Быыстапка үлэтин саҕалаата!


Саха норуотун Аар саарга аатырдыбыт тренербит Дмитрий Петрович Коркин төрөөбүтэ 90 сылыгар анаан үс спорт маастара салайааччылаах “Строительнай” Атыы-эргиэн киинин Быыстапкалыыр саалатыгар “Коркинныы олоруохха! Коркинныы айыахха!” республикатааҕы быыстапка үлэтин саҕалаата.

Көрөөччүлэр кэрэхсэбиллэрин Чурапчытааҕы Д.П. Коркин аатынан Тустуу Албан аатын музейын (Н.Н. Гуляев, Е.В. Пудов) төрүттээччи Константин Сергеевич Постников 1985 сыллаахха бэйэтин илиитинэн оҥорбут экспонаттарыттан саҕалаан – саха тустуутун оскуолата Россия, Аан дойду, Олимпийскай оонньуу таһымыгар тахсыбытын туһунан; спорду сырдатааччылар Владислав Коротов, Петр Павлов, коллекционердар Платон Эверстов, Юрий Щукин; биллиилээх спортсменнар: ССРС спордун үтүөлээх маастара Василий Гоголев, норуоттар икки ардыларынааҕы кылаастаах спорт маастардара: Алексей Соловьев, Леонид Спиридонов, Андрей Яковлев, Прокопий Петров, Александр Контоев; спорт биллиилээх салайааччыта уонна тэрийээччитэ Михаил Друзьянов; ССРС физическэй култуураҕа уонна спорка туйгуна, Д.П. Коркин биир санаалааҕа Дмитрий Тимофеев; Саха Республикатын үтүөлээх тренерэ Николай Волков, Үөһээ Бүлүүтээҕи оҕо спортивнай оскуолатын дириэктэрэ Валерий Семенов, СР үтүөлээх тренерэ Афанасий Лугинов сэдэх экспозициялара ылыахтара. Ону тэҥэ Д.П. Коркин олоҕун аргыһа Александра Семеновна Дмитрий Петрович бочуотунай грамоталарын, сэдэх хаартыскаларын, үлэҕэ киниискэтин, Р.М. Дмитриев аатынан Олимпийскай эрэл училищетын, Уус-Алдан улууһун музейдарын быыстапкалара туруорулунна.


Бүгүн, балаҕан ыйын 4 күнүгэр спортивнай суруналыыс, “Дьулурҕан” хаһыат редактора Петр Павлов “Тустууга таптал хайдах үөскүүрүй?” тус бэйэтин быыстапкатын билиһиннэриитэ буолла. Быыстапкаҕа Р.М. Дмитриев аатынан Олимпийскай эрэл училищетын үөрэнээччилэрэ, спорду таптааччылар, спорт бэтэрээннэрэ кыттыыны ыллылар. Россия-1965 чемпиона, ССРС спордун маастара Петр Попов, СР волейболга федерациятын толорооччу дириэктэрэ Яков Сивцев, Россия Суруналыыстарын сойууһун чилиэнэ Иван Ушницкай, быыстапка продюсера, СР култууратын үтүөлээх үлэһитэ Татьяна Гоголева, норуоттар икки ардыларынааҕы кылаастаах спорт маастара Афанасий Заболоцкай – быыстапка үлэтин саҕалаабытынан эҕэрдэлээтилэр, инникитин үгэс быһыытынан тэриллэригэр баҕардылар.


Аны сарсын, балаҕан ыйын 5 күнүгэр күнүс 12:00 чаастан «Коркинныы олоруохха! Коркинныы айыахха!» республикатааҕы быыстапка үөрүүлээхтик аһыллыыта буолуоҕа. Ол кэнниттэн биллиилээх суруналыыс, СР Суруйааччыларын сойууһун чилиэнэ, “Киин куорат” хаһыат кылаабынай редактора Иван Ушницкай “Оо, Сахаачча, Сахаачча” кинигэтин үүнэр көлүөнэгэ анаан сүрэхтэниитэ ыытыллыаҕа.

Кэлиҥ, көрүҥ, сыаналааҥ!

Добавить комментарий

Ваш адрес email не будет опубликован. Обязательные поля помечены *