Валерий Петрович Керемясов сырдык кэриэһигэр…

Дьокуускай куорат физическэй култуураҕа уонна спорка управлениетын, тустууга федерациятын көҕүлээһиннэринэн “Триумф” Спорка бэлэмнэнии киинин сүрүн саалатыгар икки көбүөрүнэн Валерий Петрович Керемясов кэриэһигэр көҥүл тустууга эр дьоҥҥо Дьокуускай куорат аһаҕас чемпионата ыытылла турар.

Чемпионакка барыта 91 бөҕөс кыттар. Күрэхтэһиини үөрүүлээхтик аһыыга Дьокуускай куорат баһылыгын эбээһинэһин толорооччу Евгений Григорьев, В.П. Керемясов аймахтарын аатыттан Айтал Керемясов, чемпионат кылаабынай судьуйата Станислав Афанасьев кыттыыны ыллылар, Валерий Петрович туһунан ахтан, санаан ыллылар, түһүлгэ кыттыылаахтарыгар ситиһиилээх тустууну баҕардылар.

Эбиэт иннинээҕи тустуулар түмүктэринэн түөрт ыйааһыҥҥа финалистар ааттара билиннэ.

Финалга таҕыстылар:

57 кг Петр Копылов – Алексей Копылов

65 кг Кирилл Павлов – Ньургун Александров

74 кг Николай Сивцев – Виктор Рассадин

86 кг Артур Дьяконов – Герман Устинов

Эбиэттэн киэһэ – 61, 70, 79, 92, 125 кг ыйааһыннарга барыллааһын уонна финалга тахсар иһин тустуулар буолуохтара. Финаллар киэһэ 19:00 чаастан саҕаланаллар. Быһаарыылаах хапсыһыылары «Саха» НКИХ телевизорынан быһа көрдөрүөҕэ.

Валерий Петрович Керемясов 1959 сыллаахха төрөөбүтэ. Көҥүл тустууга ССРС, хапсаҕайга Саха АССР спордун маастара, Российскай Федерация физическэй култуураҕа уонна спорка үтүөлээх үлэһитэ, ССРС профтехүөрэхтээһиҥҥэ туйгуна, Тулагы Киллэм уонна Чурапчы улууһун Алаҕар нэһилиэгин бочуоттаах гражданина.

Кини Дьокуускай куорат 3 №-дээх спортивнай оскуолатын тренеринэн, куорат көҥүл тустууга хамаандатын сүрүн тренеринэн үлэлээбитэ. Саха сирин сүүмэрдэммит хамаандатын кылаабынай тренеринэн ананан үлэлии сылдьыбыта.

Көбүөргэ ситиһиилэрэ: РСФСР (1988) чемпиона. Үс сыл (1984, 1986, 1988) 57 киилэҕэ ССРС чемпионатын алта күүстээхтэрин кэккэтигэр киирбитэ. Александр Медведь бирииһигэр норуоттар икки ардыларынааҕы турнир иккис призера (1987), Монголияҕа «Интернационал» турнир иккис призера (1989), Венгрияҕа буолбут норуоттар икки ардыларынааҕы турнир боруонса призера (1985), Дальнай Восток уонна Сибиир зонатын чемпиона (1987), Саха сирин чемпиона (1983, 1987), Манчаары аатынан Олоҥхо оонньууларын хапсаҕайга чемпиона (1999).

Тренердэрэ – Дмитрий Петрович Коркин, Александр Николаевич Иванов.

В.П. Керемясов 2016 сыллаахха Белоруссияҕа үөрэтэр-эрчийэр түмсүүгэ сылдьан массыына саахалыгар түбэһэн, сырдык тыына быстыбыта. Кинини кэриэстээн «Кэрэ Киһи Валерий Кэрэмээһэп» диэн кинигэ Л.П. Керемясова, Т.В. Керемясова бэлэмнээһиннэринэн 2018 сыллаахха бэчээттэнэн таһаарыллыбыта. 2018 сылтан Дьокуускай куорат көҥүл тустууга улахан дьоҥҥо чемпионата Валерий Петрович Керемясов аатынан ыытыллар.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *