Владислав Петров: “Сбор иккис түһүмэҕэ сүрүннээн көбүөргэ ыытыллар”

Россия уолаттарга сүүмэрдэммит хамаандатын чилиэттэрэ Андрей Мидловец, Владимир Бояновскай, Лев Павлов уонна Артем Слепцов, Дьулус Петров итиэннэ Москваҕа олорор биир дойдулаахпыт Коля Щеглов Саха сирин көҥүл тустууга уолаттарга хамаандатын сүрүн тренерэ, спорт маастара Владислав Петров салалтатынан бу күннэргэ Крымҥа, Россия сүүмэрдэммит хамаандатын састаабыгар үөрэтэр-эрчийэр түмсүүгэ сылдьаллар.

Биһиги, Владислав Петрову кытта телефонунан билсэн, дьарык хайдах быһыылаахтык баран иһэрин туоһуластыбыт.

Сбор Алушта куоракка “Барс” спортивнай базаҕа буола турар, — диир Владислав. – Бу, Россия уолаттарга хамаандатын Европа күрэхтэһиитигэр бэлэмнэнэр сборун иккис түһүмэҕэ. Ол эрээри, вирустан сибээстээн Европа түһүлгэтэ билиҥҥитэ ыытыллара-ыытыллыбата биллибэккэ турар. Атын, оҕолорго күрэхтэһиилэр бакаа суох курдуктар, барыта ковидтан тутулуктаах. Сборга барыта сүүсчэкэ эдэр тустуук, Россия бастыҥнара бары кытталлар. Сбор хаамыытын, эрчиллиини Россия уолаттарга сүүмэрдэммит хамаандатын сүрүн тренерэ Анзор Темботов бэйэтэ хонтуруоллуур. 

Владислав, баһаалыста, үөрэтэр түмсүү күннээҕи режимин билиһиннэр эрэ.

-Сарсыарда 08:00 чаастан сэрээккэ. Күнүс 11 чаас 30 мүн. бастакы дьарык ыытыллар уонна киэһэ17 ч 30 м иккис дьарык буолар. Бу иннинэ ыытыллыбыт сбор бастакы түһүмэҕэ сүрүннээн күүһү-уоҕу хачайданыыга анаммыт эбит буоллаҕына, иккис түһүмэххэ элбэх бириэмэ көбүөргэ үлэлээһиҥҥэ ууруллар.Уолаттар үчүгэйдик, санаалара кэлэн эрчиллэ сылдьаллар. Бу дьарык кинилэргэ инники күрэхтэһиилэргэ ситиһиилээхтик кытталларыгар төһүү күүс буолара саарбахтаммат.  

Манна биһиги атырдьах ыйын 23 күнүттэн саҕалаан, балаҕан ыйын 6 күнүгэр диэри эрчиллиэхтээхпит. Түгэнинэн туһанан, Саха Республикатын оҕо спордугар управлениета (дириэктэр В.И. Егоров) сборга кыттарбытын тэрийбитин иһин улахан махталбытын этэбит.    

Ити курдук, билигин дойду үрдүнэн коронавирус пандемията бүрүүкээбит кэмигэр спортсменнарбыт бириэмэлэрин халтайга ыыппакка, туох баар санитарнай ирдэбиллэри барытын тутуһан, дойдуларыгар да, соҕуруу даҕаны эрчиллиилэрин, дьарыктарын тохтоппоттор.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *