“Быыстапка сыллата тэриллэригэр баҕарабын”


Биһиги улуу тренербит Д.П. Коркин төрөөбүтэ 90 сылын бэлиэтээһин биир кэрэхсэбиллээх тэрээһининэн “Строительнай” Атыы-эргиэн киинин Быыстапкалыыр саалатыгар тэриллибит “Коркинныы олоруохха! Коркинныы айыахха!” диэн республикатааҕы быыстапка буолла.

Саха АССР үтүөлээх тренерэ, РФ физическэй култуураҕа үтүөлээх үлэһитэ, Д.П. Коркин Чурапчы интернат-оскуолатыгар өр сыл айымньылаахтык бииргэ үлэлээбит үөлээннээҕэ, улуу тренер туһунан музейы төрүттээччи – Константин Сергеевич Постников төрөппүт кыыһа, «Якутгазпром» тэрилтэ сэкиритээр-делопроизводителэ Саргылана Константиновна Постникова быыстапкаҕа аҕатын уонна дьиэ кэргэнинэн муспут коллекциятынан кытынна.

— Бу быыстапка тэриллибитэ наһаа үчүгэй. Наһаа сөхтүм. Тэрийээччи Татьяна Афанасьевна Гоголева хайаан да кыттаҕын, тугу эмэ аҕалан көрдөрүүгэ туруораҕын диэбитигэр, бастаан аҕам Константин Сергеевич Постников элбэх муспут хаартыскатынан кыттарым дуу диэн баран, аҕабыт 80 сылынан кинигэ таһаартарбыппыт, онно бэлэмнээбит ыстатыйаларынан кыттарга быһаарыммытым. Ону таһынан, Чурапчыттан ити саха тустууктара бэчээттэммит омук хаһыаттарын, вымпеллары, значоктары, кинигэлэри, альбомнары аҕаллым. Манна Белоруссия, Казахстан, Турция о.д.а. хаһыаттара бааллар. Кыра сылдьан бырааппынаан Леонидтыын, хаһыаттартан тустуу туһунан матырыйааллары кырыйан, ийэбит сүбэтинэн анал альбом оҥорор этибит. Дмитрий Петрович Коркин туһунан альбому эмиэ оҥорбуппут.

Леонид тустуу судьуйата буолуон баҕарара. Оҕо сылдьан тустар этэ. Кини кыра эрдэҕиттэн тустууну сөбүлүүр, туох баар күрэхтэһиилэри протоколлуура. Бэйэлэрэ кумааҕы тустууктары үрэн оонньууллара, онно быраатым протокол толорор. Ол тустууктара бары ааттаахтар. Аан дойду чемпионнарын ааттара барыта ол кумааҕы тустууктарын көхсүлэригэр сурулла сылдьара.

Бэрт интэриэһинэй, киэҥ далааһыннаах тэрээһин буолла. Тустуу туһунан элбэх афиша-плакаттары, значоктары, вымпеллары, мэтээллэри аҕалбыттарын киһи сэргии көрөр. Оннооҕор ыраах Үөһээ Дьааҥыттан тиийэ кэлбиттэр. Маннык быыстапка сыл ахсын буолара буоллар. Бу күннэргэ быыстапканы дьон бөҕө көрдө, сэҥээрдэ. Бу быыстапка кэнэҕэһин музей буолара буоллар диэн санаалаахпын. Татьяна Афанасьевна Гоголева сүрдээҕин үлэлэстэ. Саха дьоно тустууга эрэ буолбакка, спорт бары көрүҥнэригэр күүстээхтэр. Кинилэр бары маннык киэҥник көстөн иһэллэрэ буоллар диэн баҕа санаабын этэбин.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *