Гроссмейстардар бэйэлэрин кыахтарын көрдөрдүлэр

 

Ааспыт нэдиэлэҕэ, кулун тутар 13-15 күннэригэр Дуобат, саахымат републикатааҕы киинигэр нуучча дуобатыгар Саха сирин чемпионата уонна үрдүк лига күрэхтэһиитэ ыытыллан түмүктэннэ.

Эр дьоҥҥо үрдүкү лигаҕа уон дуобатчыт күрэс былдьаста. Онуоха гроссмейстер Гаврил Колесов (Чурапчы) алта кыайыылаах, үс тэҥнэһиилээх, 15 очукуолаах бастакы миэстэҕэ таҕыста. Иккис миэстэни гроссмейстер Николай Гермогенов (Таатта) ылла. Кини эмиэ биир да хотторуута суох: түөрт кыайыылаах, биэс тэҥнэһиилээх 13 очукуону хомуйда. Үһүс бириистээх миэстэни эмиэ гроссмейстер Николай Стручков (Дьокуускай) ылла. Кини эмиэ Гермогенов курдук 13 очукуолаах эрээри, балаһыанньаҕа олоҕуран, хаачыстыбанан сабырыйтарда.

Салгыы миэстэлэри маастар Василий Прокопьев (Нам, 13 очукуолаах), гроссмейстер Андрей Федотов (Амма, 11), гроссмейстер Николай Гуляев (Таатта, 9) ыллылар.

Дьахталларга үрдүкү лигаҕа эмиэ уон кыттааччы. Международнай маастар Ньургуйаана Азарова (Нам) 15 очукуолаах эрэллээхтик бастаата. Иккис миэстэни гроссмейстер Наталья Шестакова (Таатта) 12 очукуолаах таҕыста. Үһүс миэстэни международнай маастар Сайыына Попова (Нам) 11 очукуолаах ылла.

Салгыы билиһиннэрдэххэ, дьахталларга бастакы лигаҕа барыта 18 оонньооччу кытынна. Түмүккэ маастар Альбина Большакова (Дьокуускай) 9 очукуолаах эрэллээхтик бастаата. Иккис миэстэҕэ бастакы разрядтаах Анита Данилова (Нам) 7 очукуолаах таҕыста. Үһүс-төрдүс миэстэлэри маастарга кандидаттар Виталина Колесова уонна Мария  Бырдыннырова (иккиэн – Дьокуускай) ыллылар.

Эр дьоҥҥо бастакы лигаҕа 58 кыттааччы күөн көрүстэ. Түмүккэ спорт маастара Антон Пермяков (Амма) 8 очукуолаах бастакы миэстэҕэ таҕыста. Маастарга кандидаттар Афанасий Филиппов (Үөһээ Бүлүү) уонна Алексей Большаков (Дьокуускай) 7-лии очукуону хомуйдулар, ол эрээри, оонньуутун хаачыстыбатынан Филиппов иккис буолла.

Күрэхтэһии түмүгүнэн, гроссмейстердар бэйэлэрин кыахтарын көрдөрдүлэр. Ханныгын даҕаны иһин, кинилэри отунан-маһынан оҥорбоккун. Ылан көрдөххө, республика күрэхтэһиитэ ааттаах да, оонньооччуларбыт таһымнара улаханынан, бу күрэхтэһиини аан дойду даҕаны түһүлгэтигэр тэҥниэххэ сөп.

Күрэхтэһии түмүгүнэн Саха Республикатын дуобакка федерациятын президенэ, Россия физическэй култуураҕа уонна спорка туйгуна Владимир Птицынтан, бэйэтин санаатын үллэстэригэр көрдөстүбүт:

64 харахтаах дуобакка дьахталларга уонна эр дьоҥҥо үрдүкү лига күрэхтэһиитэ бэрт сытыытык ыытыллан түмүктэннэ, — диир Владимир Ильич. – Уоннуу дуобатчыт кытынна. Хас биирдиилэрэ эргиир систиэмэтинэн микроматч (иккилии партия) оонньоотулар. Састаап олус күүстээх. Холобур, эр дьоҥҥо биэс гроссмейстер, ол иһигэр аан дойду, Европа чемпионнара бааллар. Гроссмейстердар Гаврил Колесов, Николай Гермогенов, Николай Стручков туһааннааҕынан бастакы, иккис, үһүс миэстэлэри ылан бастаатылар. Нам маастара Василий Прокопьев төрдүс миэстэни ылан, ситиһиилээхтик оонньообутун бэлиэтиэххэ сөп.

Күрэхтэһии түмүгүнэн, дьахталларга уонна эр дьоҥҥо алта бастакылар үрдүкү лигаҕа миэстэлэрин хааччыннылар. Хаалбыт үс миэстэни тренерскэй сэбиэт быһаарыаҕа. Итиэннэ бастакы лига күрэхтэһиитигэр үс бастакы миэстэни ылбыттар киирэн биэриэхтэрэ. Барыта уон иккилии кыттааччы буолуохтаах. Быйыл эмиэ итиччэ дуобатчыт кыттыахтааҕын, хас да киһи үлэлэринэн атын сиргэ сылдьалларынан күрэхтэспэтилэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *