Варшава-2021: Атыттар хайдах кытталларын кэтииргэ күһэлиннибит

Польша киин куоратыгар көҥүл тустууга Европа чемпионата саҕаланна. Бу күн саха тустууга кыһатыттан үс уол кытынна. Хомолтолооҕо диэн, уолаттарбыт үһүөн хотторон кэбистилэр.

Ол курдук, Арыйаан Тютрин (57 кг) – Начын Монгушка (Россия) 6:7, Андрей Бекренев (65 кг) – Кшиштоф Бьенковскайга (Польша) 3:6, Николай Охлопков (65 кг) – Максим Сакулцаҥҥа (Молдова) 10:11 ахсаанынан хоттордулар. Аан дойду уонна Европа чемпионатын призера Исмаил Мусукаев (Венгрия) ыалдьыбыт буолан, тустубата. Онон Охлопков быһа кыайыыны суруммута.

Саҕалааһын дьэ итинник. Дьиҥэ, бэйэлэрин кыахтарын туһамматылар. Көрдөххө, урукку тустар таһымнарыгар тиийбэт тустуулары көрдөрдүлэр. Онон аны салгыы уолаттарбытын кыайбыт бөҕөстөр хайдах кытталларын кэтиибит. Баҕар биир эмэ уолбут боруонса мэтээли тутан хаалыа диэн. Холобур, Монгуш финаллаатаҕына – Тютриҥҥа, Бьенковскайдаах Сакулцан финаллаатахтарына – Бекреневтаах Охлопковтан биирдэстэригэр салгыы «уоскутар» бөлөххө киирэн, саатар боруонсаҕа тарапачыһар кыах бэриллэр. Хайыаҥый, дьэ, оннукка тиийдибит.

Бүгүн биэс ыйааһын ыытыллыбытыгар, россияннартан түөрт киһи финал аҥаарыгар таҕыста. Арай, Россия саҥа чемпиона, хамаанда дебютана Малик Шаваев (79 кг) хотторон кэбистэ, грузин Ника Кенчадзеҕа. Азербайджан хамаандата бүгүн эмиэ түөрт полуфиналистаах.

Финал аҥарынааҕы хапсыһыыларга көрсүөхтэрэ:

57 кг

Начын Монгуш (Россия) — Афган Хашалов (Азербайджан)

Сулейман Атли (Турция) — Микай Наим (Болгария).

65 кг

Загир Шахиев (Россия) — Али Рахимзаде (Азербайджан)

Кшиштоф Бьенковски (Польша) — Максим Сакулцан (Молдова).

70 кг

Исраил Касумов (Россия) — Арман Андреасян (Армения)

Игорь Никифорюк (Украина) — Туран Байрамов (Азербайджан).

79 кг

Ника Кенчадзе (Грузия) — Ахсарбек Гулаев (Словакия)

Рашад Юсифли (Азербайджан) — Сайфедин Алекма (Франция).

97 кг

Алихан Жабраилов (Россия) — Радослав Баран (Польша)

Сулейман Карадениз (Турция) — Элизбар Одикадзе (Грузия).

Финал аҥарынааҕы хапсыһыылар биһиги бириэмэбитинэн түүн 01:00 чаастан саҕаланаллар.

«Дьулурҕан».  

Добавить комментарий

Ваш адрес email не будет опубликован. Обязательные поля помечены *