А.А. Захаровка, хаһыат эппиэттээх үлэһиттэрэ Н.Д. Бурцеваҕа, А.С. Лыткинаҕа истиҥ махталын тиэртэ.

Сүрэхтээһиҥҥэ кинигэ дьоруойдара, биллиилээх бөҕөстөр, спорт маастардара Семен Морфунов, Семен Макаров, Афанасий Захаров, Егор Аржаков – ааптарга махтанан бэйэлэрин санааларын эппиттэрэ, өйдөбүнньүк бэлэхтэрин туттарбыттара үөрүүлээх түгэни өссө киэргэтин биэрдэ.

Кырдьык даҕаны, тыа сирин сэмэй, көнө киһитэ бэйэтин сүрэҕин ыйыытынан, баҕатынан – аан дойдуга, Сэбиэскэй Сойууска тиийэ Сахаларын сирин, Чурапчыны аатырдыбыт бастыҥ спортсменнар сырдык, үтүө ааттарын үйэтиттэ, маннык түгэҥҥэ этиллэринии, кинилэргэ суругунан пааматынньык туруорда! Ылан көрдөххө, бүтүн олоҕун анаабыт дьарыга кинигэ буолан тахсыбытын, итинэн улахан үйэлээх дьыаланы оҥорбутун П.В. Коркин билигин бэйэтэ да үчүгэйдик билбэккэ сылдьар.

Бэйэбинэн охсон өрүү этэбин, кинигэ оҥорон таһаарыы бу сүрдээх улахан, унньуктаах уһун, эппиэттээх үлэ диэн. Манна ааптар төһөлөөх элбэх бириэмэтин бараабыта, дьону суруйаары, күрэхтэһиини сырдатаары төһөлөөх сүүрбүтэ-көппүтэ, кэлбитэ-барбыта, ардыгар олох кэрэ-күндү түгэннэрин, үөрүү-көтүү тэрээһиннэрин көтүтэн, умнан да туран, түүннэри-күнүстэри үлэлээбитэ, суруксуттаабыта буолуой диэн. Ити барыта кини сүрэҕин баҕатынан, туораттан улахан соруйуута, ыйыыта-кэрдиитэ, көмөтө суох оҥоһуллар диэн…

Дьэ, онон мин Чурапчытааҕы аҕа саастаах доҕорум Платон Васильевич Коркин кинигэтин оҥорон, үбүлээн таһаарбыт дьону тэҥэ, сиэр быһыытынан толоруллуохтаах – кинигэ сүрэхтэниитин сүрдээх тэрээһиннээхтик, үрдүк таһымнаахтык тэрийэн, ааптары чиэстээһини ыыппыт улуустааҕы библиотека кэлэктиибигэр (сэбэдиссэй В.А. Платонова) истиҥ махталбын тиэрдэбин.

Кинигэ бэчээттэнэн Таҕыста, Сүрэхтэннэ, аны уруйдаан-айхаллаан баран, долбуурга ууран кэбиспэккэ, бу кинигэни Үлэлэтиэххэ диэн санаалаахпын. Ол аата, оскуола, библиотека, редакция кэлэктииптэрэ “Кинилэр ааттара ааттаныа” кинигэ тула араас ырытыылары, көрсүһүүлэри, викториналары-куонкурустары, ааптары кытта көрсүһүүнү оҥоруохтарын, тэрийиэхтэрин сөп. Итиэннэ өссө биири этиэхпин баҕарабын, кырдьык, элбэх киһи эппитин курдук, кинигэ бэчээтэнэн тахсыбыт ахсаана наһаа кыра – 150. Онон ааптар бэйэтэ эппитинии, кинигэҕэ киирбэккэ хаалбыт суруйуулары киллэрэн, өссө тупсаран, саатар эбии биир итиччэни туһааннаах тэрилтэлэр, салайааччылар хаттаан бэчээттээн таһааралларыгар баҕарабын.

Петр ПАВЛОВ.

Дьокуускай – Чурапчы – Дьокуускай.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *