Бөҕөстөрбүт – тустуу аан дойдутааҕы рейтинигэр

Тустуу аан дойдутааҕы түмсүүтэ (UWW) сырыы аайы улахан таһымнаах күрэхтэһиилэр кэннилэриттэн ыйааһыннарынан бастыҥ көрдөрүүлээх тустууктар рейтиннэрин оҥорор. Уонна ону күрэхтэһии тэрээһинигэр туһанар.

Балаһыанньа быһыытынан, хас биирдии бөҕөскө күрэхтэһиитин таһымынан көрөн, хаһыс миэстэни ылбытыттан – туһааннаах очукуо ааҕыллар. Бүгүн, муус устар 22 күнүгэр көҥүл тустууга Европа чемпионата түмүктэннэ. Онуоха диэри саамай ыарахан ыйааһыҥҥа (125 кг) биһиги бастыҥ бөҕөспүт, боотурбут Айаал Лазарев – казах Олег Болтин уонна индус Сумит кэннилэриттэн үһүс киһинэн сылдьыбыта.

Онтон бүгүн күнүс рейтиҥҥэ, Европа чемпионатын түмүгүн ааҕыы кэнниттэн уларыйыы киирдэ. Ол быһыытынан рейтиҥҥэ биһиги бөҕөспүт 18 очукуолаах төрдүс буолла.

125 кг:

1.Олег Болтин (Казахстан) — 28

2.Сумит Сумит (Индия) — 21

3.Таха Акгуль (Турция) — 20

4.Айаал Лазарев (Кыргызстан) — 18

5.Сергей Козырев (Россия) — 18

6.Доржханд Худербулга (Монголия) — 16

7.Амин Тахери (Иран) — 16

8.Гено Петриашвили (Грузия) — 16

9.Александр Хоцяновскай (Украина) — 16

10.Амарвир Дхеси (Канада) – 14.

Саха тустуутун историятыгар ыарахан ыйааһыҥҥа маннык көрдөрүү урукку өртүгэр хаһан даҕаны суоҕа. Санатан эттэххэ, уһун сыллаах дьаныардаах эрчиллии түмүгэр аҥардас быйыл кыһыҥҥы кылгас кэмҥэ Айаал Лазарев – Москва Кубогар уонна Азия чемпионатыгар — иккис, Аан дойду биирдиилээн Кубогар, Олимпиадаҕа сүүмэрдиир Азиятааҕы квалификационнай турнирга – үһүс бириистээх миэстэлэргэ тахсан, биир кэм таһымҥа сылдьарын итэҕэттэ.

Аны кини, тренерэ – Саха Республикатын уонна Российскай Федерация үтүөлээх тренерэ Иван Николаевич Сивцев салалтатынан ыам ыйын 6-9 күннэригэр Болгарияҕа буолуохтаах Олимпиадаҕа сүүмэрдиир аан дойдутааҕы квалификационнай турнирга кыттарга оҥостор. Бөҕөспүтүгэр туруоруммут сыалын-соругун ситиһэригэр баҕарыаҕыҥ!

Ити курдук, саҥардыллыбыт рейтиҥҥэ Европа чемпионатын боруонса призера Эдуард Григорьев (61 кг) 5-с, Европа чемпионатыгар бэһис миэстэлэммит Арыйаан Тютрин (57 кг) 14-с, Андрей Бекренев (65 кг) 10-с көрдөрүүлээхтэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *