Бырааттыы Ноговицыннар XV турнирдара


Саха төрүт оонньуута – хапсаҕай Азияны ааһан, Европаны уҥуордаан аан дойду таһымыгар тахсыбытын аҥардас саха хапсаҕайдьыттарыттан сүүмэрдэммит Россия хамаандата кумахха тустууга аан дойду чемпионатыгар биирдиилээн да, хамаанданан даҕаны инники күөҥҥэ сылдьара арылхайдык көрдөрөр. Ону таһынан хапсаҕай – Тустуу аан дойдутааҕы түмсүүтүн (UWW) састаабыгар сир шарын национальнай тустууларыттан биир бастакынан киллэриллибитэ элбэҕи этэр.

Бу көрүҥмүт салгыы сайдарыгар сыл аайы Саха сирин араас муннуктарыгар элбэх күрэхтэһии тэриллэн ыытыллара олугу уурар. Хотугу улуустар хоһууннара күүстэрин холоһоллоругар республикатааҕы таһымнаах үс күрэхтэһии баар. Үөһээ Дьааҥы уолаттара – бырааттыы Ноговицыннар бириистэрэ, Өймөкөөҥҥө Савелий Оконешников, Томпоҕо Юрий Васильев, Кэбээйигэ Виктор Рожин турнирдара.

Бу турнирдартан уруккуттан ыытылларынан уонна элбэх кыттааччыны мунньарынан бырааттыы Ноговицыннар турнирдара чорбойор. Турнир 1998 сыллаахха аан бастаан ыытылларыгар эр дьоннуун уонна бэтэрээннэрдиин холбоон 78 бөҕөс кыттыбыта. Онтон сыл аайы киэҥ далааһыннанан, кыттааччыта элбээн, састааба күүһүрэн, кэнники түөрт турнирга аҥардас эр дьон алта ыйааһыныгар 2014 с. — 126, 2015 с. — 198, 2016 с. — 231, оттон былырыыҥҥы X турнирга 264 хапсаҕайдьыт кыттыбыта.

Турнир Аар Дарханнарын аатын саха аатырбыт хапсаҕайдьыттара: Максим Васильев, Анатолий Андреев, Ньургун Чукров, Александр Брызгалов, Святослав Татаринов, Дмитрий Валеев, Баир Укоев, Увар Тимофеев ылбыттара. Чурапчытааҕы физическэй култуура уонна спорт институтун үөрэнэн бүтэрбит Сиясат Исаев 2012 с. турнирга Аар Дархан аатын ылан, Азербайджан норуотуттан аан бастакынан хапсаҕайга Саха Республикатын спорка маастара буолбута. Манна даҕатан эттэххэ, аҥардас бырааттыы Ноговицыннар турнирдарыттан Үөһээ Дьааҥы 17 хапсаҕайдьыта СР спордун маастарын үрдүк аатын ылбыта. Дьааҥы бу 17 маастарын ситиһиилэрин уонна бырааттыы Ноговицыннар турнирдарын туһунан Саха сирин үтүөлээх тренерэ, Дьааҥы улууһун Бочуоттаах гражданина Петр Васильевич Портнягин кинигэтэ бэлэмнэнэн, 2018 сыл бүтүүтэ бэчээттэнэн тахсаары сылдьар.

Быйыл, Дьааҥыга Саха АССР үтүөлээх тренерэ Николай Михайлович Давыдов салалтатынан аһыллыбыт Оҕо спортивнай оскуолата төрүттэммитэ 50 сыла туолар. Онно сөп түбэһиннэрэн, бырааттыы Ноговицыннар хапсаҕайга республикатааҕы XV турнирдара бу дьыл сэтинньи 10-11 күннэригэр Дьокуускайга ыытыллара былааннанар. Урут да, быйыл даҕаны бу улахан турнир Дьааҥы улууһун дьаһалтатын, тэрилтэлэрин, Дьааҥыттан төрүттээх предпринимателлэр, бырааттыы Ноговицыннар дьиэ кэргэттэрин, кинилэр доҕотторун өйөбүлүнэн – үрдүк таһымнаахтык ыытыллааччы, көрөөччү уонна кыттааччы – киэҥ биһирэрбилин ылааччы.

Алексей МОСТАХОВ, СР хапсаҕайга федерациятын толорооччу дириэктэрэ.

Добавить комментарий

Ваш адрес email не будет опубликован. Обязательные поля помечены *