Былырыыҥҥы күрэхтэһии хайдах этэй?


Эрдэ сырдаппыппыт курдук, сэтинньи 10-11 күннэригэр Манчаары аатынан “Модун” спортивнай комплекска Бырааттыы Ноговицыннар бириистэригэр хапсаҕайга үрдүк таһымнаах XV республикатааҕы турнир ыытыллар. Быйылгы турнир бырааттыы Ноговицыннар убайдара – көҥүл тустууга ССРС спордун маастара Михаил Васильевич Ноговицын 65 сааһыгар ананар.

Манан сибээстээн, Бырааттыы Ноговицыннар бириистэригэр былырыыҥҥы күрэхтэһии хайдах этэй, диэн санатыахпытын баҕардыбыт. Ол туһунан Россия Суруналыыстарын сойууһун чилиэнэ Платон Эверстов “Дьулурҕан” хаһыакка бэчээттэппит матырыйаалын билиһиннэрдэххэ, 14-с республикатааҕы турнир сэтинньи 11-12 күннэригэр «Модун» спортивнай кииҥҥэ буолан ааспыта.

Күрэхтэһиини үөрүүлээхтик арыйыы кэмигэр спорт миниистирин бастакы солбуйааччы Семен Чердонов биллиилээх хапсаҕайдьыт Юрий Старостиҥҥа сэттис киһинэн Саха сирин бочуоттаах маастара буолбутун туһунан анал бэлиэни туттарбыта. Маны тэҥэ улуус баһылыга Г.И. Чириков Эҕэрдэ суруга «Триумф” Спорка бэлэмнэнии киинин дириэктэрин солбуйааччы, ССРС спордун маастара Михаил Васильевич Ноговицыҥҥа, полицейскайдарга аан дойду иккис призера буолан кэлбит Егор Рожиҥҥа, Эҥэ нэһилиэгин аатыттан көҥүл тустуу улуустааҕы федерациятын бэрэссэдээтэлэ С.А. Сивцев 20 тыһыынчаны, кумахха тустууга аан дойдуга миэстэлэспит Алексей Мигалкиҥҥа Элгэс нэһилиэгэ анаабыт 15 тыһ. солкуобайын биир дойдулаахпыт С.С. Габышев туттарбыттара. Алексейга өссө Адаптивнай спорт киинин дириэктэрэ А.С. Михайлова сыаналаах бирииһи уонна Махтал суругу туттарбыта.

Күрэхтэһиигэ барыта 264 хапсаҕайдьыт кыттыбыта. 55 киилэ ыйааһыннаахтарга Чурапчыттан эдэр тустуук Дмитрий Варламов чемпионнаан, газовай билиитэ, биэстэ эстэр саа хаһаайына буолбута итиэннэ Саха сирин хапсаҕайга спордун маастарын нуорматын толорбута. Күрэхтэһии түмүгүнэн алта чемпион – улуус дьаһалтата туруорбут 1000 долларын сэрэбиэй тардыбыттарыгар, сүрүн бириис эмиэ эдэр уолга түбэспитэ.

62 киилэҕэ 68 кыттааччыттан бастаабыт Владислав Петров тоҥорор камера хаһаайынынан буолбута. Саамай элбэх кыттааччылаах 70 киилэҕэ (78 тустуук) бастаабыт Бүлүүттэн Дмитрий Ущницкай «Түһүлгэ бастыҥ хапсаҕайдьытынан» ааттанан, 20 тыһыынчалаах сертификаты туппута. 80 киилэлээхтэргэ 37 кыттааччыттан биир дойдулаахпыт, Суордаахтан спорт маастара Роберт Сидоров эрэллээхтик бастаан, холодильник бириистэммитэ. Ону тэҥэ Дьааҥы хапсаҕайдьыттарыттан үрдүк көрдөрүүлэнэн, куоракка олорор Максим Эверстов анал бирииһин — 20 тыһ. сертификаты туппута. 90 киилэлээхтэргэ эдэр тустуук Никита Валеев бастакы миэстэни ылан, хапсаҕайга спорт маастарын нуорматын толорбута итиэннэ «Штиль» эрбии бирииһинэн наҕараадаламмыта. Саамай ыарахан ыйааһыннаахтарга Увар Тимофеев бастаан, бириис быһыытынан икки киһилээх тыынан бэлиэтэммитэ.

Ону тэҥэ «Түһүлгэ бастыҥ судьуйатынан» Геннадий Хабаров ааттаммыта, оттон “Бастыҥ быраҕыы» бирииһи Радик Слепцов туппута. Күрэхтэһиини үөрүүлээхтик түмүктээһин кэмигэр «Модун» спорт киинин дириэктэрэ, Ил Түмэн депутата И.Ю. Григорьев — Иван Васильевич Ноговицыҥҥа «Спорт национальнай көрүҥнэрин сайыннарыыга үтүөлэрин иһин», оттон Петр Васильевич Портнягиҥҥа «Спортивнай музейы тэрийиигэ үтүөлэрин иһин» бэлиэлэри туттартаабыта.

Күрэхтэһии тэрийээччилэрэ махтал тылларын: Үөһээ Дьааҥы улууһун баһылыга Г.И. Чириковка, Москва куоракка олорор К.К. Ильковскайга, нэһилиэк баһылыктарыгар В.П. Стручковка (Суордаах), Д.Д. Колесовка (Дулҕалаах), Е.М. Юмшановка (Боруулаах), А.В. Рожинаҕа (Табалаах), М.Е. Терешковаҕа (Эһэ Хайа), В.П. Слепцовка, дьааҥылар түмсүүлэрин куоракка салайар М.Е. Эверстовка, «Профстрой» дириэктэрэ А.А. Слепцовка, маны тэҥэ урбаанньыт доҕотторугар, аймахтарыгар И.С. Юмшановка, М.С. Пановка, В.Н. Васильевка, Г.А. Мартиросяҥҥа, Г.Г. Гороховка, С.В. Котельниковка, Г.А. Ноговицыҥҥа уонна А.Д. Николаеваҕа тиэрдэллэр.

Петр ПАВЛОВ.

Добавить комментарий

Ваш адрес email не будет опубликован.