Бүтүн Россиятааҕы турнир: Рингэҕэ сытыы киирсиилэр

“Кыайыы 50 сыла” Спорт дыбарыаһыгар Александр Иванович Федотов кэриэһигэр боксаҕа Бүтүн Россиятааҕы А категориялаах турнир бүгүн иккис күнэ. Санатан эттэххэ, турнирга Россия 24 регионуттан 90-ча боксер кыттар. Саха сирин чиэһин отучча боксер көмүскүүр.

Бэҕэһээ, турнир үөрүүлээх аһыллыытыгар Саха Республикатын Ил Дарханын уонна Бырабыыталыстыбатын дьаһалтатын салайааччы Афанасий Владимиров, СР Спорка миниистирэ Иннокентий Григорьев, СР боксаҕа федерациятын президенэ Петр Алексеев, А.И. Федотов кэргэнэ Марианна Ивановна уонна турнир техническэй делегата Баярто Раднаев – кыттааччылары уонна көрөөччүлэри күрэхтэһии саҕаламмытынан эҕэрдэлээтилэр, ким үчүгэй бэлэмнээх кыайарыгар баҕардылар.

Бу бэлиэ түгэҥҥэ сөп түбэһиннэрэн, физическэй култуура уонна спорт сайдыытыгар үтүөлээх дьону үбүлүөйдээх күннэринэн эҕэрдэлээһин, наҕараада туттарыы тэрилиннэ. Ол курдук, боксаҕа республикатааҕы спортивнай оскуола дириэктэрэ Максим Куприяновка – Саха Республикатын физическэй култуураҕа уонна спорка үтүөлээх үлэһитэ аат иҥэрилиннэ. Республика боксаҕа федерациятын вице-президенэ Георгий Явловскайга – Саха Республикатын Бочуотунай грамотата, оттон боксаҕа ССРС спордун маастарыгар кандидат, Бүтүн Россиятааҕы категориялаах судьуйа Гаврил Стручковка төрөөбүт Мэҥэ Хаҥалаһын улууһун өйдөбүнньүк бэлэҕэ туттарылынна.

Ити курдук, боксердар Николай Григорьевка уонна Күндүл Петровка – Россия спордун маастардара буолалларын туоһулуур докумуоннар туттарылыннылар.

Дьэ, ол кэнниттэн рингэҕэ сытыы киирсиилэр саҕаланнылар. Бастакы киирсиилэри көрдөххө, ыалдьыттарбыт күүстээх састаабы аҕалбыттар. Кинилэр ортолоругар, турнир комментатора, ССРС спордун маастара Александр Тыасытов иһитиннэрбитинэн, бэйэлэрин республикаларын уонна федеральнай уокуруктарын чемпионнара, элбэх Бүтүн Россиятааҕы уонна норуоттар икки ардыларынааҕы турнирдар кыайыылаахтара уонна призердара бааллар эбит.

Турнирга сүрүннээн эдэрдэр кытталлар. Маҥнайгы киирсиилэр кэннилэриттэн Бурятия, Калмыкия, Новосибирскай, Красноярскай, Кабардино-Балкария боксердара үчүгэй бэлэмнээхтэрин көрдөрдүлэр.

Бастакы эргииргэ биһиги боксердарбытыттан Виталий Стручков (60 кг), Артур Миронов, Сергей Семенов (64 кг), Вадим Гадимов, Арчын Пустоляков (69 кг) уо.д.а. кыайыыны ситистилэр.

Санатан эттэххэ, бүгүн, олунньу 20 күнүгэр барыллааһын киирсиилэр 15:00 чаастан саҕаланаллар.

Петр ПАВЛОВ.

Ааптар хаартыскаҕа түһэриитэ.

 

Добавить комментарий

Ваш адрес email не будет опубликован. Обязательные поля помечены *