Владислав Петров: “Былырыын биир мэтээллээх эбит буоллахпытына, быйыл – үс”

Москва аттынааҕы Нарофоминскай куоракка 18-гар диэри саастаах эдэр бөҕөстөр Россия үрдүнэн бастыыр иһин күрэхтэһиилэриттэн Саха сирин хамаандата биир кыһыл көмүс, икки боруонса мэтээллээх кэллэ. Бу күрэхтэһии түмүгүн туһунан бэйэтин санаатын билиһиннэрэригэр, Саха сирин уолаттарга сүүмэрдэммит хамаандатын эппиэттээх тренерэ Владислав Петровтан көрдөстүм.

-Владислав, Россия уолаттарга күрэхтэһиитэ тугу көрдөрдө?

-Билэргит курдук, аҕыйах хонуктааҕыта Нарофоминскай куоракка көҥүл тустууга 18-гар диэри саастаах уолаттарга Россия күрэхтэһиитэ буолан бүттэ. Онно биһигиттэн биир уол бастаата, икки уол үһүстээтэ. Итини тэҥэ биир уол бэһис миэстэ буолла. Бу, биһэхэ үчүгэй көрдөрүү дии саныыбын. Былырыын, холобур, Олег Фомин маннык күрэхтэһиигэ биһигиттэн соҕотоҕун боруонса мэтээли аҕалбыта.

Андрей Мидловец (тренерэ — Гаврил Игнатьев) 42 киилэҕэ бастакы, Лев Павлов (тренерэ — Николай Данилов) 48-ка уонна Вова Бояновскай (тренерэ — Иннокентий Посельскай) 60-ҥа үһүс миэстэ буоллулар. Күрэхтэһии түөрт күн буолла, кулун тутар 4-8 күннэригэр диэри. Саха сириттэн уопсайа Нарофоминскайга 28 эдэр бөҕөс туһунна. Бу күрэхтэһиигэ бэлэмнэниибитин Р.М. Дмитриев аатынан Олимпийскай эрэл училищетын базатыгар барбыппыт. Оттон Андрей Мидловец уонна Михаил Нестеров Дагестаҥҥа, Хасавюрт куоракка бэлэмнэммиттэрэ. Түгэнинэн туһанан, училище дириэктэрэ Алексей Алексеевич Филипповка, кини бастакы солбуйааччыта Александр Степанович Контоевка махталбытын тиэрдэбит! Кинилэр биһигини өйөөн, усулуобуйаны төһө кыалларынан барытын оҥорон биэрдилэр. Итиэннэ оҕо спордун управлениетыгар, сборбутун тэрийэн ыытыыга көмөтүн иһин эмиэ махтанабыт!

Биһиги ситиһиилээхтик кыттыбыт уолаттарбытын кытта салгыы хайдах үлэлэһэр былааннааххытый уонна сүүмэрдэммит хамаанда тренердэрэ бөҕөстөрбүтүн хайдах сыаналаатылар?

-Бириистээх миэстэлэргэ тиксибит уолаттарбыт сотору Москваҕа тиийэн үс күн устата доруобуйаларын көрдөрүөхтэрэ. Ол кэнниттэн ыам ыйыгар Россия сүүмэрдэммит хамаандатын бастакы сборугар кыттыахтара. Сбор, календарьга билиҥҥитэ Кабардино-Балкарияҕа буолара биллэр. Онтон, күһүн аан дойду күрэхтэһиитин иннинэ икки түһүмэхтээх сбор буолар. Биһиги бастыҥ бөҕөстөрбүт бары онно кыттыахтара.

Балаһыанньа быһыытынан, Андрей Мидловец бастаабыт 42 киилэтэ – Европа да, аан дойду күрэхтэһиилэригэр суох. Оттон атыттарга арааһынай буолуон сөп буоллаҕа дии, Лев Павлов уонна Вова Бояновскай резервэ курдук сылдьаллар, онтон туох эмэ буолар түгэнигэр, Европа күрэхтэһиитигэр кыттар буолан хаалыахтарын эмиэ сөп. Мидловец бу ситиһиитинэн кылаабынайа, Россия сүүмэрдэммит хамаандатын састаабыгар киирдэ. Табылыннаҕына, муус устар уонна ыам ыйыгар Турцияҕа, Венгрияҕа ыытыллар норуоттар икки ардыларынааҕы турнирдарга кыттарга былаанныыбыт.

Андрей Мидловец хапсыһыыларын тренер киһи быһыытынан хайдах сыаналыыгыный?

-Кини бу күрэхтэһиигэ биэс эргиир тустан барытыгар кыайыыны ситистэ. Үһүс эргииргэ дагестанеһы кытта тустуута сүрдээх тыҥааһыннаахтык барбыта. Хапсыһыы бүтэрэ уонча сөкүүндэ хаалыар диэри 2:5 ахсаанынан хотторон иһэн, киһитин албаска түбэһиннэрэн, биир быраҕыынан (төбөтүттэн ылан “лампочкалаан”) 4 баалы ылан, 6:5 кыайан тахсыбыта. Итиннэ Андрей биһигини ыксата сылдьыбыта. Кыайбытыттан үөрбүппүт. Атын киирсиилэрин эрэллээхтик кыайталаабыта.

Кини үчүгэй хаачыстыбата диэн, тустууну бэйэтинэн көрдүүр, турбат уонна кыайыыга наһаа дьулуурдаах. Ханнык баҕарар балаһыанньаттан тустар уонна бүтэһиккэ диэри киирсэн баран тэйэр. Кимтэн да, туохтан даҕаны толлубат. Инникитин тустар кэскиллээх уол.

-Оттон атын уолаттар тустарынан тугу этиэххин сөбүй?

-Кыахпытын барытын толору туһанныбыт диир кыахпыт суох, холобур, 45 киилэҕэ кыттыбыт уолаттарбыт, уоннааҕылар син киирсэ сатаатылар. Лев Павлов бастаабыт уолга 0:2 ахсаанынан сабырыйтарда. Ити кини лидердэргэ олох чугас сылдьарын көрдөрөр. Лев Монголиятааҕы турнирга бастаабыта, Сайтиев турнирыгар иккис буолбута. Кини эмиэ инникилээх, кэскиллээх тустуук. Тарбахха баттыыр биир кэтэһэр киһибит, инникитин улахан болҕомто ууран, күүскэ үлэлиэхпитин наада.

Оттон Владимир Бояновскайы эттэххэ, эмиэ талааннаах тустуук. Кини бастыан да сөптөөх этэ дии саныыбын. Иккис эргииргэ Калининградтан Харчилава диэн бөҕөстүүн тустуутугар мөккүөрдээх түгэҥҥэ кыайыыны анараа уолга биэрдилэр. Атын утарсааччыларын Вова үчүгэйдик кыайталаата.

Ити курдук, Нарофоминскайга кыттыбыт эрээри, бириискэ тиксибэтэх уолаттар санааларын түһэрбэккэ, өссө дьаныардаахтык дьарыктаналларыгар баҕарыам этэ.

Сэһэргэстэ Петр ПАВЛОВ.

 

 

 

 

Добавить комментарий

Ваш адрес email не будет опубликован. Обязательные поля помечены *