Бүгүҥҥүттэн Александр Медведь турнира

Бүгүҥҥүттэн, балаҕан ыйын 14 күнүттэн Белоруссия киин куоратыгар – Минскэйгэ, албан аатырбыт Александр Медведь бирииһигэр көҥүл тустууга норуоттар икки ардыларынааҕы Гран-при турнир саҕаланар. Биллэрин курдук, бу турнир син эмиэ Иван Ярыгин, Вахтанг Балавадзе, Яшар Догу турнирдарын курдук, Тустуу аан дойдутааҕы түмсүүтүн (UWW) быһаарыытынан рейтиннээх күрэхтэһиилэр ахсааннарыгар киирбитэ. Ол аата, бу турнирдар түмүктэринэн оҥоһуллубут рейтинг көмөтүнэн аан дойду чемпионатыгар ыйааһыннарынан бастыҥнары араартыахтара.

Минскэй көбүөрүгэр бүгүн саха тустууга кыһатын түөрт иитиллээччитэ кыттыаҕа: Владислав Андреев, Ньургун Скрябин (иккиэн – Белоруссия), Владимир Егоров (Македония), Михаил Иванов (Россия).

57 кг уон кыттааччы баар. Сэрэбиэй быһыытынан бастакы эргииргэ Владислав Андреев-Владимир Егоров бэйэ-бэйэлэрин кытта тустар буолбуттар. Оттон Михаил Иванов Европа быйылгы чемпиона Георгий Эдишерашвилины (Азербайджан) кытта киирсиэҕэ. Уолаттарбыт үһүөн үөһээ бөлөххө киирбиттэр. Онон эрдэлээн эттэххэ, кырата биир мэтээл баар диэххэ сөп. Сэрэйдэххэ, финалга тахсар иһин киирсиигэ Андреев-Эдишерашвили көрсөллөрө буолуо.

Оттон аллараа бөлөххө бары да тэҥ баайыылаах бөҕөстөр түбэспиттэр. Украинецтар Аракелян, Маркович, россияннар Садулаев, Бадрудинов, “белорус” Ринчинов. Хайалара финалга тахсарын быһа бааччы этэр уустук.

65 киилэҕэ 15 бөҕөс күөн көрсүө. Онуоха биһиги эрэлбит Ньургун Скрябин сеткаҕа бастакы нүөмэринэн туруоруллубут. Ол аата, квалификацияҕа кыттыбакка, Абдуразаков (Кыргызстан) – Эмеев (Россия) кыайыылааҕын кытта бастакы эргииргэ тустуоҕа. Уолбут бөлөҕөр өссө украинец Василь Шуптар, белорус Георгий Колиев, россиянин Гамлет Рамонов курдук биллэр бөҕөстөр бааллар. Билгэлээһин быһыытынан сэрэнэ соҕус эттэххэ, Ньургун төһө баҕарар киирсэр дьоно. Чэ, ону көбүөр көрдөрүө.

Аллараа бөлөххө россиянин Ислам Дудаев, американец Маккена, азербайджанец Хаджи Алиев, турок Килисчалаян курдук күүстээхтэр бааллар. Манна сэрэйдэххэ, Европа буруолуу сылдьар чемпиона Хаджи Алиев финалга тахсара буолуо.

Күрэхтэһии бүгүн биһиги бириэмэбитинэн күнүс 16:30 чааска саҕаланар. Видеонан быһа биэриини манна көрөөрүҥ: https://unitedworldwrestling.org/even/medved-test-ev

Добавить комментарий

Ваш адрес email не будет опубликован. Обязательные поля помечены *