Владимир Павлов: “Василий утарсааччытын кыайан кыайда”

Ижевскэй куоракка Россия боксаҕа хамаанданан Кубога ыытыллан түмүктэннэ. Кыайыылааҕы быһаарар бүтэһик киирсиигэ Приволжскай федеральнай уокурук – Киин федеральнай уокурук хамаандатын 6:4 ахсаанынан хотон, бастакы миэстэҕэ таҕыста. Онон, биһиги Василий Егоровпыт төһө даҕаны бэйэтин киирсиилэригэр барытыгар кыайыы көтөллөннөр, хамаанданан иккис миэстэни ылла. Уопсайынан, Кубокка кыттыбыт уолаттарбыт бары үчүгэй киирсиилэри көрдөрөн, биир дойдулаахтарын сэргэхситтилэр диэххэ сөп.

Василий Егоров финалга киирсиитин туһунан Саха сирин боксаҕа хамаандатын сүрүн тренерэ, соторутааҕыта Саха Республикатын үтүөлээх тренерэ буолбут Владимир Иванович Павлов бу курдук быһаарар:

Василий Иван Абрамовтыын киирсэригэр таһымынан баһыйарын көрдөрдө. Уҥа-хаҥас хамсаан, араас өттүттэн охсуталаан, утарылаһааччытын ыһан кэбистэ. Ордук алларааттан үөһэ төбөҕө охсуулара элбэхтик уонна соһуччу тиийтэлээтэ.

Иван Абрамов элбэхтик киирсибит, Европа 17-18 саастаахтарга 1-кы миэстэлээҕэ, Россия чемпионатын хаста да төгүллээх призера. Элбэҕи билбит, көрбүт, опыттаах боксер. Василийдыын күөн көрсүүтүгэр ордук утары охсуулары уонна Василий кимэн киириитэ бүтэн эрдэҕинэ, хардары охсууларынан туһанна. Онто иккис раунд саҕаланыытыгар күүһэ-уоҕа элбэх, түргэн эрдэҕинэ соһуччу табыталыы сырытта.

Вася ону этинэн хаанынан билэ охсон, атын хамсаныылары оҥортоон уонна киһитэ кини кимиитин кэнниттэн хоруйдуур кэмигэр көмүскэнээт, эбии утарыта охсуолаан сабырыйара элбээн, кыайан кыайда (судьуйалар быһаарыыларынан туох да мөккүөрэ суох 5:0 ахсаанынан – П.П.).

Кинилэр урут күрэхтэһиигэ көрсүбүттэрин өйдөөбөппүн. Эрчиллии кэмигэр спарингаҕа киирсээччилэр. Кубокка биирдиилээн ыйааһыннарынан түмүк тахсыбат.

Санатан эттэххэ, бу күрэхтэһиигэ Киин федеральнай уокурук аатыттан кыттыбыт Василий Егоров (52 кг) рингэҕэ үстэ таҕыста уонна барытыгар эрэллээх кыайыыны ситистэ. Ол курдук, Ахмед Закировы (Соҕурууҥҥу федеральнай уокурук), Павел Гунченконы (Сибиирдээҕи федеральнай уокурук) уонна Иван Абрамовы (Приволжскай федеральнай уокурук) итэҕэтиилээхтик кыайталаан, официальнайа суох ааҕыынан, бэйэтин ыйааһыныгар билиҥҥитэ дойдуга бастыҥ боксер буоларын көрдөрдө.

Аны, бу дьыл сэтинньи 27 – ахсынньы 6 күннэригэр Оренбург куоракка Россия боксаҕа чемпионата ыытыллара былааннанар. Онно кыайбыттар Россия хамаандатын састаабыгар киирэн, Олимпиадаҕа сүүмэрдиир күрэхтэһиигэ кыттар быраабы ылыахтара.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *