Василий Уваров: «Дьарык мин санаабар, сүрдээх туһалаахтык барда»

Саха Республикатын үтүөлээх тренерэ Василий Петрович Уваров бу күннэргэ эрчийэр уолаттарын кытта Хотугу Осетия Республикатын Владикавказ куоратыгар тиийэн, Тустуу Академиятын базатыгар анал үөрэтэр-эрчийэр түмсүүгэ сылдьар. Кини биһиэхэ бу курдук биллэрэр:

-Бүгүн (кулун тутар 5 күнүгэр) хонтуруоллуур хапсыһыылар буоллуллар. Хотугу Осетия сүүмэрдэммит хамаандата Россия чемпионатыгар бараары бэлэмнэнэ сылдьар. Хапсыһыыларга биһигиттэн Станислав Свинобоев уонна Айаал Лазарев кыттыыны ыллылар. Свинобоев туһунан эттэххэ, кини бу хапсыһыыларга бэйэтин куһаҕана суохтук көрдөрдө. Үчүгэй бэлэмнэниини, дьарыгы барда диэххэ сөп, бу сборга.

Икки нэдиэлэ Хасавюрка (Дагестан) эрчиллибиппит. Онно эмиэ хонтуруоллуур хапсыһыылар буолбуттара. Бу манна, Владикавказка эмиэ икки нэдиэлэ сырыттыбыт. Сарсын дойдубутугар көтүөхтээхпит. Россия эдэрдэргэ күрэхтэһиитэ саҕаланара ый курдук бириэмэ хаалла. Күрэхтэһии Иркутскайга, муус устар 8-12 күннэригэр ыытыллар. Онно ситиһиилээхтик кыттарга бэлэмнэнэ сылдьабыт.

Сбор мин санаабар сүрдээх үчүгэйдик, туһалаахтык барда. Билиҥҥи кэмҥэ аан дойдуга саамай күүстээх тустуу оскуолалаах Дагестан уонна Хотугу Осетия республикаларыгар тиийэн дьарыктанныбыт. Манна 13 уолу илдьэ сырыттыбыт. Республика эдэрдэргэ хамаандатын сүрүн тренерэ Василий Неустроев сорох уолаттары Махачкалаҕа илдьэ сылдьар. Мин ыарахан ыйааһыҥҥа тустар икки уолу тэҥэ 70 киилэҕэ кыттар Станислав Свинобоевы – осетиннары кытта дьарыктаатым.

Түмүктээн эттэххэ, үчүгэй дьарыктар буоллулар. Олохтоох маннааҕы Осетия тренердэрин сүрүннээн билэбин, биһиэхэ сүрдээх үчүгэйдик сыһыаннаһаллар, истиҥник көрүстүлэр.

Эбии информация курдук эттэххэ, биллиилээх тренер Анатолий Маргиев манна кэлэн Азамат Тускаевы анаан бэлэмнии сылдьар. Тускаев туруга олох үчүгэй. Биир бэйэм, кинини үчүгэй бэлэмнээх сылдьар диэн көрдүм.

Петр ПАВЛОВ.       

Добавить комментарий

Ваш адрес email не будет опубликован. Обязательные поля помечены *