Доҕорбут Николай Бояров кэриэһигэр

Доҕорбут, табаарыспыт, биир идэлээхпит, Саха Республикатын үтүөлээх тренерэ, республика чулуу тренерин аат хаһаайына Николай Иванович Бояров дьылҕа хаан ыйааҕынан орто дойдуттан күрэммитэ бүгүн, балаҕан ыйын 4 күнүгэр номнуо 40 хонуга буола оҕуста.

Николай 1967 сыллаахха Таатта улууһун Туора Күөл нэһилиэгэр биэс оҕолоох Светлана, Иван Бояровтарга төрдүс оҕонон күн сирин көрбүтэ. Кыра эрдэҕиттэн үөрэххэ, билиигэ-көрүүгэ тардыһан, Ытык Күөл оскуолатын 1984 сыллаахха үөрэнэн бүтэрбитэ. Ол сыл Хабаровскайдааҕы физкультурнай институтка физкультура салаатыгар үөрэнэ киирбитэ. Үөрэнэр сылларыгар икки сыл Владивостокка армияҕа сулууспалаан кэлбитэ.

1990 сыллаахха институту ситиһиилээхтик бүтэрэн, икки сыл Уус Тааттаҕа уонна Ытык Күөл оскуолалаларыгар физкультура учууталынан үлэлээбитэ. 1992 сыллаахха Мэҥэ-Хаҥалас улууһун Моорук Суолатыгар олоҕун аргыһын Елена Михайловналыын ыал буолан, Моорукка олохсуйар. Мооругу ис сүрэҕиттэн сөбүлээн, дойду оҥостон, дьиэ-уот туттан, сүөһүлэнэн астанан, түөрт оҕо төрөтөн, сиэннэри көрөн, быр-бааччы олорбута. Кыайыгас-хотугас, туохтан да толлон турбат, үлэни барытын сатыыр, байанайдаах булчут, дьиҥнээх саха эр киһитин хоһуун холобура буолан олорбута. Киниэхэ нэһилиэк “Бочуоттаах олохтооҕо” аат иҥэриллибитэ.

1992 сыллаахтан Моорук оскуолатын физкультураҕа учууталынан үйэ чиэппэрэ бэриниилээхтик, үтүө суобастаахтык, оҕо эт-хаан өттүнэн сайдыытыгар сыратын-сылбатын биэрэн таһаарыылаахтык үлэлээн кэлбитэ. Николай уруок тас өртүнэн ыытыллар спортивнай секцияларга ураты болҕомтону уурара. Хара маҥнайгыттан тренер талаана баарын көрдөрөн барбыта. Бастаан оҕолору тустууга дьарыктааһынынан саҕалаабыта. Үс сыл  дьарыктаан уолаттара кыралаан ситиһиилэнэн барбыттара. Бастакы улахан ситиһиитинэн Дима Тихонов республика чемпиона үрдүк аатын сүгүүтэ буолбута. Ол саҕана оскуола аҕыс кылаастаах буолан, салгыы дьарыктаабыт уолаттара ким Табаҕаҕа, ким Хара спортивнай оскуолатыгар үөрэнэ бараллара. 1995 сыллаахтан саҥа сайдыыны ылан эрэр мас тардыһыыга ылсан олоҕун тиһэх күнүгэр диэри айымньылаахтык, туспа суол хаалларардыы, республикаҕа бу көрүҥҥэ “Бояр оскуолата” диэн дьоһуннук иһиллэр ситиһиилэрдээх оскуола буола үүннэрбитэ.

Бу сыллар тухары Моорук оскуолатын уолаттара биир да сыл сүтэн хаалбакка республика лидердэрин ахсааныгар сырыттылар. Кыра нэһилиэк оскуолатын оҕолорун мас тардыһыытыгар уһуйан республикаҕа биллэр аҕыс спорт маастардарын иитэн таһаарда: А.Аринкин, Р.Толеубаев, А.Пинигин, Н.Татаринов, А.Соловьев, Е.Жирков, Н.Апросимов, С.Сосин. Бу ситиһии барыта – физкультура учууталын ситиһиитэ. Спортивнай секцияҕа ураты суолта биэрии, көрүҥ сайдыытыгар ситимнээхтик үлэлээһин, хас биирдии оҕо кыаҕын көрөн былааннаах дьарык түмүгэ. Сыралаах үлэ түмүгүн, ураты суоллаах учуутал, тренер быһыытынан билинэн, 2018 сыллаахха киниэхэ Саха Республикатын үтүөлээх тренерэ аат иҥэриллибитэ.

Талааннаах учуутал, талаана ситэ арылыннын диэн улуус салалтата Мэлдьэхси Суолатыгар мас тардыһыыга анал тренер штатын көрөн кэнники икки сылга кэлэр көлүөнэ ыччаты үөрэтэн-такайан, сөбүлүүр спордун көрүҥүн сайдыытыгар ис дууһаттан ылсан дьаныардаахтык үлэлээн испитэ. Аллараа Бэстээххэ тутуллар спортивнай дыбарыас олоххо киирдэҕинэ, улахан дьону кытта үлэлиир тренер быһыытынан үлэлиир киэҥ былааннааҕа.

Доҕорбут, табаарыспыт Николай Иванович мындыр толкуйдаах, үлэтигэр ураты эппиэтинэстээх, учуутал, тренер оҕону иитиигэ үрдүк аналын толору баһылаабыт киһи этэ. Өссө да ситэ арыллыбакка, баай киэҥ толкуйунан санаабыт санаатын дьэ олоххо киллэрэр кэмигэр эмискэ олохтон күрэммитэ ордук кыһыылаах, абаккалаах.

Ааккын ааттатардыы, саҕалаабыт дьыалан салҕана туруо. Ситиспэтэххин уолаттарын ситэрэн биэриэхтэрэ диэн бүк эрэнэбит.

Быдан дьылларга быраһаай, доҕорбут Николай Иванович.

Доҕотторо.

 

Добавить комментарий

Ваш адрес email не будет опубликован. Обязательные поля помечены *