Бурятия бөҕөстөрүгэр квартира туттардылар. Оттон биһиэннэрэ?

Бэҕэһээ, Улан-Удэ куорат киин стадионугар Бурятия Республикатын баһылыга Алексей Цыденов, быйыл  Европа көҥүл тустууга чемпионатыгар ситиһиилээхтик кыттыбыт бөҕөстөргө – Александр Богомоевка уонна Балдан Цыжиповка үөрүүлээх быһыыга-майгыга квартира сертификаттарын туттарда. Санатан эттэххэ, олунньу ыйга Италия киин куоратыгар – Римҥэ ыытыллыбыт Европа чемпионатыгар Александр Богомоев 61 кг ыйааһыҥҥа тэҥнээҕин булбатаҕа, оттон Балдан Цыжипов ыарахан ыйааһыннаахтарга боруонса мэтээл хаһаайынынан буолбута. Өссө дьахталларга, эмиэ Россия сүүмэрдэммит хамаандатыттан кыттыбыт Стальвира Оршуш үһүс миэстэлэммитэ.

Билэ-көрө сылдьарбыт курдук, билигин Бурятияҕа тустуу иккис тыынын ылан эрэр. Республика салалтата, Тустуу федерацията, Спорт министиэристибэтэ уонна кыахтаах тэрилтэлэр биир ситимнээх үлэлэрин түмүгэр, билигин Бурятия эр дьоҥҥо уонна дьахталларга тустууга хамаандалара киһини үөрдэр эриэ-дэхси көрдөрүүлэри ситиһэллэр. Холобур, сыл саҥатыгар Иван Ярыгин аатынан үгэс быһыытынан ыытыллар Красноярскайдааҕы улахан таһымнаах турниртан кинилэр алта мэтээллээхтэр (Александр Богомоев, Балдан Цыжипов – кыһыл көмүс, Даша Шарастепанов, Евгений Жербаев – боруонса. Өссө дьахталларга икки чемпионнаахтар). Арсалан Будажаповтара Кыргызстан аатыттан кыттан, Азия чемпионун үрдүк аатын ылбыта. Нерюнгрига буолбут Дальнай Восток федеральнай уокуругун чемпионатыгар – алта кыһыл көмүс, үс үрүҥ көмүс уонна сэттэ боруонса мэтээллэри ылары ситиспиттэрэ. Онон кырдьык, ситиһиилэрэ харахха быраҕыллар.

Аны, өссө былырыыҥҥыттан, 2020 сыллааҕы Олимпиада иннинээҕи Россия көҥүл тустууга эр дьоҥҥо чемпионата муус устар ыйга Улан-Удэҕэ ыытыллара быһаарыллан, бу кэм устатат элбэх тэрээһин үлэлэр ыытыллыбыттара. Бурятия хамаандата толору састаабынан Россия киин спортивнай базаларыгар биир даҕаны үөрэтэр-эрчийэр түмсүүнү көтүппэтэ, барытыгар кытынна. Чемпионат коронавируһынан сибээстээн биллибэт кэмҥэ көһөрүллүбүтэ. Онон, күһүөрү син биир Улан-Удэҕэ ыытыллара буолуо.

Ситиһиилээхтик кыттар спортсменнарын сырыы ахсын кыахтаахтык чиэстииллэр. Манна сүрүн көмөнү биллэн турар, спорду өйүүр спонсордар оҥороллор.

Дьэ, ити курдук буряттары этэн туран, бэйэбит балаһыанньабытын өҥөйөн көрдөххө – хартыына бөрүкүтэ суох. Киһини астыннарбат диэххэ сөп. Өссө былырыын, Дьокуускайга ыытыллыбыт аан дойду Кубогар ситиһиилээхтик кыттыбыт Арыйаан Тютриҥҥа уонна Виктор Рассадиҥҥа квартира сертификаттара туттарыллыбыттара. Үөрүү-көтүү бөҕө буолбута. Онтукайбыт ханнаный? Бу күҥҥэ диэри быһаарылла илик. Манна бастатан туран, ити боппуруоһу тустууктарга уонна кинилэр тренердэригэр эрэ сэлээннээбэккэ, туһааннаах спорт тэрилтэлэрэ, спорт министиэристибэтэ, тустуу федерацията орооһуохтарын, быһаарсыахтарын, тиһэҕэр тиэрдиэхтэрин наада.

Аны, быйыл Европа чемпионатыгар олимпийскай – 65 кг ыйааһыҥҥа иккис миэстэҕэ тахсан үрүҥ көмүс мэтээлинэн наҕараадаламмыт бэйэбит уолбут Ньургун Скрябины атын дойдуттан кыттар эҥин диэн атарахсыппакка, чиэстиир-бочуоттуур, санаатын көтөҕөр хайаан да наадалаах дии саныыбын. Ол хайаан даҕаны квартира дуу, массыына дуу бэриллиэхтээх диэн буолбатах. Киһиэхэ кыра даҕаны наада – дьонун, норуотун өйөбүлэ, итэҕэлэ, болҕомтото. Бэйэбит спортсменнарбытыгар киһилии сыһыаннастахпытына, кинилэргэ күүс-көмө, өйөбүл буоллахпытына эрэ – ситиһиилэр кэлиэхтэрэ. Ханнык баҕарар кыайыы сыаналаныахтаах!

Петр ПАВЛОВ.         

 

Добавить комментарий

Ваш адрес email не будет опубликован. Обязательные поля помечены *