Бэрдьигэстээх сайдар, киэркэйэр

//Манчаары-2021

Бары билэргит курдук, быйыл сайын от ыйын 6-11 күннэригэр Горнай улууһун Бэрдьигэстээх сэлиэнньэтигэр спорт национальнай көрүҥнэригэр “Манчаары оонньуулара” XXI спартакиада ыытыллыаҕа. Бу улахан таһымнаах күрэхтэһии тэриллиитэ өссө 2017 сыллаахха Саха Республикатын Ил Дарханын дьаһалынан быһаарыллыбыта.

Горнай улууһа билигин хаһааҥҥытааҕар даҕаны сэргэхтик олорор. Тоҕо диэтэргит, аны сайын улуус киинигэр Бэрдьигэстээххэ спорт национальнай көрүҥнэригэр “Манчаары оонньуулара” спартакиада ыытыллаары турарынан, туох баар хамсааһын, үлэ-хамнас барыта онно туһуланар. Улуус экономиката да, тутуу, суол-иис, сибээс сайдыытыгар сүрдээх элбэх үлэ ыытылынна, ыытылла да турар. Дьокуускай – Бэрдьигэстээх суола биллэрдик тупсубут, урукку курдук буор суолунан буолбакка, билигин асфальт суолунан түргэнник сыыйылыннаран тиийэҕин.

“Үлэ барыта былааннаахтык баран иһэр”

Горнай улууһугар тиийэ сылдьан үгэһинэн бастаан олохтоох хаһыат редакциятыгар тиийэн, буолаары турар Манчаары оонньууларын сырдатыы хайдах быһыылаахтык бара турарын билистим. “Үлэ күүһэ” хаһыат республикаҕа биир үчүгэй үлэлээх хаһыатынан биллэр. Манна аҥардас хаһыат эрэ бэчээттээһининэн дьарыктамматтар, ону тэҥэ араас кинигэлэри, ыйынньыктары, халандаардары оҥорон таһаараллар. Аны суруналыыс тэриллэринэн баай экспонаттаах музейдаах.

“Үлэ күүһэ” хаһыат корреспондена, Саха Республикатын Бэчээтин туйгуна Вячеслав Васильевич Алексеев:

-Биһиги хаһыаппыт, хайа күн Горнайга Манчаары оонньуулара ыытыллар буолбута биллибититтэн саҕалаан сырдатыы, нэһилиэнньэҕэ билиһиннэрии үлэтин күүскэ саҕалаабыта. Бары ыытыллар тэрээһиннэри, бара турар үлэлэри былааннаахтык барытын дьоҥҥо тиэрдэ сатыыбыт. Иккиһинэн, оонньууларга аналлаах бэчээтинэй бородууксуйаҕа ылсан үлэлэһиэхтээхпит. Баар оборудованиебытын үлэлэтэн, бэйэбит кыахпытынан оонньуу эмблематын, логотивын туһанан футболкалары, наклейкалары, араас сувенирдары оҥоруохтаахпыт.

Нэһилиэнньэ хаһыаты ааҕан уонна интернет ситимиттэн билэн, Манчаары оонньуулара Горнайга ыытылларынан ылсан эрэрэ уонна бары тэрээһиннэргэ көхтөөхтүк кыттыһара, үлэлэһэргэ баҕалааҕа үөрүүлээх. Үлэ барыта былааннаахтык баран иһэр дии саныыбын. Оонньуу кэмигэр күн аайы Дневник бэчээттээн таһаарарга былаанныыбыт. Сырдатыы үлэтигэр син биир ылсабыт. Бары аккредитацияны барыахтаахпыт, форманан эҥин хааччыйыахтаахтар. Вакцинабытын бары ылыахтаахпыт. Манчаары оонньууларыгар бэлэмнэнии билигин тэрээһиннээхтик бара турар. Тутуу бөҕө ыытылынна. Спортивнай саалабыт бүтэн үлэҕэ киирдэ. Спортсменнар олорор дьиэлэрэ эмиэ түмүктэнэн эрэр. Дьон санаата күүстээх уонна көхтөөхтүк кыттыахтара диэн эрэнэбит.

Биһиги редакциябыт үлэһиттэрэ сүрүннээн эдэрдэр. Кылаабынай редакторбыт – Күннэй Васильевна Алексеева хаһыат эйгэтигэр үлэлээбитэ ыраатта. Нэһилиэнньэбит ахсааныгар үллэрдэххэ, хаһыаты суруттарыыга республикаҕа инники күөҥҥэ сылдьабыт. Хаһыаппыт тираһа хаһааҥҥытааҕар даҕаны үрдээн турар. Билигин нэдиэлэҕэ биирдэ аҕыс балаһанан тахсабыт. Хаһыаты таһынан анал сайтаахпыт. Нэһилиэнньэ олоҕун-дьаһаҕын сырдатыыга үлэ көхтөөхтүк бара турар диэххэ сөп.

Итини тэҥэ редакция уонна улуус бүттүүнүн күүһүнэн Горнай спордун историятын туһунан кинигэ бэлэмнэнэ  сылдьар эбит. Кинигэни “Үлэ күүһэ” хаһыакка өр сылларга ситиһиилээхтик үлэлээбит кылаабынай редактор, Саха Республикатын Бэчээтин туйгуна Василий Ильич Алексеев иилээн-саҕалаан оҥорор.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *