Доруобуйаны, чөл олоҕу  инники күөҥҥэ тутуохха

Түөйэ 100-чэкэ нэһилиэнньэлээх, Сылаҥ нэһилиэгин учаастага. Төһө да аҕыйах дьон олордор, элбэх сүөһүлээҕинэн, сылгылааҕынан улууска инники сылдьар. Учаастакка 7 бааһынай хаһаайыстыба, 10 чааһынай хаһаайыстыба сүөһү, сылгы ииттэн, харыларын күүһүнэн дохуоттанан олорор төһүү үлэһит дьоннордоох. Ону таһынан учаастакка биир дойдулаахпыт, Ленинград оборонатын кыттыылааҕа, педагогическай үлэ ветерана Анастасия Тихоновна Старостина аатын сүгэр алын сүһүөх оскуола-оҕо саада, үүтү тутар, астыыр собуот, фельдшерскай пуун үлэлииллэр.

Сайынын Түөйэ нэһилиэнньэтэ элбиир, оҕо-аймах саҥата үксүүр. Сайылыкка ынах ыан, эдэрдэр оттоон-мастаан, оҕолор ньирэй үүрэн, дьахталлар сир астаан сэргэхсийии буолар. Саха сиригэр 2020 хамсык сыл бүрүүкээн турар кэмигэр нэһилиэнньэлээх кииннэргэ хааччах, кэтэбил, дьиксинии төрүөтэ буола турдаҕына, үгүс биир дойдулаахтарбыт, төрөөбүт-үөскэбит алаһа дьиэлэрин дугда-хахха, көмүскэл оҥостон күргүөмүнэн сайылыы тахсан өссө элбээбиппит. Онон кэлэр да сылларга сайын учаастакпытыгар оҕо-аймах, дьон-сэргэ элбии туруо дии саныыбыт.

Биһиги оҕолорбут уруккуттан дэриэбинэ ортотугар баар алааска мустан сүүрэн-көтөн, волейболлаан, футболлаан иллэҥ кэмнэрин атаараллара көрүөххэ олус үчүгэй. Түөйэ олохтоохторугар, оҕолорго, инники кэнчээри ыччаттарга анаан оонньуур площадка оҥоруу туһунан кэпсэтии уруккуттан баара. Сайын устата эт-хаан өттүнэн сайдаллар, доруобуйаларын бөҕөргөтүнэллэр, улааталлар. Ол иһин ыра санаа оҥостон иитиэхтии сылдьыбыт былааммытын олоххо киллэрээри площадка күрүөтүн тутуутун 2020 сылтан саҕалаатыбыт. Бу площадка «Киһи баайа – доруобуйата» диэн өйдөбүлүнэн, оҕолорго эрэ буолбакка, нэһилиэнньэ бары эт-хаан өттүнэн эрчиллэн доруобуйарын тупсарынар, чөл олоҕу тутуһан оҕолорго үтүө холобур буолар сирдэринэн буолуоҕун баҕарабыт.

Муус устар 15 күнүгэр, улууска Ыччат форума буолан ааста. Манна киэҥ хабааннаах биир күн устата сайыннарар, былаанныыр үлэлэр ыытылыннылар. Биир ураты күрэхтэһиинэн эдэр ыччаттар социальнай бырайыактарын көмүскээһиннэрэ буолла. Дьүүллүүр сүбэҕэ куораттан ыҥырыылаах ыалдьыттар, улуус тэрилтэлэрин салайааччылара, тутаах үлэһиттэрэ үлэлээтилэр.

Бу тэрээһиҥҥэ биһиги 2020 сылга Түөйэ учаастагар үлэни ыытан саҕалаабыт «Универсальная спортивная площадка» бырайыакпытын киэҥ эйгэҕэ, дьоҥҥо-сэргэҕэ билиһиннэрдибит. Туох-хайдах, төһө сууммалаах үлэ ыытыллыбытын, былааннанарын көрдөрдүбүт.

Үүнэр көлүөнэҕэ, нэһилиэнньэҕэ туһаайан площадка киэҥ-куоҥ иэннээх. Манна тус туспа турар футбол, волейбол хонуулара, аныгылыы Workoutтренажер, кэнсиэрдиир сыана, оҕо оонньуур былаһаакката, саастаах дьоммут сэһэргэһэр беседкалара баар буолуохтара. Бырайыак уопсай сыаната 437 500 солк. тэҥнэһэр. Мантан быһа холоон кыччатан эттэххэ, 192 000 солк. үлэни-хамнаһы оҥорон олоробут. Ол курдук, нэһилиэнньэттэн 84 000 солк. уу харчынан көмөлөһүннэрэн 5 куб. м. 4-тээх хаптаһын Аллараа Бэстээхтэн тиэйтэрэн таһааран, олорор ыаллар үстүү баҕана маһын киллэрэн, уопсайа 86 устуука барда. Тутуу үлэтин бэйэбит биир дойдулаахтарбытыгар договорынан туттардыбыт. Төлөбүрүн улуус учаастактарын спортивнай-культурнай күрэхтэригэр хамаанданан бастаан ылбыт убаһа бирииспитин биир сыл иитэн улаатыннаран, 50 000 солк оҥордубут. Күрүөбүт тутуллан бүтээтин кытары эдьиийдэрбит, ийэлэрбит дьэрэкээн гына кырааскалаан, билигин саас-сайын ууттан, күн уотуттан куттаммакка турар.

Улуус баһылыгын экономикаҕа солбуйааччыта А.Г. Егоров үлэбитин өйүүрүн, көмөлөһөргө бэлэмин биллэрдэ. Бырайыакпытын сэҥээрэн кэккэ сүбэ-ама биэрдилэр. Дьокуускайдааҕы «Точка кипения» коллективнай үлэ куйаарын программнай директора И.В. Степанов кэскиллээх бырайыак буоларын эттэ. Тугу эбэн, тупсаран биэрэрбитин ыйда. Былассаакка үлэҕэ киирбитин кэннэ 5, 10 сылынан төһө көрдөрүүнү оҕолорбут ситиһэллэрин былаан быһыытынан ааҕынарбытын сүбэлээтэ.

Бу бырайыакпыт Ил Дархан ыйааҕынан республикаҕа, уонна улууспутугар биллэриллибит «Доруобуйа» сылыгар сөп түбэһэрэ, ол чэрчитинэн буолара өссө үчүгэй. Биһиги түөлбэттэн иитиллэн тахсыбыт ытыыга, көҥүл тустууга, хапсаҕайга, атах оонньуутугар спорт маастардарыгар кандидаттар, араас разрядтаах, спорка үрдүк ситиһиилээх дьонноохпутунан киэн туттабыт!

Спорду, чөл олоҕу инники күөҥҥэ тутар биир дойдулаахтарбыт, нэһилиэкпит, улууспут салалталара оҕо аймах этэ сиинэ сайдар, киһи хамсанан-имсэнэн эрчиллэр, өйдүүн-санаалыын чэгиэн-чиргэл буолар дьоһун бырайыакпытын өйүөхтэрэ диэн эрэнэбит.

Зинаида ДЬЯЧКОВСКАЯ, Түөйэ олохтооҕо. Чурапчы.

 

Добавить комментарий

Ваш адрес email не будет опубликован. Обязательные поля помечены *