Владимиртан биэс мэтээллээх

Ааспыт өрөбүл күннэргэ тустууга хас даҕаны улахан таһымнаах күрэхтэһиилэр ыытылыннылар. Олорго саха тустууга кыһатын иитиллээччилэрэ, биһиги биир дойдулаахтарбыт эриэ-дэхси көрдөрүүлэри ситистилэр. Холобур, Владимир куоракка, дьүлэй спортсменнарга Россия көҥүл тустууга чемпионата ыытыллан түмүктэннэ.

Бу чемпионат, спортсменнарга улахан эппиэтинэстээх, кыайыылаахтар аны күһүн Турцияҕа ыытыллар аан дойду чемпионатыгар кыттар быраабы ылаллар.

Саха сириттэн тренердэр Василий Стручков, Эрчимэн Макаров, Прокопий Николаев салалталарынан хас даҕаны тустуук кытынна. Кинилэртэн Егор Скрябин (57 кг), Валерий Чемпосов (65 кг), Василий Стрекаловскай (74 кг) иккис миэстэҕэ тахсан, үрүҥ көмүс мэтээллэр хаһаайыннарынан буоллулар. Оттон Будимир Трофимов (61 кг) уонна Евгений Мухамедзянов (65 кг) боруонса мэтээллэринэн наҕараадаланнылар.

Бу көрдөрүүлэринэн бөҕөстөрбүт Россия сүүмэрдэммит хамаандатын састаабыгар киирэн, сотору кэминэн Москваҕа, үөрэтэр-эрчийэр түмсүүгэ кыттыыны ылыахтара.

Санатан эттэххэ, соторутааҕыта эмиэ Владимир куоракка буолбут Россия эдэрдэргэ күрэхтэһитигэр, Ринат Троев 65 киилэҕэ кыайыылааҕынан тахсан, аан дойду түһүлгэтигэр кыттарга бэлэмнэнэр.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *