Бурятия тустууга чемпионатыгар

Бэҕэһээ, ахсынньы 15 күнүгэр Улан Удэҕэ – ССРС спордун маастара, Россия үтүөлээх тренерэ, бэтэрээн-маастардарга аан дойду чемпиона Виктор Васильевич Баймеев төрөөбүтэ 80 сааһыгар анаммыт Бурятия Республикатын көҥүл тустууга 56-с чемпионата ыытыллан түмүктэннэ.

Биллэрин курдук, Бурятия Республиката – Дальнай Восток федеральнай уокуругар киллэриллибитэ. Онон эһиилгиттэн ыла бэйэбит зонабытыгар буряттары кытта, Россия чемпионатыгар кыттар путевка иһин киирсэбит. Буряттар күүстээх утарсааччылар, ону билиниэххэ наада. Хайдах эрэ билигин ватсаапка тустуу биир бөлөҕөр иһиттэххэ, кинилэри бэргэһэнэн да тамнааттаан кыайыахпыт диэн саҥалар иһиллэллэр.

Ыалларбыт саамай сөптөөхтүк дьаһаммыттарын мин биһириибин. Билигин, аан дойду уонна Россия тустууга календарыгар улахан күрэхтэһиилэр, сбордар суох кэмнэригэр республикаларын чемпионатын тэрийэн ыыппыттара саамай тоҕоостоох диибин. Дьэ, мантан аттаран, аны сотору кэминэн буолар Д.Г. Миндиашвили аатынан Красноярскайдааҕы Тустуу академиятын аһаҕас турнирыгар бэлэмнэниилэрин саҕалыыллар. Санатан эттэххэ, онно кыайыылаахтар эрэ Иван Ярыгин Гран-при рейтиннээх турнирыгар кыттар быраабы ылаллар.

Ханныгын да иһин, буряттар тустууну сайыннарар систиэмэлэрэ оруннаах. Кинилэр сүрүн күрэхтэһиилэри көтүппэттэр, бастыҥнарыгар уһуннук сынньаппаттар, республикаларын иһигэр күрэхтэһиилэрин былаана сиэрдээх… Онно холоотоххо, биһиэхэ тустууну сайыннарыы систиэмэтэ ситэтэ суоҕа – киһини хомотор. Ол туһунан хас эмэ сылы быһа суруйдум, ким даҕаны кумаардаан да көрбөт. Чуолаан, Саха сиригэр көҥүл тустуу күрэхтэһиилэрэ сыыһа хайысхалаахтар диэн, Тарскай чемпионатын – хамаанданан, кубоктыҥы күрэхтэһии быһыытынан ыытыахха диэн, республика чемпионатын сэтинньи ыйга тэрийиэххэ диэн, онно бастыҥнарбыт барыларын кытыннарыахха диэн…

Чэ, итэҕэйбэт буоллаххытына, ол туһунан тугу, хайдах суруйбуппун dzulurgan.ru сайтка чугастааҕы кэмҥэ таһаарыам.

Көҥүл тустууга Бурятия Республикатын чемпионатын түмүгэ:

57 кг: 1. Денис Данжалов, 2. Барас Шойполов, 3. Тимур Баяров, Мягмар Далаев.

61 кг: 1. Солбон Тумэнбаяров, 2. Жаргал Дамдинов, 3. Алексей Мантатов, Булат Баясхолонов.

65 кг: 1. Александр Богомоев, 2. Баясхлан Очиров, 3. Эрдэм Шарастепанов, Булат Батоев.

70 кг: 1. Алексей Боровицкай, 2. Баяр Цыренов, 3. Очир Доржиев, Сансаран Жансаранов.

74 кг: 1. Евгений Жербаев, 2. Буян Цыренов, 3. Тумэн Эрхитуев, Алдар Гарматаров.

79 кг: 1. Арсалан Будажапов, 2. Александр Цоктоев, 3. Виталий Базаров, Аюр Галсанов.

86 кг: 1. Алексей Сабидаев, 2. Дэлгэр Дабаин, 3. Бадма Бальжинимаев.

92 кг: 1. Барас Базаров, 2. Алексей Анищик, 3. Андрей Елбаскин.

97 кг: 1. Александр Дамбаев, 2. Александр Хантаков, 3. Булат Дарижапов.

125 кг: 1. Батор Доржиев, 2. Евгений Колычев, 3. Дмитрий Жаргаланов, Эрдэм Цыренжапов.

Көрөргүт курдук, Бурятия чемпионатыгар күүстээхтэрэ, бастыҥнара бары кэриэтэ кытталлар. Оннооҕор нэдиэлэ анараа өттүгэр “Аланнар” норуоттар икки ардыларынааҕы турнирга кыттыбыт Дамдинов, Богомоев, Боровицкай, Будажапов, Сабидаев… республикаларын чемпионатыгар ытыктаан кыттыбыттар. Арай, соторутааҕыта АЛРОСА кубогар ситиһиилээхтик тустубут Даша Шарастепанов уонна аҕыйах хонуктааҕыта Россия Сэбилэниилээх Күүстэрин гректии-римнии тустууга призердаабыт Балдан Цыжипов эрэ суохтар. Манна даҕатан эттэххэ, ахсынньы 27 күнүгэр Циркаҕа ыытыллар хапсаҕайга А.Богомоев уонна А.Сабидаев кэлиэхтээхтэр…

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *