Бүгүн икки бөҕөспүт чемпионаты саҕалыаҕа 

Бүгүн, көҥүл тустууга Россия чемпионатыгар 70, 74 уонна 125 кг ыйааһыннаахтар күрэхтэһиини саҕалыыллар.

Онуоха 70 киилэҕэ биһигиттэн икки бөҕөс кыттыаҕа. Бу ыйааһыҥҥа барыта 42 киһи сэрэбиэйи ааста. Аны кинилэр сарсыарда медицинскэй көрүүнү уонна ыйааһыннаныыны барыахтаахтар. Уолаттарбыт иккиэн туспа бөлөхтөргө түбэспиттэр.

Дьокуускай куорат аһаҕас уонна Дальнай Восток федеральнай уокуругун чемпионаттарын призера Николай Сивцев бастакы бөлөххө финал 16/1-гэр, били ааспыт ыйга финалга көрсүбүт киһитэ – Булат Батоевтыын (Бурятия) тустуоҕа.

Оттон хамаанда саамай опыттаах бөҕөһө, бу чемпионакка бэлэмнэнэн Хасавюрка (Дагестан) анал эрчиллиини барбыт норуоттар икки ардыларынааҕы кылаастаах спорт маастара Виктор Рассадин – осетин Азамат Хадзараговы кытта киирсиэҕэ.

Бу ыйааһыҥҥа үрдүк рейтиннээхтэрин быһыытынан Руслан Жендаевы (Красноярскай) уонна Чермен Валиевы (Хотугу Осетия) үөһээ уонна аллараа бөлөхтөргө арааран туруорбуттар. Кинилэри тэҥэ күүстээхтэринэн өссө үөһээ бөлөхтөн Исраил Касумовы, Анзор Закуевы, аллараа бөлөхтөн Евгений Жебаевы ааттыахха сөп.

Атын икки ыйааһыҥҥа биһиги хамаандабыт кыттааччыта суох.

Бу чемпионат саамай үрдүк тыҥааһыннаах киирсиилэрэ 74 киилэҕэ буолаллара эрдэттэн биллэр этэ. Манна аан дойду иккилии төгүллээх чемпионнара Заурбек Сидаков (Хотугу Осетия), Магомедрасул Газимагомедов (Дагестан), аан дойду чемпиона Магомед Курбаналиев (Дагестан) уонна аан дойду Кубогын биирдиилээн бастыыр иһин күрэхтэһиитин кыайыылааҕа Разамбек Жамалов (Дагестан/Чечня) курдук чулуу тустууктар бааллар. Өссө Россия чемпионатын призердара Тимур Бижоевы (КБР), Никита Сучкову (Красноярскай) ахсаантан быраҕар сыыһа буолуо.

Дьэ, хайалара кыайар? Кырдьык да, бэрт сытыы тыҥааһыннаах хапсыһыылары көрүөхпүт.

Бүгүҥҥү хапсыһыылар Саха сирин бириэмэтинэн күнүс 12:00 чаастан саҕаланаллар.

Петр ПАВЛОВ.    

Добавить комментарий

Ваш адрес email не будет опубликован. Обязательные поля помечены *