Гректии-римнии тустууга Россия чемпионатыгар үс уолбут кыттыаҕа

Р.М. Дмитриев аатынан Олимпийскай эрэл училищетын гректии-римнии тустууга тренерэ Кирилл Павлов биһиэхэ иһитиннэрбитинэн, тохсунньу 18-21 күннэригэр Доннааҕы Ростовка буолар улахан дьоҥҥо гректии-римнии тустууга Россия чемпионатыгар биһиги республикабытыттан үс уолбут тустуоҕа.

Буолаары турар Россия чемпионатыгар Саха сириттэн үс уол кыттар: 55 киилэҕэ Дмитрий Григорьев, 63 киилэҕэ Артур Константинов, 67 киилэҕэ Владислав Павлов. Кинилэр былырыын ахсынньыга Читаҕа буолбут Дальнай Восток федеральнай уокуругун чемпионатыгар бэйэлэрин ыйааһыннарыгар иккис буоланнар, Россия чемпионатыгар кыттар быраабы ылбыттара. Григорьев уонна Константинов 2000 сыллаах уолаттар, билигин 20 саастаахтар, оттон Павлов 2002 сыллаахха төрөөбүтэ. Үһүөн Олимпийскай эрэл училищетыгар үөрэнэллэр.

Бу чемпионакка бэлэмнэнэн, тохсунньу 3 күнүттэн Анапаҕа “Родник” санаторийга Крым уонна Ростовскай уолабалас хамаандаларын кытта анал эрчиллиини бардыбыт.

Улахан дьоҥҥо Россия чемпионатыгар үһүөн бастакытын кытталлар. Бу иннинэ эр дьоҥҥо Россия чемпионатыгар Саха сириттэн 2016 сыллаахха Чечняҕа буолбут чемпионакка икки уолбут кыттан турар. Ол кэнниттэн улахан дьоҥҥо кытта иликпит. Бу билигин дьэ, уолаттар саҥа тахсан эрэр буоллахтара дии, — диэн иһитиннэрдэ.

Санатан эттэххэ, бу чемпионат түмүгүнэн, Россия Олимпиадаҕа кыттыан сөптөөх хамаандатын састааба талыллыа. Уолаттарбытыгар ситиһиилээх кыттыыны баҕарыахха.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *