Бу субуотаҕа, саҥа үйэҕэ Уус Алдан тустууга – сэттис чемпионата

Бу нэдиэлэ бүтүүтэ, чопчулаан эттэххэ, олунньу 8 күнүгэр субуотаҕа, Уус Алдан улууһун дьаһалтатын уонна тустууга федерациятын көҕүлээһининэн – Бороҕоҥҥо, Н.Н. Тарскай аатынан спортивнай комплекска, ХХI үйэҕэ көҥүл тустууга сэттис төгүлүн улуус чемпионата тэриллэр.

Биирдиилээн уонна хамаанданан бастыыр иһин чемпионат хаһыс даҕаны сылын улуустааҕы комплекснай спартакиада чэрчитинэн ыытыллар буолан – сүрдээх хатыһыылаах, тыҥааһыннаах уонна көҕүтүһүүлээх. Нэһилиэктэр номнуо ох курдук оҥосто, тэринэ сылдьаллар. Хамаанданан кыайыылаахтар кубоктарынан уонна дипломнарынан наҕараадаланыахтара. Ону таһынан, “Бастыҥ бөҕөс”, “Кыайыыга дьулуурун иһин”, “Бастыҥ хапсыһыы иһин” диэн анал бириистэр оонньонуохтара. Оттон биирдиилээн ыйааһыннарга бастаабыттар уонна иккис-үһүс миэстэлээхтэр грамоталарынан, мэтээллэринэн уонна харчынан бирииһинэн бэлиэтэниэхтэрэ.

Санатан эттэххэ, былырыыҥҥы улуус чемпионатын кыайыылаахтарынан буолбуттара: 57 кг – Айаал Белолюбскай (Кэптэни), 61 кг – Арыйаан Тютрин (Суотту), 65 кг – Виталий Эспек (Тумул), 70 кг – Петр Павлов (Мүрү), 74 кг – Ваир Бурцев (Тумул), 79 кг – Айсен Копырин (Уһун Күөл), 86 кг – Дмитрий Петухов (Тумул), 92 кг – Артем Сивцев (Танда), 97 кг – Арсентий Николаев (Найахы), 125 кг – Евгений Алексеев (Тумул). Көбүөргэ улуус 12 нэһилиэгиттэн барыта 133 бөҕөс тахсыбыта.

Оттон хамаанданан түмүккэ Бороҕон нэһилиэгин (баһылык Василий Алексеев) түмсүүлээх, тэрээһиннээх хамаандата бастаабыта. Суотту (баһылык Василий Иванов) иккис, Мүрү (баһылык Василий Аммосов) үһүс миэстэлэри ылбыттара. Бу сырыыга дьэ, хайдах буолар?

Биллэрин курдук, Уус Алдан көҥүл тустууга хамаандата – биир дойдулаахтара, Саха сирин тустуутун аҕатынан билиниллибит Николай Николаевич Тарскай аатынан республика биирдиилэн уонна хамаанданан бастыыр иһин чемпионатын 17 төгүллээх кыайыылааҕа. Бу, ыытыллаары турар улуус түһүлгэтэ – урукку олохтоммут үтүө үгэһи салҕааһын, улуус ыччаттарын спордунан, чуолаан тустуунан дьарыктаныыларын көҕүлээһин, тустуу эйгэлээх биир дойдулаахтар түмсүүлэрэ буолар.

Уус алданнар бачыымнарын батыһан, урукку курдук, улуустар көҥүл тустууга чемпионаттара ыытыллаллара эбитэ буоллар. Саатар, тустууга үтүө үгэстээх Чурапчы, Мэҥэ Хаҥалас, Нам, Таатта, Амма, Хаҥалас, Сунтаар уонна ХИФУ чемпионаттара.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *