Владислав Андреев: «Тустуук быһыытынан олохпор туочука туруора иликпин»

Бүгүн «Тайм-аут» биэриигэ көҥүл тустууга Беларусь Республикатын үтүөлээх маастара, аан дойду чемпионатын боруонса призера, аан дойду Кубогар биирдиилээн бастааһын кыайыылааҕа, Европа чемпионатын түөрт төгүллээх призера Владислав Андреев ыалдьыттаан – тус олоҕун-дьаһаҕын, тренерин, дьиэ кэргэнин, инники былаанын туһунан кэпсээтэ.

Владислав Андреев билигин сааһа 34-дэ, 26-с сылын көҥүл тустуунан утумнаахтык дьарыктанар. Кэргэннээх, үс кыыстаах. Дьоно билигин Белоруссияҕа олороллор, үөрэнэлэр.

Кини бэйэтин тустуук быһыытынан олоҕун туһунан кэпсииригэр, эдэр сылдьан наһаа күүскэ эрчиллэн, күрэхтэһэн кэбиһэн, элбэх эчэйии ылан, ис кыахпын туһамматым диэбитигэр сөбүлэһэбин. Маны атын тренердэр уонна тустууктар хатылаамыахтарын наада. Холобур, “наһаа күүскэ эрчиллэн, күрэхтэһэн” диэҥҥэ кини сыл аайы кэриэтэ эдэрдэр уонна улахан дьон күрэхтэһиилэригэр (Европа, аан дойду түһүлгэлэрэ) уонна үөрэтэр-эрчиллэн түмсүүлэригэр субуруччу кыттыбытын этэр. Кырдьык, этэргэ дылы, элбэх ноҕуруусканы ылан, ис кыаҕын (ресурсатын) сүтэрбитин суотугар үгүс эчэйиилэри көрсүбүтэ.

-2009 сыллаахха А.Медведь аатынан норуоттар икки ардыларынааҕы турнирга сэттэ кутургуйалаах сылдьан бастаабытым, — диэн, бэйэтэ да соһуйбуттуу кэпсиир. Дьиҥэ, тустаахха, төһөлөөх ыарыы, мэһэй буолбута буолуой?! Ону кини бэйэтэ эрэ этинэн-хаанынан билэн эрдэҕэ. Ону бэйэтэ даҕаны бэркиһээн, ол кыайыытын ити аҕыннаҕа.

Биһиги бары бу биэриигэ тустуук Владислав Андреев, инники былааннарын истиэхпитин баҕарбыппыт. Ону кини:

-Билиҥҥитэ тустуук быһыытынан олохпор туочука туруора иликпин, — диэн дуоспуруннаахтык, сиэрдээхтик уонна сэмэйдик хоруйдаата. – Олимпиада кэнниттэн барыта чуолкайдык биллиэ. Минскэйгэ тиийэн салгыы хайдах үлэлиирбин быһаарсыахтаахпын, — диэтэ.

Быйылгыттан Беларусь аатыттан тустар Арыйаан Тютрин туһунан ыйытыыга, кыахтаах, улахан көрдөрүүнү ситиһиэ диэтэ. Убай киһи быһыытынан, элбэхтик улахан таһымнаах күрэхтэһиилэргэ кыттыан, бэйэтин тустуук быһыытынан көрдөрүөн, итэҕэтиэн наадатын ыйда.

Оттон биэрии ыытааччыта, суруналыыс Николай Бястинов, легионердарга тугу субэлиэҥ этэй диэн ыйытыытыгар:

-Бастатан туран тулууру баҕарыам этэ, — диэтэ. – Көһөн тиийэн, миэстэҕэ бэйэтигэр олорон дьарыктанар ордук, кэлэ-бара сылдьардааҕар. Итиэннэ уопсай маассаны кытта бииргэ буолбакка, кинилэртэн ордук күүскэ эбии дьарыктаныахтааххын, олоххо көрсүллэр араас куһаҕан дьаллыктарга кыһаллыбакка, умньаммакка эрчиллиэхтээххин. Ол инниттэн, ханнык баҕарар спортсмен улахан сыаллаах-соруктаах буолуохтаах, ону ситиһэргэ дьулуһуохтаах, — диэн сүбэлээтэ.

Владислав Андреев манна, Дьокуускайга тустуу тренеринэн үлэлии сылдьыбыта. Онон кини тустан бүтэр да түгэнигэр, бэйэтин баай опытын туһанан эдэр ыччаттары көҥүл тустуу кистэлэҥнэригэр, маастарыстыбатыгар төһө баҕарар үөрэтэр-такайар кыахтаах дии саныыбын. Итиэннэ, бэйэтэ даҕаны тренердиирин ис сүрэҕиттэн сөбүлүүрүн туһунан биэрии кэмигэр быктаран ылла. Тус тренерэ – Валерий Петрович Керемясов туһунан иһирэхтик ахтан аһарда.

Владислав – Беларусь Республикатын аатыттан улахан көбүөргэ 16 сыл ситиһиилээхтик кытынна. Ол иһигэр, бэйэтэ эппитинэн, бу дойду көҥүл тустууга 9 төгүллээх чемпионунан буолла. Оттон Александр Медведь турнирыгар хаста бастаабыккыный диэн, Н.Бястинов ыйытыытыгар кини, 5-дуу, 6-та дуу кыайдым диэн хоруйдаата.

Манна, тустуу статистикатын үөрэтэр киһи быһыытынан чопчу хоруйдуохха сөп, Владислав Андреев – А.Медведь турнирын алта төгүллээх кыайыылааҕа! Өссө сэттэ диэххэ сөп, 2003 сыллаахха Белай Церковька (Украина) ыытыллыбыт А.Медведь аатынан уолаттарга норуоттар икки ардыларынааҕы турнирга бастаан турар. Итини тэҥэ Медведь турнирыгар кини биирдэ – иккис, иккитэ – үһүс миэстэлэммитэ. Ол аата, бу түһүлгэттэн барыта 10 мэтээллэннэ.

Владислав билигин даҕаны борцовкатын ыйыы илик. Ким билэр, баҕар быйыл күһүн ыытыллыахтаах Медведь турнирыгар эмиэ тустан кэбиһиэн сөп дии саныыбын.

Чэ, бүгүн «Тайм-аут» биэриини көрөн баран, үөскээбит санааларым итинниктэр.

Петр ПАВЛОВ.

           

Добавить комментарий

Ваш адрес email не будет опубликован. Обязательные поля помечены *