Гиирэ анньааччыларбыт аан дойду чемпионатыттан биэс мэтээллэннилэр!

Санкт-Петербург куоракка гиирэ спордугар аан дойду чемпионата ыытыллан түмүктэннэ. Онно Россия хамаандатын аатыттан Саха сириттэн – Владимир Оленов (Горнай), Иннокентий Кузьмин (Бүлүү), Василий Беленков (Эдьигээн) кытыннылар.

Биир дойдулаахтарбытыттан бастакы мэтээли Василий Беленков аҕалбыта. Кини бэтэрээннэргэ бэйэтин ыйааһыныгар иккис миэстэҕэ тахсан, үрүҥ көмүс мэтээлинэн наҕараадаламмыта. Маны тэҥэ кини эстафетаҕа үһүс миэстэлэннэ.

Эр дьон бөлөҕөр кыттааччы Владимир Оленов (68 кг) үһүс миэстэлэннэ. Кини уһун цикл көрүҥэр уон мүнүүтэ иһигэр гиирэни өрө анньыыга 70 көрдөрүүлэннэ. Манна сыһыары тутан эттэххэ, бу ыйааһыҥҥа Алексей Рябков (Россия) көрдөрүүтэ – 72 анньыы, оттон Владислав Зуев (Россия) – 71. Онон уолбут тэбис-тэҥ киирсиигэ кыл мүччү хоттортообут, күүстээхтэри кытта биир таһымнааҕын көрдөрбүт.

Оттон Иннокентий Кузьмин 50-54 саастаахтар бөлөхтөрүгэр 85-тэн үөһэ кг 24 киилэлээх гиирэни 74-тэ өрө анньан, бэтэрээннэргэ чемпион аатын ылла. Бэҕэһээ аны кини двоеборье көрүҥэр бэйэтин тэҥнээҕин булбата.

Бу ситиһиинэн кимнээҕэр даҕаны үөрбүт уонна кыайыылааҕы бастакынан эҕэрдэлээбит киһинэн Иннокентий Кузьмин биир дойдулааҕа, Бүлүү улууһун физическэй култуураҕа уонна спорка управлениетын начаалынньыга Гаврил Евсеев буолар.

Иннокентий аан дойду ики төгүллээх чемпионунан буолла! Двоеборьеҕа эмиэ бастаата!, — диэн Гаврил Степанович үөрүүтүн үллэстэр.Толчоккка 104, рывокка 207 көрдөрүүлэннэ. Россия чемпионатын бэтэрээннэргэ гиирэҕэ 2019 сыллааҕы абсолютнай чемпиона. Кини Хампаттан төрүттээх, Бүлүүгэ ЖКХ операторынан үлэлиир. Гиирэ спордугар Манчаары спартакиадатын, Спортивнай оонньуулар кыайыылаахтара, Россия, Европа, аан дойду чемпиона. Өссө 90-с сылларга кикбоксиҥҥа Россия чемпионатын призерунан буола сылдьыбыта. Бүлүү хамаандатын састаабыгар хапсаҕай федерациятын кубогын үһүс призера, дэгиттэр кыахтаах спортсмен, — диэн астынан туран кэпсээтэ.

Онон гиирэ анньааччыларбыт аан дойду чемпионатын бары өҥнөөх мэтээллэрин ылары ситистилэр. Манна ылары диэн бэрт кэбэҕэстик этиллэн хаалла. Бу ситиһии – өр сыллаах көмүс көлөһүн тохтуулаах эрчиллии, дьаныардаах дьарыктаныы, күүрээннээх күрэхтэһии уонна спорка бэриниилээх буолуу түмүгэ!

Спортсменнарбытын уонна кинилэр тренердэрин эҕэрдэлиибит!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *