Горнайга футбол өрөгөйдөөх күннэрэ

Муус устар 17-18 күннэригэр Бэрдьигэстээххэ, элбэх хайысхалаах спортивнай комплекска Манчаары оонньууларын көрсө, Горнай улууһа 90, футбол федерацията тэриллибиттэрэ 25 сылларын мини-футболга улуус аһаҕас турнира ыытылынна. Бэлиэ дааталарга анаммыт күрэхтэһии үрдүк таһымнаахтык барбытын бэлиэтиэҕи баҕарыллар. Нэһилиэктэр бастакытын бары кыттыбыттара хайҕаллаах. Кировскай, Одуну, Маалтааны иккилии, Мытаах үс хамаанданы туруорбуттара үөрүүлээх. Тэрээһин ыччаттар аан дойдуга 1 №-дээх спорт көрүҥүнэн сөбүлээн оонньуулларын көрдөрдө.

Икки күннээх тыҥааһыннаах күрэхтэһии кэнниттэн “Бэрдьигэс”, Мытаах, футболистара үс иһигэр киирбэтэхтэрэ соһуччу буолла. Бу хамаандалар сэрэбиэйдэригэр табыллыбатылар. Бары биир бөлөххө түбэһэн хааллылар. Кировскай, Октябрьскай, Одуну футболистара оонньууларын саҥа булан иһэннэр, инники хотторууларыгар оҕустаран “уҥуорданан” хааллылар.

Финалга үһүс миэстэ иһин киирсиигэ икки биир дойдулаахтар “Атамаец” ФК хамаандата Атамайы 2:0 ахсаанынан хотто уонна 10 тыһ солк сертификатынан наҕараадаланнылар. Финалга күрэхтэһиигэ соһуччу киирбит Маҥаны футболистара “Вымпел” хамаандатын 4:1 кыайан Кубогы уонна 30 тыһ солк бириэмийэни дойдуларыгар илдьэ бардылар. “Вымпелларга” 20 тыһ солк бириис ананна. Үс бастыҥ иһигэр киирбит хамаандалар “Строймост” ХЭТ (генеральнай дириэктэр С.А. Варламов), нэһилиэктэр дьаһалталара, тэрилтэлэр, урбаанньыттар олохтообут бириистэринэн наҕараадаланан, спортсменнар махталларын ыллылар.

Күрэхтэһии бастыҥнарынан “Быратаар” — Максим Слепцов, “Нападающай” — Андрей Семенов (иккиэн “Вымпел”), “Оонньооччу” — Артур Нератов (Маҥаны), “Бомбардир” — Дима Павлов (Мытаах-1), “Көмүскээччи” — Анатолий Григорьев (Атамай), “Уопуттаах оонньооччу” — Степан Константинов (Дьиикимдэ), “Капитан” — Борис Игнатьев (Маалтааны), “Хамаанда лидерэ” — Иван Иванов (“Атамаец” ФК) ааттаннылар.

Кыайыылаахтарга уонна призердарга улуус баһылыга Никита Андреев, федерация бэрэссэдээтэлэ Николай Дьяконов эҕэрдэ, махтал тылларын анаан туран, сыаналаах бириистэри туттардылар. Спорт маассабай көрүҥэ сайдыытыгар саҥа элбэх хайысхалаах спортивнай комплекс олук ууруо. Саха сирин норуоттарын спартакиадатыгар футболга Горнай хамаандата ситиһиилээхтик кыттарыгар эрэнэллэрин биллэрдилэр.

Вячеслав АЛЕКСЕЕВ.

Горнай.

 

Добавить комментарий

Ваш адрес email не будет опубликован. Обязательные поля помечены *