Василий Егоров финал аҥарыгар таҕыста

Россия боксаҕа чемпионата түмүктүүр түһүмэххэ тахсара чугаһаан эрэр. Бүгүн, алтынньы 16 күнүгэр чемпионат сарсыардааҥҥы чааһыгар 49 киилэҕэ финал чиэппэрин киирсиилэрэ ыытылыннылар.

Онуоха А рингэҕэ бастакы киирсиигэ – спорт үтүөлээх маастара, 25 саастаах Василий Егоров – Набережные Челны куораттан сылдьар, боксанан 10-с сылын дьарыктанар спорт маастара, рингэҕэ 67 киирсиини ыытан 54 кыайыыны ситиспит Россия устудьуоннарга чемпиона Шамиль Котлубаевы бары өттүнэн баһыйа тутан, эрэллээхтик кыайда. Биһиги боксербут түргэн, сымса хамсаныытынан, таба охсуута элбэҕинэн быдан чорбойдо. Онон Василий мустубут ыалдьааччыларын уонна тренердэрэ А.Пахмовы, С.Анохины үөртэ.

Иккис киирсиигэ Россия былырыыҥҥы чемпиона Артыш Соян (Новосибирскай) – Володя Мнацаканяны (Москва) хотто. Салгыы киирсиигэ Эдмонд Худоян (Челябинскай) – Николай Харанахоевы (Бурятия) баһыйда.

Төрдүс киирсиигэ Саха сирин хамаандатын капитана, 22 саастаах спорт маастарыгар кандидат, Дальнай Восток федеральнай уокурук үс төгүллээх чемпиона, тренердэр А.Слепцов уонна В.Винокуров салалталарынан дьарыктанар Борис Сидоров бу ыйааһын биир күүстээх боксера, 27 саастаах норуоттар икки ардыларынааҕы кылаастаах маастар Батор Сагалуевы (Бурятия-Хабаровскай) утары таҕыста.

Сагалуев маастарыстыбата үрдүгүн туһанан хара маҥнайгыттан киирсиини сытыытык саҕалаан, уолбутун канакка ыган күүстээх охсуулары оҥортоото. Ити курдук, икки бастакы рауҥҥа баһыйа тутта. Оттон үһүскэ Борис Сидоров киирсэр тактикатын уларытан, наар урутаан, хардарыта охсуолаан, хорсуннук кииристэ.

Чемпионат информатор-судьуйата Роланд Курбанов чөҥ куолаһынан: “Бу киирсиигэ кыайыыны ситистэ күөх муннуктан тахсыбыт боксер Батор Сагалуев!” — диэн биллэрдэ.

Аттыбар турбут боксаҕа спорт маастара Игорь Павлов уонна Бүтүн Россиятааҕы категориялаах судьуйа, суруналыыс Гаврил Стручков: “Оо, дьэ, хара бастакыттан итинник үлэлээбитэ буоллар, кыайара хаалла” — дэстилэр.

Итинэн Сидоров төһө да ааттаах-суоллаах киһиэхэ хоттордор, үчүгэй өйдөбүлү хаалларда.

Онон, бу ыйааһыҥҥа финалга тахсар иһин киирсиилэргэ көрсүөхтэрэ: Василий Егоров (Саха сирэ) – Артыш Соян (Новосибирскай) уонна Эдмонд Худоян (Челябинскай) – Батор Сагалуев (Бурятия, Хабаровскай). Ити киирсиилэр бырагыраама быһыытынан алтынньы 19 күнүгэр, бээтинсэҕэ буолуохтара.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *