Бэтэрээн бөҕөстөргө аан дойду чемпионатыгар

Бу күннэргэ Македония Скопье куоратыгар көҥүл тустууга бэтэрээннэр аан дойду үрдүнэн биирдиилээн бастыыр иһин чемпионаттара ыытылла турар. Эрдэ иһитиннэрбиппит курдук, Саха сириттэн бу чемпионакка үс бөҕөс кыттар. Ол курдук, хапсаҕай маастара Петр Осипов (78 кг), көҥүл тустуу уонна хапсаҕай маастара Сергей Слепцов (62 кг) уонна хапсаҕай маастара Вадим Данилов (70 кг). Бөҕөстөрбүт үһүөн 50-55 саастаахтар “Д” дивизионнарыгар кытталлар.

Бөҕөстөр саастарынан араарыллыбыт биэс бөлөххө барыта 30 кэмпилиэк мэтээл иһин күөн көрсөллөр.

Сергей Слепцов кыттар 62 кг ыйааһыныгар 14 кыттааччы баар. Кинилэртэн эдэригэр балачча ситиһиилээхтик туста сылдьыбыт бэтэрээннэргэ аан дойду хас эмэ төгүллээх чемпиона Борис Савваны (Молдова) чорботуохха сөп. Ону тэҥэ, былырыыҥҥы чемпионат боруонса призерун бурят Баир Очировы, монгол Мягмары, узбек Абдурахмановы бэлиэтиэххэ сөп.

Биһиги маастарбыт Сергей Слепцов бастаан сэрэбиэй быһыытынан квалификацияҕа американец Райаны кытта тустар.

Вадим Данилов (70 кг) ыйааһыныгар кыттааччылар 16-лар. Ааттарыттан-суолларыттан көрдөххө, бары биир баайыылаах, таһымнаах тустууктар. Ол эрээри, үгэс быһыытынан этиллэринэн “ким үчүгэй бэлэмнээх, ким уһун тыыннаах, ким кыайыыга дьулуурдаах – ол кыайыаҕа”.

Вадим Данилов бастакы утарсааччыта итальянец Карьери. Кинилэр финал 8/1-гэр тусталлар. Сэрэбиэйи көрдөххө, ити хапсыһыы кыайыылааҕа испанец Альварес уонна Обраджа (Косово) пааратын кыайыылааҕар тахсар буолуохтаах.

Петр Осипов ыйааһыныгар 11 кыттааччы баар. Биһиги бөҕөспүт маҥнай, финал 8/1-гэр американец Килиһы кытта тустар.

Дьэ, кылгастык билиһиннэрдэххэ итинник. Бэтэрээн-бөҕөстөрбүтүгэр ситиһиини баҕарыахха уонна сэмээр үчүгэй сонуну кэтэһиэххэ!

Петр ПАВЛОВ.

Добавить комментарий

Ваш адрес email не будет опубликован.