Варшава-2021: Сэрэбиэй тугу түстээтэ?

Азия чемпионатыгар Айаал Лазаревпыт сэргэхситтэ. Аны бүгүҥҥүттэн Польшаҕа, Европа көҥүл тустууга чемпионата саҕаланар. Онно биэс бөҕөспүт кыттар: белорус Арыйаан Тютрин, македонец Владимир Егоров, поляк Эдуард Григорьев, румын Николай Охлопков уонна белорус Андрей Бекренев.

57 кг. Быйылгыттан Беларусь Республикатын чиэһин көмүскүүр Арыйаан Тютрин – Европа чемпионатыгар бастакы сүрэхтэниитэ. Сетканы көрдөххө, бу ыйааһыҥҥа уон биир бөҕөс сэрэбиэйи ааспыт. Онуоха, “хараҕа суох сэрэбиэй”, барыллааһын ааҕыынан бу ыйааһыҥҥа саамай бастыҥ бөҕөстөрү, Тютриннаах Монгуһу аллараа бөлөххө бастакы эргииргэ көрүһүннэрбит. Туох буолуой, син биир буоллаҕа дии. Эрдэ, эбэтэр хойут син биир көрсүөхтээхтэр дии саныыбын.

Начын Монгуш туһунан эттэххэ, кини Тыва тустууга оскуолатын иитиллээччитэ. Эдэрдэргэ Россия уонна Европа күрэхтэһиилэрин кыайыылааҕа буола сылдьыбыта. Соторутааҕыта Улан-Удэҕэ ыытыллыбыт Россия чемпионатыгар үчүгэй өйдөбүлү хаалларан, Завур Угуев кэнниттэн иккис миэстэлэммитэ.

Бу ыйааһыҥҥа өссө турок Сулейман Атли, болгарин Микяй Наим курдук күүстээхтэр бааллар. Кинилэр үөһээ бөлөххө киирбиттэр.

61 кг. Манна 16 кыттааччы сэрэбиэйи ааспыт. Биһигиттэн – иккиэлэр, иккиэн тус-туспа бөлөхтөргө түбэспиттэр. Европа-2019 чемпионатын призера Владимир Егоров украинец Андрей Джелеби, студеннарга аан дойду чемпиона буола сылдьыбыт Эдуард Григорьев румын Иван Гуйдяны кытта тустар буолбуттар. Уолаттарбыт утарсааччылара – наһаалара суох диэххэ сөп, барыта бу күҥҥэ ким хайдах бэлэмнээҕиттэн тутулуктаах.

Манна даҕатан эттэххэ, Владимир Егоровпыт бөлөҕөр Бека Ломтадзе (Грузия), Ахмеднаби Гварзатилов (Азербайджан), оттон Эдуард Григорьевка – Аббас Магомедов (Россия), Георгий Вангелов (Болгария) курдук күүстээх бөҕөстөр бааллар.

65 кг. Бу ыйааһыҥҥа эмиэ икки уоллаахпыт, иккиэн биир бөлөххө түбэспиттэр.  Николай Охлопков (Румыния) — Исмаил Мусукаев (Венгрия), Андрей Бекренев (Беларусь) — Кшиштоф Бьенковски (Польша). Бу сарсыарда ватсаапка, Мусукаев тустубат үһү диэн биллэрии тарҕанна. Киэһээ көрдөхпүтүнэ – итэҕэйиэхпит.

Дьэ, ити курдук, бүгүҥҥүттэн саҕаланар көҥүл тустууга Европа чемпионатыгар бөҕөстөрбүт кимнээҕи кытта маҥнай тустар буолбуттарын кылгастык билиһиннэрдэххэ. Чемпионат хаамыытын тута билиэххитин баҕарар буоллаххытына, dzulurgan.ru сайты кэтии сылдьыҥ.

Бу күннээҕи тустууларга, Айаал Лазарев Азия чемпионатын үрүҥ көмүс призера буолан бырааттарыгар суолу аста. Онон мэтээли кэтэһэбит!

Чемпионат биһиги бириэмэбитинэн киэһэ 18 чаас 30 мүн. саҕаланар. Бүгүн — 57, 65, 70, 79, 97 кг ыйааһыннаахтар тусталлар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *