Бу күн – историяҕа: Роман Дмитриев — олимпийскай чемпион!

Бу күн, 46 сыл анараа өттүгэр – 1972 сыл атырдьах ыйын 31 күнүгэр Роман Дмитриев көҥүл тустууга олимпийскай чемпион буолбута.

Мюнхеннааҕы ХХ сайыҥҥы Олимпийскай оонньуулар Сэбиэскэй Сойуус спорду таптааччыларыгар хаһан да умнуллубат улахан үөрүүнү аҕалбыттара. Сэбиэскэй спортсменнар 50 кыһыл көмүс мэтээли ылары ситиспиттэрэ! Оонньуу үрдүкү наҕараадатынан – кыһыл көмүс олимпийскай мэтээлинэн биһиги биир дойдулаахпыт, саха тустууга оскуолатын иитиллээччитэ Роман Дмитриев эмиэ наҕараадаламмыта. Кини көбүөргэ дьулуурдаахтык киирсибитэ, туох баар өйүн-санаатын кыайыы туһугар уурбута. Бары хапсыһыыларыгар бэйэтин тустар маастарыстыбатын уонна булгуруйбат хорсун санаатын көрдөрөн, күүстээхтэртэн бастыҥынан ааҕыллан, Олимпийскай оонньуу чемпионунан буолбута.

Роман Дмитриев кыайыыга күөттээһининэн – Дагестантан Загалав Абдулбеков, Грузияттан Леван Тедиашвили, Красноярскайтан Иван Ярыгин, Белоруссияттан Александр Медведь пьедестал үрдүк үктэлигэр утуу-субуу ыттыбыттара. ССРС сүүмэрдэммит хамаандата уһулуччу кыайыыны ситиспитэ.

— 1972 сыл атырдьах ыйын 31 күнэ – мин олоҕум саамай умнуллубат, кэрэ-бэлиэ күнэ. Бу күн миэхэ кыһыл көмүс олимпийскай мэтээли туттарбыттара, — диэн Роман Михайлович бэйэтин ахтыытыгар суруйбута.

Бу дьоһуннаах кыайыы саха тустууктарыгар суолу аһан биэрбитэ.

Добавить комментарий

Ваш адрес email не будет опубликован. Обязательные поля помечены *