Василий Уваров: “Тренердэр бэйэлэрин үлэлэрин сырдаппаттарыттан, атын өйдөбүллэр үөскүүллэр”

Көҥүл тустууга аан дойду чемпиона Герман Контоевы, олимпиецтар Владимир Торговкины, Артур Федоровы уонна да элбэх көбүөр дьиҥнээх маастардарын иитэн-эрчийэн таһаарбыт тустууга улахан үөрүйэхтээх тренер – ССРС спордун маастара, Саха Республикатын үтүөлээх тренерэ, Мэҥэ Хаҥалас уонна Амма улуустарын бочуоттаах гражданина, Россия физическэй култуураҕа үтүөлээх үлэһитэ, Д.П. Коркин аатынан СР спорт эйгэтигэр Государственнай бириэмийэтин лауреата Василий Петрович Уваров dzulurgan.ru сайтка маннык ис хоһоонноох сурук ыытта.

Мин, билигин тренер үлэтин сырдатарга былааннанным уонна маннык өйдөбүлгэ кэллим. Билигин Саха сирин тренерэ олох туох да аанньа ахтыллыбат, наар киртитиигэ, мөҕүллүүгэ сылдьарын туһунан кэпсэтии барар.

Ону мин толкуйдаан бараммын, үлэлии сылдьар тренердэр бэйэлэрин үлэлэрин сырдаппаттар, санааларын дьоҥҥо тиэрдибэттэр эбит дии санаатым. Бары мустан кэпсэттэхпитинэ наар харчы тиийбэт, бара-кэлэр кыахпыт суох, ол иһин оҕолорбут сайдыбаттар диэн кэпсэтиинэн муҥурданабыт. Олохтоох кыһалҕаны биир да киһи кэпсээбэт, сырдаппат. Билигин бу интернет үйэтигэр, прямой да кэпсэтиилэргэ инстаграмы туһаммат эбиппит. Холобур, Ил Дарханы кытта кэпсэтии.

Ол иһин үөһээҥҥи салалта тренер үлэтин, спорт сайдыытын туһунан төрүт өйдөбүлэ суох. Холобурдаан эттэххэ, депутат быыбарга турарыгар хайдах гынарый? Бэйэтэ туох үлэни-хамнаһы ыыппытын, ханна көрсүһүү оҥорбутун, ханнык оскуолаҕа тугу эрэ бэлэхтээбитин кэпсээн, дьон итэҕэлин ылан, дьэ былааска тахсар.

Оттон биһиги, кыра дэриэбинэ тренердэрэ сырыы ахсын интернети туһанан эфирга тахсарбыт эбитэ буоллар, общественнай мнениены син үөскэтиэхпит этэ. Оччоҕуна, Ил Дархан ону аахсыаҕа уонна спорка улахан болҕомтотун ууруо этэ дии саныыбын. Тоҕо диэтэххэ, билигин политика барыта общественнай мнениенан, социальнай сетинэн оҥоһуллар. Биһиги, тренердэр итини өйдөөбөккө сылдьабыт. Ол иһин мин билигин тренердэри көрсөн сырыы ахсын, үлэҕитин сырдатыҥ, бэйэҕитин көрдөрүҥ диэн этэбин. Инники өттүгэр бэйэм үлэбин-хамнаспын барытын сырдатыам. Бу пиар буолбатах, бу дьиҥнээх тренер бэйэтин үлэтин кэпсээһинэ, баар кыһалҕаны туруорсуута.

Элбэх тренер үлэтин суруйара буоллар, үрдүкү салалта биһиги кыһалҕабытын өйдүө, боппуруоһу быһаарыа этэ дии саныыбын. Онон мин ити суолга туруохха наада диэн толкуйдаахпын. Тренер үлэтин сырдатыы маассабай буолуон наада. Мин санаабар тренердэр, рано или поздно, син биир кыттыахтара. Ити саамай сөптөөх суол. Тоҕо диэтэххэ, билигин саха тренерин тэпсии түмүгэр тустууга оҕолор кэлиилэрэ мөлтөөтө. Бүгүҥҥү күҥҥэ пандемиянан сибээстээн тыаларга практически оҕолор үчүгэй аҕайдык эрчиллибэккэ сылдьаллар. Тустууга кэлэр оҕо ахсаана лаппа аҕыйаата. Онон бу саамай сөптөөх, саамай наадалаах хамсаныы буолуо дии саныыбын.

Кырдьык, В.П. Уваров этэрин курдук, бу – спорт, чуолаан тустуу сайдыытыгар кырата суох, биир быһаарыылаах санаа. Этэргэ дылы, “ытаабат оҕону эмсэхтээбэттэр”. Бу суругу ааҕан баран бэйэҕит санааҕытын үллэстэргитигэр, кэпсэтиигэ кыттаргытыгар ыҥырабыт.

Петр ПАВЛОВ.    

3 thoughts on “Василий Уваров: “Тренердэр бэйэлэрин үлэлэрин сырдаппаттарыттан, атын өйдөбүллэр үөскүүллэр”

  • 22 января, 2021 в 9:07 пп
    Permalink

    Мин эмиэ инник дии саныыбын уол о5ону уьуйуу молтоото,биир бириэмэ5э тустууну школьнай программа5а киллэрэ сылдьыбыттара ,оннугу киллэриэххэ наада обязаловка курдук ,оччо5о эрэ ити проблема сы5арыйар кыахтаах.спорт.оск медигабын✊✊✊

    Ответ
  • 22 января, 2021 в 10:11 пп
    Permalink

    Результат суох буоллаҕына,хайдах да сырдатан үчүгэй буолбаккын бо

    Ответ
    • 22 января, 2021 в 11:36 пп
      Permalink

      Оннук диэн буолбатах. Төттөрүтүн специалистар бэйэлэринэн прессаҕа кыттыахтаахтар. Урут Тарскай, Коркин, Дмитриев хаһыакка элбэхтик суруйаллара. Ол кыайыыны-хотууну эрэ буолбатах, кыһалҕаны эмиэ туруорсаллара. Биир тылынан, бэчээти кытта ыкса үлэлииллэрэ. Оттон билигин тренердэр, Уваров этэрин курдук ньимийэн баран сылдьаллар.

      Ответ

Добавить комментарий

Ваш адрес email не будет опубликован. Обязательные поля помечены *