Владимир Птицын: “Барыгытын бу кыайыынан эҕэрдэлиибин!”

2020 сыл түмүгүнэн Саха Республикатын дуобакка федерацията — бастыҥ үлэлээх федерациянан ааттанна! Бу кыайыы – бүтүн улахан коллектив: спортсменнар, тренердэр, судьуйалар, спорду тэрийээччилэр, дуобаты таптааччылар, төрөппүттэр барыларын түмсүүлээх үлэлэрин түмүгэ буолар. Барыгытын бу кыайыынан эҕэрдэлиибин!

Өссө 20-30 сыллааҕыта, дуобаты эдэрсийдэ диирбит. Билигин дуобат өссө биллэ эдэрсийдэ. Ол да буоллар, Н.Н. Саввинов, Д.В. Сыромятников, М.Н. Бырдыннырова, В.И. Кононов, В.В. Куприянов курдук бэтэрээннэрбит бэйэлэрин үтүө холобурдарынан биһиги федерациябыт ыытар үлэтигэр көх-нэм буолаллар.

Тирэхпит – улуустардааҕы, куораттардааҕы федерацияларбыт, кинилэр салайааччылара буолалларын умнуо суохтаахпыт. Хас биирдии үрдүк уонна орто үөрэх тэрилтэлэригэр, тыа сиригэр хас сэлиэнньэ аайытын, хас биирдии үөрэх кыһаларыгар, уһуйааннарга үлэлиир дуобат энтузиастара, лиидэрдэрэ баар буоланнар, дуобат билигин муҥутуур сайдыыта бара турар кэмигэр сылдьабыт.

Дуобат сайдыытыгар ис сүрэхтэриттэн ыалдьар: А.Г. Азаров, Г.Г. Колесов, И.А. Токусаров, А.Ю. Бурнашев, Н.Н., В.Н. Кычкиннар, И.О. Павлов, Ю.Е. Никифоров, Н.К. Стручков, Г.П. Винокуров, П.П. Ущницкай курдук илиилэрин араарбакка үлэлиир дьоннордоох буоламмыт, ситиһиилэрбит бииртэн-биир кэлэр иһэллэр!

Дуобаппыт сайдар инники эрэллэрбит: Матрена Ноговицына, Андрей Федотов, Николай Гуляев, Николай Гермогенов, Наталья Шестакова, Ксения Нахова уонна кинилэри тилэх баттаһа үүнэн-сайдан иһэр үгүс ахсааннаах эдэр көлүөнэ буолар!

Дуобаты таптааччылары барыгытын бу үөрүүлээх түгэнинэн эҕэрдэлиибин! Үлэҕитигэр, үөрэххитигэр ситиһиилэри баҕарабын! Бары доруобай буолуҥ! Таптыыр дуобаккыт муҥутуур сайдарын туһугар үлэлээҥ-хамсааҥ!

Саамай улахан махталбын спонсорбытыгар, федерация президенин бастакы солбуйааччытыгар, Россия дуобакка федерациябыт вице-президенигэр Яков Эдуардович Сидоровка тиэрдэбин! Итиэннэ улахан махталым дуобаты сырдатааччыларга ананар! Кинилэр өлүүлэрэ биһиги кыайыыбытыгар кырата суох.

Владимир ПТИЦЫН, Саха Республикатын дуобакка федерациятын президенэ.

Петр Павлов хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *