Бөҕөстөрбүт үһүөн мэтээллээхтэр!

Македония Скопье куоратыгар бэтэрээн спортсменнар көҥүл тустууга аан дойдуга биирдиилээн бастыыр иһин чемпионаттара ыытылла турар. Эрдэ иһитиннэрбиппит курдук, быйылгы чемпионакка Саха сириттэн үс бөҕөс кытынна. Үөрүүлээҕэ баар, кинилэр үһүөн дойдуларыгар мэтээллээх эргиллэллэр. Бэҕэһээҥҥи сырдатыыбын салгыы суруйдахха, маннык.

Сергей Слепцов (62 кг) маҥнай американец Райаны 5:3, онтон украинец Илиметовы 11:4, салгыы узбек Абдурахмановы 3:2 ахсааннарынан кыайталаан, чемпион аатын ким ыларын быһаарсар бүтэһик хапсыһыыга молдован Борис Савваҕа 0:10 хотторон кэбиһэн, үрүҥ көмүс мэтээл хаһаайынынан буолла.

Вадим Данилов (70 кг) итальянец Кариерины кытта киирсиитэ судургута суох буолла. Ахсааннарыттан (2:2) көрдөххө сүрдээх тыҥааһыннаах, илистиилээх тустуу буолбут бадахтаах. Ол да буоллар, быраабыла быһыытынан, үөрүөхпүт иһин кыайыы биһиги бөҕөспүтүгэр тиксибит. Салгыы күрэхтэһиигэ Вадим болгарин Димитровы 10:4 уонна дьоппуон Морины 5:2 ахсааннарынан кыайан финалга тахсыбыт. Онно испанец Альварестыын көрсүһүүтүгэр, очукуонан ыраастык хотторон кэбиһэн, пьедестал иккис үктэлигэр таҕыста.

Оттон Петр Осипов (78 кг) бастакы эргииргэ американец Килиһы 9:6 кыайан баран, турок Абига 6:8 ахсаанынан сабырыйтаран кэбиспит. Салгыы турок утарсааччыларын кыайталаан, финалга таҕыста уонна олохтоохтор эрэллэрэ Шабанины кытта тустар буолла. Оттон биһиги бөҕөспүт боруонса мэтээл иһин афганец Хатибины кытты тустуохтаах этэ да, утарсааччыта көбүөргэ тахсыбакка, кыайыы Осиповка быһа бэрилиннэ. Онон Таатта бөҕөһө боруонса мэтээлинэн наҕараадаланна.

Былырыын Пловдивка (Болгария) ыытыллыбыт маннык чемпионакка алта бөҕөспүт кыттан, биирдэрэ даҕаны мэтээлгэ тиксибэтэх эбит буоллаҕына, быйыл үс бөҕөспүт кыттан – үһүөн мэтээлгэ тиксибиттэрэ ситиһии быһыытынан ааҕыллыахтаах. Саха сирэ тустуулаах республика буоларын бу даҕаны көрдөрүү туоһулуур.

Чемпионат биир саамай улахан ааттаах-суоллаах кыттааччытынан 1996, 2000 сс. Олимпиада призера, аан дойду икки, Европа биэс төгүллээх чемпиона, 46 саастаах Лука Куртанидзе (Грузия) буолла. Кини сэрэйиллибитин курдук, бэйэтин ыйааһыныгар кыайыылааҕынан таҕыста. Ити курдук, 1983, 1985 сс. Арсен Фадзаев кэнниттэн аан дойду чемпионатыгар иккис миэстэлэри ыла сылдьыбыт Буяндергел Болд (Монголия) “Е” дивизиоҥҥа 100 кг ыйааһыҥҥа чемпион аатын ылла. 1991 сыллаахха Европа чемпионатыгар 68 киилэҕэ боруонса мэтээли ылбыт Жак Санторо (Франция) эмиэ ити дивизион 78 кг ыйааһыныгар кыһыл көмүс мэтээлинэн наҕараадаланна. Өссө бүгүн “А” дивизиоҥҥа Олимпиада-2012 призера венгр Габор Хатош (санатан эттэххэ, соторутааҕыта Д.П. Коркин турнирын кыттыылааҕа), аан дойду үс төгүллээх чемпиона армянин Араик Геворкян курдук биллиилээх бөҕөстөр кыттыыны ылаллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *