Бэйэтин сыратынан тахсыбыта

/// “Дьулурҕан” саһарбыт страницатыттан      

Быйыл, Саха сирин бэчээтигэр спорду сахалыы тылынан сырдатан кэлбит “Дьулурҕан” хаһыат бэчээттэнэн тахсыбыта 20 сыла. Манан сибээстээн, хаһыат саһарбыт страницаларыттан үйэлээх, ааҕыллымтыа, олорон кэлбит историябытын кэрэһилиир диэбит бастыҥ суруйуулары, очеркалары http://dzulurgan.ru сайтка сөргүтэн, ааҕааччыларга өссө төгүл санатабыт. 

Бүгүн, кулун тутар 21 күнүгэр көҥүл тустууга ССРС спордун маастара, Саха сирин чемпиона, Россия чемпионатын үрүҥ көмүс призера Егор Красильников төрөөбүт күнэ, кини 53 сааһын туолла. Манан сибээстээн, Чурапчыттан суруналыыс Платон Коркин “Дьулурҕан” хаһыакка 2001 сыллаахха олунньу 16 күнүгэр бэчээттэппит ахтыытын билиһиннэрэбит.

Бэйэтин сыратын тахсыбыта

2001 сыл олунньу ыйыгар Чурапчы улууһун Мугудай нэһилиэгэр – Саха сирин, Россия биир күүстээх тустууга Егор Красильниковы улахан көбүөртэн атаарыы уонна оҕолорго кини аатынан республикатааҕы күрэхтэһии буолан ааста.

Мугудайтан бастакы көлүөнэ тустууктар, республика чемпионнара уонна призердара П.Николаев, И.Гуляев, Н.Пермяков, Д.Гуляев үүнэн тахсыбыттара. Егор Красильников бэйэтэ эрчиллэн, буһан-хатан, күүс-уох ылынан төрөөбүт-үөскээбит Мугудайын, Чурапчытын, республикатын спортивнай чиэһин улахан таһымнаах күрэхтэһиилэргэ ситиһиилээхтик көмүскээбит дьонтон биирдэстэрэ.

Тустуук быһыытынан Е.Красильников аата 1990 сылтан элбэхтик иһиллэр буолбута, оннооҕор омук сиригэр тахсыылаахтык кыттыбыта. Ол курдук, Грецияҕа, Англияҕа, Румынияҕа ыытыллыбыт норуоттар икки ардыларынааҕы турнирдарга, Россия иһинээҕи чемпионаттарга кыайыылаахтар ахсааннарыгар киирбитэ.

Уол улахан спорка элбэх сыратынан, кыайыыга дьулуурунан тахсыбыта. Киниэхэ ханнык даҕаны баартаах түгэн дуу, сэрэбиэй тосхойуута дуу көмөлөспөҕө. Ону Гоша тустубут биографията кэрэһилиир. Кини тустуу көбүөрүгэр аан бастаан 1981 сыллаахха тахсыбыта. Оччолорго Мугудай орто оскуолатыгар сэттис кылааска үөрэнэрэ. Тустууга уһуйбут киһитинэн, оччолорго Ленинградтан үрдүк үөрэҕи бүтэрэн кэлбит спорт маастарыгар кандидат С.И. Сивцев буолбута. Гоша киниттэн тустуу албастарыгар аан маҥнай үөрэммитэ, спортивнай сиэри-майгыны иҥэриммитэ. Орто оскуола кэнниттэн тустуук буолар баҕалаах буолан, Чурапчы сэлиэнньэтигэр көһөн кэлбитэ. Үчүгэй базалаах оҕо спортивнай оскуолатыгар үлэлии-үлэлии киэһэтин тренердэр: Р.В. Неустроев, Е.Д. Аржаков, В.Н. Алексеев салалталарынан эрчиллибитэ. Оччолорго Василий, Егор Алексеевтар, Александр Гоголев, Иннокентий Сыроватскай, Григорий Христофоров, Иннокентий Егоров кини ыйааһыныгар күннээн туста сылдьар кэмнэрэ этэ. Тустуук Егор Красильников бастакы сэмэй ситиһиилэрэ мантан саҕаламмыта.

Ситэ-хото тэнийэн тустубакка сылдьан армияҕа ыҥырыллан, Хабаровскайга сулууспалаабыта. Онон кини Чурапчыттан иккис разрядтаах киэҥ суолга аттаммыта. Манна тустарыгар үчүгэй усулуобуйа үөскээбитэ. Сулууспалыыр сылларыгар РСФСР үтүөлээх тренерэ С.Г. Голубка биллиилээх бөҕөстөрү кытта бииргэ эрчиллибитэ. Дальнай Востоктааҕы байыаннай уокурукка икки сыл кыра ыйааһыҥҥа иннин кимиэхэ да биэрбэтэҕэ. Хабаровскай кыраай күрэхтэһиитигэр иккис сыл бастакы-иккис миэстэлэри ылаттаабыта. 1987 сыллаахха “БАМ көбүөрэ” диэн Бүтүн Союзтааҕы турнирга иккис миэстэлэммитэ. Эһиилигэр Ерофей Хабаров аатынан Бүтүн Союзтааҕы турнирга бастакы миэстэни ылан, Советскай Союз спордун маастарын нуорматын толорбута. Ытык иэһин төлөөн баран дойдутугар кэлэн, Дьокуускайга олохсуйбута. Таптыыр тустуутунан тренер Е.Н. Старостин салалтатынан дьарыктаммытынан барбыта.

Егор Красильников тустарын көрбүт барыта кини кыайыыга ураты дьулуурун, үгүс албаһы туттан киирсэрин хайгыыллар. Ити хаачыстыбалар тустааччыга тута кэлбэттэр. Ону элбэх сыллаах эрчиллии, опыт уһаарар. Кини 1994 сыллаахха Н.Н. Тарскай бирииһигэр республика чемпионатыгар бастаабыта. Ити кэннэ республика  чемпионатыгар иккитэ иккис, үстэ үһүс миэстэлэри ылбыта. Өссө республика аччыгый чемпионатынан ааттанар Үрдүкү спортивнай маастарыстыба оскуолатын аһаҕас күрэхтэһиитигэр үс сыл бастаан турар.

Ол эрээри, тустуук Егор Красильников саамай үрдүк көрдөрүүтүнэн 1995 сыллаахха Пермь куоракка ыытыллыбыт Россия чемпионатыгар иккис миэстэҕэ тахсыбыта буолар. Итиннэ кини 48 киилэҕэ бэйэтин хамаандатын киһитэ Петр Юмшанов кэнниттэн пьедестал икки үктэлигэр тахсан, үрүҥ көмүс мэтээлинэн наҕараадаламмыта.

(Егор Красильников былырыын бэтэрээннэргэ республика чемпионатыгар тустуутун http://dzulurgan.ru сайт Ютуб канаалыгар, эбэтэр Видео рубрикатыгар киирэн көрөргүтүгэр).

Егор Семенович үчүгэй спортсмен эрэ буолбатах, кини “Водоканал” МУП слесара. Биригээдэҕэ биир бастыҥ үлэһит. Үлэлиир доҕотторун ортотугар сэмэй табаарыс быһыытынан ытыктанар. Иллээх дьиэ кэргэн амарах аҕата.

Киниэхэ уонна дьиэ кэргэнигэр үчүгэй үлэни, дьолу-соргуну, кытаанах доруобуйаны баҕарыаҕыҥ!

 “Дьулурҕан”. 2001 сыл, олунньу 16 күнэ.

 

Добавить комментарий

Ваш адрес email не будет опубликован. Обязательные поля помечены *