Гиирэ спорда: Муҥутуур кыайыылаахтар – Лена Гуляева уонна Руслан Лугинов!

 

Бэҕэһээ, бэс ыйын 7 күнүгэр В.Т. Курнев салайааччылаах Саха Республикатын гиирэ спордугар федерациятын көҕүлээһининэн интернет нөҥүө быһа биэриинэн (онлайн) күрэхтэһии тэрилиннэ. Күрэхтэһиини республика сүүмэрдэммит хамаандатын кылаабынай тренерэ Василий Николаевич Дьячковскай салайан ыытта. Күрэхтэһии түмүгүнэн дьахталларга уонна эр дьоҥҥо муҥутуур кыайыылаахтар быһаарылыннылар.

Ол курдук, дьахталлар 24 киилэлээх гиирэнэн рывокка, оттон эр дьон 32 киилэлээх гиирэнэн толчокка уонна рывокка ким ордук бэлэмнээҕин, ким күүстээҕин быһаарыстылар. Күрэхтэһээччилэргэ барыларыгар тэҥ бириэмэ – 10-нуу мүнүүтэ бэрилиннэ.

Дьэ, онон, күрэхтэһии түмүгүнэн дьахталларга Россия чемпионатын хас да төгүллээх призера, спорт маастарыгар кандидат Лена Гуляева (Дьокуускай) 70 очукуолаах бастаата. Киниттэн 19 очукуонан хаалбыт Саха сирин чемпионатын призера Мария Мифтахова (Нерюнгри) иккис миэстэни ылла. Үһүс бириистээх миэстэҕэ республика чемпиона, бастакы разрядтаах Римма Захарова (Томпо) 50 очукуолаах таҕыста. Салгыы миэстэлэри Алена Юргина, Елизавета Григорьева, Сардаана Тарасова ыллылар.

Эр дьоҥҥо күрэхтэһии тыҥааһыннаахтык барда. Ол курдук, толчокка Р.Лугинов бастаата, Я.Дунаев иккистээтэ, С.Оконешников үһүстээтэ, И.Кузьмин төрдүс көрдөрүүлэннэ. Оттон рывокка И.Кузьмин инники таҕыста. Бу көрүҥҥэ Р.Лугинов иккис буолла, С.Оконешников, Я.Дунаев үһүс-төрдүс буоллулар. Онон икки көрүҥ түмүгүнэн бастакы миэстэни Россия Кубогын иккис, Россия полуфиналын үһүс призердара, Саха сирин чемпиона, спорт маастара Руслан Лугинов (Уус Алдан) бастакы миэстэни хааччынна. Иккис миэстэҕэ республика чемпиона, бэтэрээннэргэ Россия күрэхтэһиитин кыайыылааҕа, спорт маастарыгар кандидат Иннокентий Кузьмин (Бүлүү) таҕыста. Оттон үһүс бириистээх миэстэни Саха сирин чемпиона, спорт маастарыгар кандидат Сандал Оконешников (Уус Алдан) ылла.

Чемпионнар уонна призердар сыаналаах бириистэринэн наҕараадаланнылар. Ити курдук, Саха сирин гиревиктэрэ карантин кэмигэр дьаныардаахтык дьарыктанан, аныгы сайдыылаах олох сибээһинэн туһанан, күрэхтэһэллэрин тохтоппоттор. Манна даҕатан эттэххэ, Кыайыы 75 сылыгар анаан бу сааскыттан видео-челлендж тэрийбиттэригэр – 11 улуус кыттыыны ылла. Аны бу тэрээһиҥҥэ эстафетаны республикабыт киин куората – Дьокуускай ылла.

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *