Бүгүҥҥүттэн Кемеровоҕа тустуу

Бүгүҥҥүттэн, балаҕан 22 күнүттэн Кемерово куоракка көҥүл тустууга “Шахтерская слава” норуоттар икки ардыларынааҕы VI турнир саҕаланар. Интэриэһинэйэ диэн баар, тэрийээччилэр күрэхтэһиини Тустуу аан дойдутааҕы түмсүүтүн (UWW) билиҥҥи балаһыанньатынан үс күн буолбакка, икки күн ыытарга быһаарыннылар. Ол аата, бүгүн, бастакы күн бары ыйааһыннарга барыллааһын хапсыһыылар ыытыллаллар. Сарсын – финаллар.

Саха сириттэн бу турнирга Арыйан Тютрин, Алексей Копылов (57 кг), Ньургун Александров, Георгий Кычкин, Артем Ефремов, Николай Охлопков (61 кг), Дьулустан Булатов (65 кг), Тимур Николаев (70 кг), Ньургун Сергин (92 кг), Ион Болтунов (97 кг) кытталлар.

57 киилэҕэ 25 кыттааччы баар. Сэрэбиэй быһыытынан Россия үс төгүллээх боруонса призера Арыйан Тютрин маҥнай серб Александр Манчиһы кытта тустар. Онно кыайдаҕына Алексей Копылов — Роман Лазарев (Кемерово) хапсыһыытын кыайыылааҕар тахсыаҕа.

Бу ыйааһыҥҥа Тамир Гармаев (Бурятия), Занданбуд Заназабар (Монголия), Махир Амирасланов (Азербайджан), Очир Дамдинов (Бурятия) курдук күүстээх бөҕөстөр бааллар.

61 кг ыйааһыҥҥа Румыния гражданствотын ылбыт Николай Охлопков тустуутун көрүөхпүт. Кини бастакы эргииргэ норуоттар икки ардыларынааҕы кылаастаах спорт маастара Рустам Ампары (С-Петербург) кытта тустуоҕа.

Ньургун Александров бурят Эрдэм Будажанаевтыын, Артем Ефремов казах Иристаевтыын, Георгий Кычкин тувин Тюлюштыын киирсиэхтээхтэр.

Чэ, бу суруйуу анныгар хас биирдии ыйааһын сетката бэриллэр. Онно ким кими кытта тустарын көрүөххүтүн сөп. Уолаттарбытыгар ситиһиини баҕарыахха. Сэрэбиэйи көрөн баран, бөҕөстөрбүт мэтээлгэ тиксэр кыахтаахтар диэн этиэххэ сөп. Сэмээр кэтэһэн көрүөххэ.

Бүгүн, Саха сирин бириэмэтинэн күнүс 12:00 чаастан бырагыраама быһыытынан турниры үөрүүлээхтик аһыы. Онтон 13:30 чаастан бары ыйааһыннарга барыллааһын хапсыһыылар. Киэһэ 20:00 чаастан финалга тахсар иһин киирсиилэр.

Сарсын, күнүс 14:00 чаастан “уоскутар” бөлөх тустуулара. Салгыы 15:00 чаастан – бүтэһик быһаарыылаах хапсыһыылар (финаллар), кыайыылаахтары наҕараадалааһын буолуоҕа.

PS: Бу сонун анныгар бэриллэр “Комментарийга” бэйэҕит санааҕытын суруйаргытыгар ыҥырабын.

One thought on “Бүгүҥҥүттэн Кемеровоҕа тустуу

  • 22 сентября, 2018 в 3:55 пп
    Permalink

    57 кг Алексей Копылов — Роман Лазаревы (Кемерово) 14:2, Арыйан Тютрин — А.Манчиһы (Сербия) 12:2 кыайдылар.
    61 кг Николай Охлопков — Рустам Ампары 12:6 хотто. Оттон Георгий Кычкин — тувин Тюлюшка 6:14 хоттордо.

    Ответ

Добавить комментарий

Ваш адрес email не будет опубликован. Обязательные поля помечены *