Дагестанынан, Казахстанынан эрчиллэн кэллилэр

Быйыл сайын ватсаапка тустуу биир бөлөҕөр, саха оҕолоро Кавказка тиийэн тустууга эрчиллэ сылдьалларын көрдөрөр хаартыскалар хаста эмэтэ тахсыталаабыттарын интэриэһиргээн, дойдуларыгар кэлбиттэрин кэннэ салайааччыларын көрсөн, кэпсэтэ сырыттым.

В.Н. Жирков сэргэх олохтоох эдэр киһи эбит. Биир сиргэ таба олорбот, барар-кэлэр, булар-талар киһи диэн маннык дьону ааттыыллара буолуо. Виталий Николаевич Дьокуускай олохтооҕо, индивидуальнай предприниматель.

Оскуолаҕа үөрэнэ сылдьан көҥүл тустуунан дьарыктаммыт. Улахан көрдөрүүнү ситиспэтэх. Ыал буолан, кэргэннэнэн, оҕолонон баран, бэйэтэ спорка ситиспэтэҕин уолаттара ситиһэллэригэр сыал-сорук туруоруммут.

Оҕолоругар бэйэтэ холобур буолан, Виталий көҥүл тустууга уонна хапсаҕайга бэтэрээннэргэ республика чемпиона уонна призера буолла. Кини алта оҕолоох, икки сиэннээх. Оҕолорун кыра эрдэхтэриттэн спордунан дьарыктана улааталларыгар такайар. Ол иһин, Жирковтар бары спорт дьарыктаахтар.

Кини, оҕолоро үөрэнэр куорат 3 уонна 5 №-дээх спортивнай оскуолаларыгар төрөппүт кэмитиэтин бэрэссэдээтэлэ быһыытынан элбэх тэрээһин боппуруостары быһаарсар.

Быйыл сайын кини хас да уолу салайан Дагестаҥҥа уонна Казахстаҥҥа ыытыллыбыт эрчиллиилэргэ кытыннаран кэлбитин туһунан маннык кэпсиир:

Атырдьах ыйыгар Дагестан Хасавюрт куоратыгар тиийбиппит. Бэйэм икки уолбун тэҥэ, Тааттаттан уонна Ньурбаттан алта оҕону салайан илдьэ сырыттым. Биһиги Хасавюрт куорат М.А. Джамалдинов дириэктэрдээх “Спартак” спортивнай оскуолатыгар сүүрбэччэ күн эрчилиннибит. Физкултурник күнүгэр тэриллибит Хасавюрт куорат спортивнай оскуолаларын күрэхтэһиитигэр кытынныбыт. Онно уолум Эрчим Жирков уонна Тааттаттан Артем Неморицын бэйэлэрин ыйааһыннарыгар бастааннар – кубогынан, мэтээлинэн, грамотанан наҕараадаламмыттара. Өссө Айаал Тарабукин (Таатта), Алеша Антипин уонна Миша Осипов (иккиэн — ньурбалар) үһүс миэстэлэри ылбыттара. Дагестаҥҥа былырыын эмиэ сылдьыбытым. Былырыын саҥа билсибит буоллахпына, быйыл олох үчүгэйдик сырыттыбыт. Айаным уонна сырыыбыт үбүн бэйэм булабын. Спонсордар көмөлөһөллөр.

Хасавюрт кэнниттэн, былырыын Дагестаҥҥа тиийэ сылдьан билсибит казах тренерин ыҥырыытынан аны Казахстаҥҥа уонча күн сылдьыбыттар. Онно Атырау куоракка эмиэ эрчиллиигэ кыттыбыттар. Виталий, спордунан умсугуйан дьарыктанар уонна улахан сыалы-соругу туруорар киһи сылы эргиччи эрчиллиэхтээҕин бигэргэтэр. Дагестаҥҥа уонна Казахстаҥҥа сылдьан эрчиллиини кини “оҕолор сайыҥҥы үлэлэрэ” диэн ааттыыр. Кырдьык да оннук, сайын дьарыктаммыт оҕо – кыһын ситиһиилээх буолар. Ити сырыыларыгар наар эрчиллэн эрэ тахсыбаттар эбит. Культурнайдык сынньаммыттар: киинэҕэ сылдьыбыттар, Чечня Республикатын киин куоратыгар Грознайга күүлэйдии бара сылдьыбыттар, Гудермес куорат аквапааркатын астыммыттар, Каспийскай муораҕа сөтүөлээбиттэр, олохтоох дьон олохторун-дьаһахтарын кытта билсибиттэр. Биир тылынан, кавказтар ыалдьытымсахтарын бэйэлэринэн билэн, этэргэ дылы ытыс үрдүгэр сылдьыбыттар.

Спортсмен оҕо кыра эрдэҕиттэн Кавказ оскуолатын билиэхтээх, — диир Виталий. — Оччоҕо улаатан баран атыҥыраабат. Уолаттар Дагестан, Чечня оҕолорун кытта билистилэр, доҕордостулар, аадырыстарын атастастылар. Ону тэҥэ маннык айаннарга кыра эрдэхтэриттэн бэйэлэрин көрүнэ улааталлар, аҕыйах сылынан бэйэлэрэ барыахтара турдаҕа.

Виталий Жирков тренер да, спорт үлэһитэ даҕаны буолбатах. Ол эрээри, бэйэтин баҕатынан сыаллаах-соруктаах. Төрөппүт кыайар буоллаҕына, оҕотун сайыннарыыга маннык үлэлэһэрэ хайҕаныан эрэ сөп. Бу да холобур, хайаан даҕаны туһааннаах исписэлиис (учуутал, тренер) – оскуола, эбэтэр улуус, куорат судаарыстыба анал үбүнэн буолбакка, ханнык баҕарар олоххо бэриниилээх киһи бэйэтэ сүүрэн-көтөн, булан-талан айанын ороскуотун тастан булунан, онно өссө эбиитин элбэх бэлэх-туһах ылынан, сатабыллаахтык кэпсэтэн, боппуруоһу быһаарар кыахтааҕын көрдөрөр.

В.Н. Жирков оҕолорун чэгиэн-чэбдик, билиилээх-көрүүлээх, туһалаах дьон буолан тахсалларын туһугар хайдах иитэрин туһунан элбэҕи кэпсээтэ. Ол туһунан салгыы суруйууларга билиһиннэриэхпит.

Петр ПАВЛОВ.

Добавить комментарий

Ваш адрес email не будет опубликован.