Варшава-2021: Тютрин уонна Бекренев салгыы тусталлар

Польшаҕа көҥүл тустууга Европа чемпионатын иккис күнэ. Бөөлүүн финалга тахсар иһин тустуулар буоллулар. Ол түмүгүнэн, биһиги Арыйаан Тютриммытын бастакы эргииргэ хоппут Россия чемпионатын үрүҥ көмүс призера тувинец Начын Монгуш – азербайджанец Афган Хашаловы 2:0 ахсаанынан хотон финалга таҕыста.

Ол аата, Арыйаан үһүс бириистээх миэстэҕэ суоттанар бөлөххө киирэн, салгыы күрэхтэһэр буолла. Кини бастаан Гиви Давидовины (Италия) кытта тустуоҕа. Онно хайалара кыайбыт – чемпионат боруонса мэтээлин иһин А.Хашаловы кытта киирсиэҕэ.

Оттон 65 киилэҕэ финалга тахсар иһин киирсиигэ көбүөр хаһаайына Кшиштоф Бьенковски – молдован Максим Сакулцаны 6:5 кыайда. Онон полякка сабырыйтарбыт Андрей Бекреневпыт болгарин Расимныын тустар буолла. Бу хапсыһыыга ким кыайбыт үһүс миэстэ иһин Сакулцанныын тустуоҕа.

Маны тэҥэ бүгүн 61 киилэҕэ кыттааччыларбыт күрэхтэһиини саҕалыыллар. Ол курдук, Эдуард Григорьев – И.Гуйдяны (Румыния), Владимир Егоров – А.Джелеби (Украина) кытта тустуохтара.

Уолаттарбытыгар ситиһиилээх күрэхтэһиини баҕарабыт!

Бүгүҥҥү финаллар:

57 кг Сулейман Атли (Турция) — Начын Монгуш (Россия)

65 кг Загир Шахиев (Россия) — Кшиштоф Бьянковски (Польша)

70 кг Туран Байрамов (Азербайджан) — Исраил Касумов (Россия)

79 кг Асхарбек Гулаев (Словакия) — Сайфедин Алекма (Франция)

97 кг Алихан Жабраилов (Россия) — Сулейман Карадениз (Турция).

Чемпионат биһиги бириэмэбитинэн киэһэ 18:30 чаастан саҕаланар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *