Дмитрий Петрович Коркиҥҥа сүгүрүйүү бэлиэтэ

Бүгүн, балаҕан ыйын 5 күнүгэр биһиги улуу киһибит – Саха АССР оскуолаларын үтүөлээх учуутала, ССРС, РСФСР, Саха АССР үтүөлээх тренерэ, ССРС физическэй култуураҕа туйгуна, “Октябрьскай революция” уонна “Бочуот Знага” орденнар кавалердара Дмитрий Петрович Коркин төрөөбүт күнэ.

Бу кэрэ бэлиэ түгэҥҥэ киин куораппытыгар олимпийскай чемпион Р.М. Дмитриев аатынан Олимпийскай эрэл училищетын салалтатын көҕүлээһининэн улуу тренербит Дмитрий Петрович Коркин төрөөбүт күнүгэр аналлаах миитин уонна кини пааматынньыгар сибэкки дьөрбөтүн ууруу сиэрэ-туома ыытылынна.

Тэрээһиҥҥэ спорт салайааччылара, бэтэрээннэр, Д.П. Коркин иитиллээччилэрэ, училище үлэһиттэрэ кыттыыны ыллылар.

Саха Республикатын физическэй култуураҕа уонна спорка миниистирин бастакы солбуйааччы Семен Сергеевич Чердонов, Олимпиада-76  үрүҥ көмүс призера, спорт үтүөлээх маастара Александр Николаевич Иванов, Дмитрий Петрович олоҕун аргыһа, педагогическай үлэ бэтэрээнэ Александра Семеновна Коркина – ахтан санаан, сүгүрүйэн аастылар.

Кинилэр улуу тренер олоҕун түгэннэрин, үтүө хаачыстыбаларын аҕыннылар, эдэр ыччакка сүбэлэрин эттилэр итиэннэ Дмитрий Петрович Коркин аатын үйэтитиигэ өссө дьаныардаахтык үлэлииргэ ыҥырдылар.

Тэрээһиҥҥэ өссө Олимпийскай эрэл училищетын дириэктэрэ Алексей Алексеевич Филиппов, Ил Түмэн депутата, спорт үтүөлээх маастара Петр Петрович Юмшанов, СР Спорка бэлэмнэнии киинин дириэктэрин бастакы солбуйааччы Михаил Дмитриевич Пахомов, ССРС үс, Европа икки төгүллээх чемпиона, спорт үтүөлээх маастара Василий Николаевич Гоголев, СР көҥүл тустууга хамаандатын сүрүн тренерэ Александр Савельевич Оконешников, педагогическай наука кандидата Матвей Иванович Лыткин, ССРС спордун маастара Семен Сергеевич Окоемов, ССРС спордун маастара, СР үтүөлээх тренерэ Прокопий Семенович Иванов, уо.д.а. кыттыыны ылан, сүгүрүйүү бэлиэтинэн Д.П. Коркин пааматынньыгар сибэкки дьөрбөтүн уурдулар.

Саха омугу, Саха сирин аан дойдуга дорҕоонноохтук ааттаппыт үтүө дьоммутугар, кинилэр кэрэ бэлиэ күннэригэр сүгүрүйэр – ытык иэспит.

Петр ПАВЛОВ.

Ааптар хаартыскаҕа түһэриилэрэ.

 

Добавить комментарий

Ваш адрес email не будет опубликован. Обязательные поля помечены *