Виктор Рассадин – Нефтеюганскайдааҕы турниры кыайда


Нефтеюганскайга Россия спортивнай тустууга федерациятын вице-президенэ, Ханты-Мансийскай автономнай уокурук депутата Владимир Семенов бирииһигэр көҥүл тустууга норуоттар икки ардыларынааҕы XV турнир ыытылла турар.

Бу түһүлгэҕэ биһиги бөҕөстөрбүт хайдах кыттыбыттарын туһунан билиһиннэрдэххэ маннык.
57 киилэҕэ саамай эрэнэр бөҕөспүт, Дьокуускайга улуу тренер Д.П. Коркин уонна Кемеровоҕа “Шахтердарга албан аат” норуоттар икки ардыларынааҕы турнирдар кыайыылаахтара Арыйан Тютрин уруккуттан хатыһар киһитэ, били бу саас устудьуоннарга Россия чемпионатыгар бастыырыгар финалга хатыһыылаахтык хоппут дагестанеһа Гасангусейн Бадрудиновка бу сырыыга 4:5 ахсаанынан хотторон кэбистэ. Салгыы тустууга Бадрудинов уопуттаах бөҕөс Расул Машезовка сабырыйтаран, аны Арыйаммыт баҕардар боруонса мэтээл иһин тустар кыаҕын бүөлээн кэбистэ. Онон бүттэхпит.

Бу ыйааһыҥҥа кыттар уолаттарбыт Федор Постников уонна Егор Потапов сэрэбиэй быһыытынан бастакы эргииргэ бэйэ-бэйэлэрин утары түбэстилэр. Онуоха 4:0 ахсаанынан кыайыыны Потапов ситистэ. Салгыы күрэхтэһиигэ кини Россия чемпионатыгар быйыл бэһис буолбут дагестанец Рамиз Гамзатовка 8:10 ахсаанынан хомолтолоохтук хоттордо. Онон бастакы ыйааһыҥҥа ытыспытын сотуннубут.

Ол оннугар Саха сирин хамаандатын капитана, соторутааҕыта Д.П. Коркин турнирыгар ситиһиилээхтик кыттыбыт Виктор Рассадин (65 кг) дьоһун тустууну көрдөрдө. Кини утуу-субуу Шамиль Омаровы (Крым) 11:2, бэйэтин киһитэ Петр Павловы 10:0, Виктор Середаны (Беларусь) 12:2 уонна финалга былырыын эдэрдэргэ аан дойду чемпиона буолбут дагестанец Абдулла Ахмедовы 7:4 ахсаанынан эрэллээхтик хотон, Нефтеюганскайдааҕы турнир икки төгүллээх кыайыылааҕынан буолла. Виктор Рассадин сыыйа-баайа бэйэтин урукку тустар таһымыгар киирэн эрэрэ киһини үөрдэр.

Россия чемпионатыгар быйыл бэһис буолбут Петр Павлов бастаан казах Саранбайы 14:3 кыайан баран, Рассадиҥҥа хотторбута. Оттон “уоскутар” бөлөххө Омаровка (Крым) 2:6 ахсаанынан хотторон кэбистэ. Дьиҥэ, Петр эрдэ былааннаммытын курдук, 61 киилэҕэ тустубута эбитэ буоллар, дии саныыбын.

65 киилэҕэ үһүс кыттааччыбыт – Дьулустан Булатов дагестанец А.Ахмедовка 4:8 хотторон баран, киһитэ финалга тахсыбытын быһыытынан, үһүс миэстэни былдьаһааччылар бөлөхтөрүгэр киирэн, Артур Бадтиевка (Чувашия) 0:3 хоттордо.

Турнир бастакы күнүн түмүгэ:

57 кг. 1. Азамат Тускаев (Хотугу Осетия), 2. Расул Машезов (КБР-Крым), 3. Рамиз Гамзатов (Дагестан) уонна Занабазар Занданбуд (Монголия).

65 кг. 1. Виктор Рассадин (Саха сирэ), 2. Абдула Ахмедов (Дагестан), 3. Шамиль Омаров (Крым) уонна Тимур Айткулов (Казахстан).
70 кг. 1. Чермен Валиев, 2. Алан Гогаев (иккиэн – Хотугу Осетия), 3. Анзор Закуев (КБР-Крым) уонна Ильдус Гиниятуллин (Татарстан).

79 кг. 1. Халил Аминов (Дагестан), 2. Ацамаз Санакоев (Хотугу Осетия), 3. Иса Шапиев (Узбекистан) уонна Радик Валиев (Хотугу Осетия).

97 кг. 1. Нурмагомед Гаджиев (Азербайджан), 2. Георгий Гогаев (Хотугу Осетия), 3. Тамерлан Расуев (Чувашия) уонна Шамир Атян (Армения).

Бүгүҥҥү финаллар:

61 кг: Артем Гебеков (Дагестан) — Джабраил Гаирбеков (Дагестан)

74 кг: Ахмед Усманов (Дагестан) — Магомедхабиб Кадимагомедов (Дагестан)

86 кг: Арсенали Мусалалиев (Дагестан) — Сослан Кцоев (Хотугу Осетия)

92 кг: Алан Багаев (Хотугу Осетия) — Азамат Закуев (КБР)

125 кг: Мухамагази Магомедов (Красноярскай) — Виталий Голоев (Хотугу Осетия).

Петр ПАВЛОВ.

Добавить комментарий

Ваш адрес email не будет опубликован.