Дмитрий Шарин: “Көмүс мас” — республика биир кэтэһиилээх, таһымнаах күрэхтэһиитэ”

Манчаары аатынан спорт сахалыы төрүт көрүҥнэригэр “Модун” спортивнай комплекска, “Көмүс мас” диэн, мас-рестлиҥҥэ Дьокуускай куорат аһаҕас чемпионата ыытыллар.

Күрэхтэһии кылаабынай судьуйата – маннык тэрээһиннэри элбэхтэ салайсан ыытыспыт улахан үөрүйэхтээх Дмитрий Иннокентьевич Шарин бу түһүлгэ хайдах быһыылаахтык тэриллибитин маннык кэпсээтэ:

-“Көмүс мас” күрэхтэһии – мас тардыһыыга Саха сиригэр аан бастаан тэриллибит күрэхтэһии. Урут наар икки сылга биирдэ Манчаары күрэхтэһиитэ буолар этэ. Ол кэмҥэ биһиги устудьуоннуу сылдьаммыт, медик-устудьуон уолаттар бу күрэхтэһии тэриллиитин кэпсэтиитин биһиги хоспут иһигэр саҕалаабыппыт. Сэргэлээххэ, 13-с куорпуска, 47-с хоско. Онно Петр Каратаев, Петр Кривошапкин, Георгий Цыпандин уонна мин буоламмыт, көҕүлээммит маннык саҥа күрэхтэһиитэ тэрийэн ыытыахха диэн сүбэлэспиппит.

Бастайаанна дьарыктанар уолаттар баар буоланнар, бастакы күрэхтэһиибит састаап өттүнэн син күүстээх этэ. Ол оннугар кыттааччытын ахсаана билиҥҥи курдук буолбатах, аҕыйах этэ. Лугинов Роман диэн медик киһи бэйэтин баҕа өттүнэн өйөбүл буолан, бу күрэхтэһиини спонсордаабыта. Бэйэтин значоктарын коллекциятын бириис быһыытынан туруорбута.

Дьэ, итинник саҕалааммыт, сыл аайы ыытаммыт, онтон кэнники ити күрэхтэһиибит Дьокуускай куорат аһаҕас чемпионатыгар кубулуйбута. Күрэхтэһиибит мас-рестлинг республикатааҕы федерациятын календарыгар киллэриллэн, спорт маастара нуормата толоруулаах ыытыллар. Онон республика биир кэтэһиилээх, таһымнаах күрэхтэһиитэ буолла.

“Көмүс мас” түһүлгэ – саҥа үүммүт сыл мас-рестлиҥҥэ бастакы күрэхтэһиитэ. Сүрүннээн Саха сирин күүстээхтэрэ бары кытталлар. Онон быйыл да тыҥааһыннаах киирсиилэр буолуохтара.  Этэргэ дылы, бастыҥнар “кэтэхтэригэр тыына” сылдьар мадьынылар элбэхтэр.

Күрэхтэһиигэ опыттаах судьуйалар  үлэлииллэр. Эдэрдэр эмиэ бааллар, эдэрдэри үүннэрэ сатыыбыт. Кинилэргэ категориялары иҥэрэн хайаан, үүннэрэн иһиэххэ наада.

Дмитрий Иннокентьевич, биһиги эйигин дэгиттэр кыахтаах спортсмен быһыытынан билэбит, бу мас тардыһыыга бэйэҥ ситиһиилэргин кылгастык билиһиннэр эрэ.

-Дьылҕа хаан ыйааҕынан Петр Каратаевы көрсөөт, мас тардыһыынан “ыалдьыбытым”. Кини 1983 сыллаахха абсолютнай чемпион аатын ылан, бастакы маастар буолбута. Оттон мин, 1985 сыллаахха мас тардыһыыга иккис маастар буолбутум. 1990 сыллаахха Манчаары абсолютнайын эмиэ ыла сылдьыбытым. Ити курдук, республика чемпионаттарыгар, турнирдарыгар элбэхтэ бастаабытым. Ис дьиҥэ, бэйэм боксер буоллаҕым дии. Саамай саҕалаабыт, спортсмен оҥорбут көрүҥүм – бокс. Характерым онно хатарыллыбыта диэхпин сөп. Онтон кэнники чэпчэки атлетиканан дьарыктанан, республикаҕа 400, 800 м дистанцияларга бастыы сылдьыбытым. Салгыы, мас  тардыспытым, билигин волейболлуубун. Волейболга эмиэ хамаанда, “Сахамедстрах” кулууп тэрийэммит, кэнники хаста даҕаны кыайаммыт, “Бочуоттаах маастар” аатын иҥэрбиттэрэ.

Петр ПАВЛОВ.

Ааптар хаартыскаҕа түһэриитэ.    

Добавить комментарий

Ваш адрес email не будет опубликован. Обязательные поля помечены *