Буокса: Чөмпүйэнээт соһуччу түмүктээх саҕаланна

Бүгүн, кулун тутар 21 күнүгэр өрөспүүбүлүкэбит киин куоратын “Дохсун” успуорт уораҕайыгар Арсен Петров кэриэһигэр эр дьоҥҥо Саха сирин буоксаҕа чөмпүйэнээтэ саҕаланна. Чөмпүйэнээт түөрт күн салҕанан ыытыллыа. Быйылгы чөмпүйэнээккэ 15 хамаандаттан 52 боксуор күөн көрсөр.

Ол курдук, Уус Ньараттан, Ньурбаттан, Тааттаттан, Кэбээйиттэн, Мэҥэ Хаҥаластан, Намтан, Горнайтан, Абыйтан, Чурапчытааҕы физическэй култуура уонна успуорт үнстүтүүтүттэн, Спорка бэлэмнэнии кииниттэн (ЦСП), Олимпийскай эрэл училищетыттан, Хотугулуу Илиҥҥи федеральнай университеттан, Нерюнгриттан, Алдантан, Дьокуускайтан боксуордар бааллар. Кинилэр ортолоругар успуорт 8 маастара, 24 маастарга хандьытаат киирсэн, күрэхтэһиини киэргэтэр.

Саха сирин буоксаҕа сүүмэрдэммит хамаандатын кылаабынай тириэньэрэ, Арассыыйа үтүөлээх тириэньэрэ Артур Иннокентьевич Пахомов чөмпүйэнээт бастакы күнүн түмүгүнэн санаатын маннык үллэһиннэ:

Манна Саха сирин чулуу боксуордара мустан охсуһа сылдьаллар. Быйылгы чөмпүйэнээккэ Булуҥтан, Хаандыгаттан уонна Өймөкөөн улууһун Уус Ньаратыттан тиийэ кыттааччылар бааллар. Онон өрөспүүбүлүкэ буоксаҕа чөмпүйэнээтин географията кэҥээн иһэр диэххэ наада. Арассыыйа хамаанданан чөмпүйэнээтигэр (кубогар) саха боксуордара үчүгэйдик кытыннылар. Артур Ложников, Дьулус Яковлев үрүҥ көмүс мэтээллэри ыллылар уонна Борис Сидоров Аармыйа киин спортивнай кулуубуттан кыттан, боруонса мэтээлинэн наҕараадаланна. Оттон Михаил Варламов Финляндияҕа тиийэн 38 дойду кыттыылаах норуоттар икки ардыларынааҕы турнирга бэйэтин ыйааһыныгар үһүс бириистээх миэстэҕэ таҕыста. Чулуу боксуорбут Бааска Дьөгүөрэп билигин үөрэтэр-эрчийэр түмсүүгэ сылдьар. Кини муус устар саҥатыгар Германия Кельн куоратыгар аан дойду Кубогар кыттарга бэлэмнэнэр.

Бүгүҥҥү күн түмүгүн эттэххэ, 69 киилэҕэ өрөспүүбүлүкэ алта төгүллээх чөмпүйүөнэ, спорт маастара Егор Пахомов эмискэччи охсууну ылан, хааһын быһа оҕустаран кэбистэ. Инньэ гынан хотторон хаалла. Бу – бүгүҥҥү күн саамай соһуччу түмүгэ диэххэ сөп. Атын боксуордар син бэркэ киирсэ сылдьаллар.

Бу чөмпүйэнээт түмүгүнэн биһиги хамаанда тэриниэхтээхпит. Балаҕан ыйыгар Амурдааҕы Комсомольскайга Дальнай Восток федеральнай уокурук чөмпүйэнээтэ буолар. Онно ситиһиилээхтик кыттаммыт, Арассыыйа чөмпүйэнээтигэр төһө кыалларынан элбэх путевка ыла сатыахтаахпыт. Билэргит курдук, Дальнай Востокка икки регион эбилиннэ: Бурятия уонна Забайкальскай кыраай. Онон путевка ылар уустуктардаах буолуоҕа.    

 

Бырагыраама быһыытынан, бастакы күн “Дохсуҥҥа” туруоруллубут рингэҕэ уон киирсии буолла (кыайыылаахтар инники сурулуннулар):

49 кг Михаил Прокопьев (ЦСП-Томпо) – Михаил Слепцов (ЧГИФКиС-Усуйаана)

49 кг Ян Максимов (ЧГИФКиС-Сунтаар) – Эдуард Попов (Ньурба)

52 кг Николай Матвеев (ОЭУ-Ньурба) – Николай Сухов (ОЭУ-Уус Алдан)

56 кг Михаил Парников (ЧГИФКиС-Нам) – Иван Ле (Дьокуускай)

60 кг Михаил Скрыбыкин (ОЭУ- Мэҥэ Хаҥалас) – Айаал Никитин (ДьТХГА-Ньурба)

60 кг Алексей Максимов (ХИФУ-Тикси) – Вахид Гадимов (ХИФУ-Горнай)

64 кг Егор Васильев (Ньурба) – Артур Миронов (Таатта)

69 кг Айаан Ксенофонтов (ОЭУ-Бүлүү) – Егор Пахомов (Горнай)

75 кг Роман Обутов (Таатта) – Николай Охлопков (Горнай)

75 кг Иннокентий Григорьев (ХИФУ) – Игорь Добров (Уус Ньара).

Чөмпүйэнээт салҕанар. Сарсын киирсиилэр күнүс 14:00 чаастан саҕаланаллар. Кыайыылаахтары быһаарар бүтэһик киирсиилэр бырагыраама быһыытынан баскыһыанньаҕа, күнүс 12:00 чаастан буолуохтара.

Петр ПАВЛОВ.

Ааптар хаартыскаҕа түһэриилэрэ.

 

 

Добавить комментарий

Ваш адрес email не будет опубликован. Обязательные поля помечены *