Виктор Лебедев: “Кубогы Россияҕа төнүннэриэхпит”

Биллэрин курдук, кулун тутар 16-17 күннэригэр биһиги республикабыт киинигэр – Дьокуускай куоракка көҥүл тустууга Аан дойду Кубога ыытыллар. Бу улахан таһымнаах күрэхтэһиини көрсө бүгүн, олунньу 18 күнүгэр, Аан дойду кубогын Пресс киинэ (салайааччы Прокопий Бубякин) бастакы пресс-конференцияны тэрийэн ыытта. Суруналыыстары кытта СР Физическэй култуураҕа уонна спорка миниистирэ Иннокентий Григорьев, СР спортивнай тустууга федерациятын бастакы вице-президенэ, спорт үтүөлээх маастара Виктор Лебедев уонна СР спортивнай тустууга федерациятын толорооччу дириэктэрэ Николай Николаев көрүстүлэр, ыйытыыларга хоруйдаатылар.

Иннокентий Григорьев: “Аан дойду Кубога – хамаанданан күрэхтэһии, биирдиилээн ыйааһыннарга кыайыылаахтары быһаарыыны биһиги быһаарбаппыт. Уопсайынан, ылан көрдөххө, Тустуу аан дойдутааҕы түмсүүтэ (UWW) сүрдээх элбэх ирдэбиллээх эбит. Ол ирдэбиллэри чопчу толотторор уонна биир даҕаны атын дьайыылары ылыммат. Күрэхтэһии буолар сирин иннинээҕи массыына турар сириттэн саҕалаан туспа ирдэбиллээхтэр, быраабылалаахтар. Барыта техническэй регламент быһыытынан барыахтаах. Оттон Кубокка кэлбит биир эмэ хамаанданы кытта Саха сирин тустууктарын  табаарыстыы көрсүһүүлэрин туһунан туох даҕаны кэпсэтии суох.

Кубокка бочуоттаах ыалдьыт быһыытынан Тустуу аан дойдутааҕы түмсүүтүн (UWW) президенэ Ненад Лалович, Россия спортивнай тустууга федерциятын президенэ, олимпийскай чемпион Михаил Мамиашвили, Россия Государственнай Думатын депутаттара, элбэх олимпийскай чемпионнар кэлиэхтэрэ.

Хас биирдии хамаандаҕа республика улахан тэрилтэлэрэ шефтэһии бэрээдэгинэн сыһыарылыннылар”.

Виктор Лебедев: “Элбэх киһи, Россия хамаандата Кубокка ханнык састаабынан киирэрин ыйыталаһар. Ону билээри күн бэҕэһээ Россия көҥүл тустууга сүүмэрдэммит хамаандатын кылаабынай тренерэ Дзамболат Тедееви кытта кэпсэтэ сырыттым. Кини, Россия састааба сбор кэнниттэн, кулун тутар саҥатыгар биллиэҕэ диэтэ. Кубокка Саха сириттэн Эдуард Григорьев уонна Арыйан Тютрин кыттыахтарын сөп.

Аан дойду Кубога диэн – хамаанданан күрэхтэһии. Ол иһин сүрдээх тыҥааһыннаах уонна эппиэтинэстээх. Манна хас биирдии хапсыһыы – эппиэтинэстээх. Кубокка мөлтөх хамаанда кэлбэт, онон интэриэһинэй.

Мин Кубокка үстэ кыттыбытым. Аан дойду күүстээх бөҕөстөрүн кытта тустубутум. Саамай өйдөөн хаалбыт уонна сыаналыыр кыайыыбынан – 2014 сыллаахха АХШ-ка буолбут Кубок финалыгар аан дойду чемпиона Хассан Рахимины (Иран) хотуубун ааҕабын. Россия хамаандата кубогы ылбатаҕа аҕыс сыл буолла. Онон, Тедеев эппитин курдук, биһиги саамай күүстээх састаабы туруоран, Кубогы Россияҕа төнүннэрэргэ кыһаллыахтаахпыт”.

Николай Николаев: “Олунньу 13 күнүгэр Москваҕа, РФ спортивнай тустууга федерациятын президенэ Михаил Мамиашвили уонна СР Ил Дархана Айсен Николаев кыттыылаах, Кубогы тэрийэн уонна бэлэмнээн ыытар анал хамыыһыйа сүбэ мунньаҕа ыытылынна. Онно, көҥүл тустууга аан дойду Кубогын Дьокуускайга тэрийэн ыытарга Тустуу аан дойдутааҕы түмсүүтүн, Россия спортивнай тустууга федерациятын уонна Саха Республикатын икки ардыларыгар сөбүлэһии оҥоһулунна”.

Пресс-конференция кэмигэр көҥүл тустууга Аан дойду Кубогын официальнай Брендбуга, Интернет-сайта уонна волонтердар кэтэр формалара – сүрэхтэннилэр.

Санатан эттэххэ, Дьокуускайга кулун тутар 16-17 күннэригэр ыытыллар көҥүл тустууга Аан дойду Кубогар планета аҕыс саамай күүстээх хамаандата күрэс былдьаһыа: Россия, АХШ, Грузия, Куба, Япония, Иран, Турция, Монголия.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *