Бэйэм сыалбын толорбуппуттан олуһун үөрдүм

Ыам ыйын 11-17 күннэригэр Раменское куоракка олорон эрэн волейболга сылын аайы ыытыллар Россия чемпионата буолан ааста. Уопсайа дьахталларга 5 (Москва, Москва уоблаһа, Казань, Санкт-Петербург, Саха сирэ), эр дьоҥҥо 7 хамаанда (Свердловскай, Москва уоблаһа, Санкт-Петербург, Кемерово, Бурятия, Башкирия, Саха сирэ) кыттыыны ылла. Уолаттарбыт 5 миэстэ буоллулар.

Дьахталлар оонньууларын туһунан сиһилии соҕус кэпсиэхпин баҕарабын. Быйыл хамаандаҕа 9 кыттааччы (Амма, Үөһээ Бүлүү, Ньурба, Сунтаар, Дьокуускай, Мэҥэ Хаҥалас, Нам улуустарыттан) киирдэ. Чемпионакка 5 хамаанда кэлбит буолан, күрэхтэһиибитин икки кругтаатылар. Онон уопсайа 8-та оонньоотубут.

Бастакы күн Москва уоблаһын уонна Казань хамаандаларын кытары күөн көрүстүбүт. Москва уобалаһын хамаандата быйыл састааба кыра уларыйыылаах. Дьэ, кытаанах тыҥааһыннаах киирсии буолла ээ, 2:0 олорон, ситтэрэн ылан, уопсайа 5 партия оонньоон, 3:2 очконан кыайдыбыт.

Иккис күн Санкт-Петербург хамаандата. Бу хамаанда быйыл иккис сылын кыттар. Биһиги былырыыҥҥы Ччмпионакка барбатах буолан, хайдах хамаандатын билбэт этибит. Эмиэ тыҥааһыннаах киирсии түмүгүнэн (3:2) кыайдыбыт.

Үһүс күн – Москва уонна Москва уобалаһын хамаандаларын кытта оонньоотубут. Бу күн – хотторуу күнэ буолла.

Төрдүс күн – Казань уонна Санкт-Петербург хамаандаларын кытта кииристибит. Питер хамаандатын кытары эмиэ 3:2 оонньоон, ыллыбыт. Төрдүс партияҕа ырааҕынан быраҕан иһэн, хайдах эрэ сымнаан ылан (расслабись буолан хаалан дуу, хайдах эбитэ дуу), оонньууну биэрэн кэбистибит. Бэһиспитигэр, бачча ыраах сиртэн кэлэн баран, хайаан да мэтээл кэтэн барыахтаахпыт диэн хомуллан партиябытын ыллыбыт.

Бэһис күн Москва хамаандатын кытары оонньоотубут. Бу күн Санкт-Петербург уонна Москва уоблаһын хамаандалара оонньообуттара. Арай, Питер хоппута буоллар … биһиги иккис буоларбыт хаалла.

Ол эрэн, быйылгы сыал-сорук ситиһилиннэ, улахан тыас таһаардыбыт ээ. Биһиги, сахалар кыттар буолуохпутуттан ыла, чемпионат – дьиҥнээх күрэхтэһии курдук, олус тыҥааһыннаах, ыһыылаах-хаһыылаах, оннооҕор ытааһыннаах даҕаны буолар буолла. Санаан көрүҥ, утары хамаандаҕа бары ыалдьаллар, онтон биһиэхэ уолаттарбыт эрэ… Оннооҕор ханнык эрэ хамаанда эр дьоно уксаллар эҥин үһү (биир эрэ киһи Саха сирин хамаандата хомулуннаҕына ылыаҕа диэн эрэммит этэ).

Мин бэйэм сыалбын толорбуппуттан олуһун үөрдүм. Үс сыл тухары Москва уобалаһын хамаандатын биирдэ эмит кыайар киһи диэн санаалаах этим. Бастакы кругка кыайдахпыт дии. Учууталларым, миигин дьарыктыыр дьонум оонньуурбун көрөн эмиэ астыннылар: “Бэркэ подачанан кэһэттин, ол эрэн, Мособласть хамаандатын кыайар диэн сүрдээх”, — диэтэ убаастыыр, саамай опыттаах тренерым Андрей Тимофеевич.

Муус устар ыйдааҕы сборга сарсыарда эрдэ туран аһылык иннинэ 20-чэ мүнүүтэ подача биэрэргэ үлэлэспитим. Онтум түмүктээх эбит, таах мээнэҕэ үлэлээбэтэх эбиппин диэн үөрэ саныыбын. Улахан тренерым Александр Николаевич: «Ну, кто тебя заставлял подавать, а?!», — диэбитэ. Кини бөҕө буоллаҕа дии. Онон төһөнөн сыраҕын уураҕын да, оччонон үлэҥ түмүгэ кэлэрэ олус минньигэс буолар эбит. Быйылгы чемпионаты инстаграм нөҥүө быһа эфирга көрдөрөн, республикабыт олохтоохторо хайдах курдук таһымнаах оонньуу буоларын илэ харахтарынан көрдүлэр, астыннылар.

Түмүккэ, тренердэрбитигэр Константин Дмитриевич Гаврильевка, Эмма Эдуардовна Ивановаҕа, Республикатааҕы адаптивнай спорт киинигэр, сборнай хамаандалары бэлэмниир республикатааҕы кииҥҥэ, биһиэхэ ыалдьыбыт дьоҥҥо барыларыгар улахан махталбытын тириэрдэбит. Биллэн турар, хамаандам кыргыттарыгар эмиэ улахан махтал! Аны балтараа сылынан кэлэн биир сомоҕо буолан, эмиэ тыҥааһыннаах оонньууну көрдөрөргө!

Алена ДМИТРИЕВА, хамаанда капитана, Россия спордун үтүөлээх маастара.

Добавить комментарий

Ваш адрес email не будет опубликован. Обязательные поля помечены *