“Бу быыстапка, сыыйа Тустуу музейа буолуон наада”


Көҥүл тустууга ССРС спордун маастара, Саха АССР физическэй култуураҕа уонна спорка үтүөлээх үлэһитэ, АХШ Вашингтон штатын Аубрун куоратын бочуоттаах гражданина, “Гражданскай килбиэн” бэлиэ хаһаайына Михаил Егорович Друзьянов улахан таһымнаах коллекционер буоларын өссө сорохтор билбэт буолуохтааххыт. Кини “Коркинныы олоруохха! Коркинныы айыахха!” республикатааҕы быыстапка биир кэрэхсэбиллээх кыттааччытынан буолбута.

— Михаил Егорович, мин эйигин дэгиттэр сайдыылаах коллекционер быһыытынан билэбин, бу быыстапкаҕа эн туох коллекциянан кытынныҥ? Баһаалыста билиһиннэр эрэ.

— Мин көҥүл тустуу туһунан кинигэлэри мунньабын. Саха сиригэр тахсыбыт спорт туһунан кинигэлэр үксүлэрэ бааллар. Бу быыстапкаҕа, республикаҕа тахсыбыт көҥүл тустуу туһунан 90 кинигэни аҕалан көрдөрдүм.

Ону тэҥэ сэбиэскэй кэмнээҕи кубоктары хомуйабын. Ол кубоктарбын көрдөрүүгэ туруордум. Дьоннор, тустууга бачча элбэх кинигэ баар эбит диэн сөҕөллөр. Дьиҥэ, тахсыбыт кинигэ барыта миэхэ баар дии санаабаппын, атыттар курдук дьаныһан туран көрдөөбөппүн. Түбэстэхпинэ ылабын. Дьоннор быраҕар буоллахтарына, кэлэн көрөн, талан ылааччыбын. Билигин улуустар даҕаны элбэх үчүгэй кинигэни таһаарар буоллулар дии.

— Бу быыстапка туһунан туох санаа үөскээтэ?

— Маннык быыстапка сыл аайы Д.П. Коркин турнирыгар ыытыллара буоллар үчүгэй буолуо этэ. Бу миэстэ, арыыйда куорат кытыыта. Онон Дьокуускай киинигэр, холобур, “Триумф” Спорка бэлэмнэнии киинигэр эҥин турбута эбитэ буоллар, өссө элбэх киһи көрүө этэ. Ол гынан баран, “Строительнай” рынок салайааччылара, бэйэлэрэ эдэрдэригэр биллэр спортсменнар: Иван Данилов, Афанасий Заболоцкай, Александр Крылов таба өйдөөннөр, тоҕоостоох кэмигэр быыстапка тэрийбиттэригэр улахан махтал! Өссө да маннык быыстапканы тэрийэ турдуннар.

Бу быыстапка мин санаабар, сыыйа Тустуу музейа буолуон наада. Ол иһин миэстэтин эрдэттэн ханна эрэ көрдүөххэ наада. Куорат киинигэр. Чурапчыга баар музей сүрүннээн спортивнай оскуола туһунан, оттон биһиги убайдарбыт Баһылай Румянцев, Алексей Ермолаев, Петр Алексеев уо.д.а. биллиилээх тустууктар тустарынан матырыйаалы хантан да булбаккын. Онон бу боппуруоһу тустуу федерацията, спорт министиэристибэтэ толкуйдууллара буоллар…

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *