Дмитрий Валеев бирииһигэр

В.П. Керемясов аатынан Дьокуускай 3 №-дээх спортивнай оскуолатын 20 сыллаах үбүлүөйүгэр аналлаах көҥүл тустууга Россия, хапсаҕайга Саха сирин спортарын маастара Дмитрий Валеев бирииһигэр көҥүл тустууга киин куорат аһаҕас күрэхтэһиитигэр 2006-2008 сс. төрөөбүт эдэр бөҕөстөр күөн көрүстүлэр.

Көбүөргэ барыта 164 бөҕөс Горнайтан, Хаҥаластан, ДЮСШ-5, Олимпийскай эрэл училищетыттан таҕыста.

Сытыы хапсыһыылар түмүктэригэр ыйааһыннарын бэрээдэгинэн кыайыылаахтарынан буоллулар: 31 кг – Юра Винокуров (21-c оскуола), 35 кг – Борис Иринеев, 40 кг – Гаврил Варламов (иккиэн – ДЮСШ-3), 49 кг – Федя Степанов (21-c оскуола), 52 кг – Петя Васильев (Хаҥалас), оттон 2008 сылтан бэтэрээлэргэ: 24 кг – Эльдар Осипов, 26 кг – Ариан Винокуров, 30 кг – Эрчим Жирков, 34 кг – Мохаммадфатих Шакиров, 42 кг – Никита Евсеев, 50 кг – Коля Охлопков (бары – ДЮСШ-3).

Түһүлгэ бастыҥ бөҕөстөрүнэн Федя Степанов уонна Юра Винокуров ааттаннылар. Кинилэр Дьокуускай 21 №-дээх оскуолатын үөрэнээччилэрэ, тренер Станислав Егорович Афанасьев салалтатынан дьарыктаналлар. Манна даҕатан эттэххэ, бу күрэхтэһиини Станислав Егорович сүүрэн-көтөн тэрийбитин, кылаабынай судьуйанан үлэлээбитин санатар тоҕоостоох.

Күрэхтэһии кыайыылаахтарыгар Ил Түмэн депутата Мария Николаевна Христофорова уонна үтүө сүрэхтээх спонсордар Михаил Киприянов, Сиасат Исаев, Алексей Некрасов, Николай Григорьев, Ян Емельянов, Александр Румин олохтообут сыаналаах бириистэрэ туттарылыннылар.

Манна даҕатан эттэххэ, бу күрэхтэһии Сергей Артемович Ермолаев дириэктэрдээх 21-c оскуола тэрийиитинэн уонна сүрүннээһининэн ыытылынна.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *