Бразилияҕа барбыта ордук этэ

Атырдьах 3-5 күннэригэр Одинцово куоракка ыытыллыбыт Россия көҥүл тустууга чемпионатыгар 24 саастаах спорт маастара Арыйан Тютрин 57 киилэҕэ боруонса мэтээли ылары ситиспитэ.

Санатан эттэххэ, кини бастаан бэйэтин киһитэ Алексей Копыловы 10:2, онтон бу ыйааһын биир күүстээх бөҕөһө Азамат Тускаевы (Хотугу Осетия) 3:1 ахсаанынан кыайбыта. Салгыы, финалга тахсар иһин киирсиигэ тувинец Хуреш Оол Дондукка 1:5 сабырыйтаран кэбиспитэ. Оттон чемпионат боруонса мэтээлин ким ыларын быһаарсыыга дагестанец Рамиз Гамзатовы очукуонан ыраастык (10:0) хоппута. Итинэн Арыйан Тютрин Россия чемпионатын үс төгүллээх (2014, 2016, 2018) боруонса призерунан буолла.

Маны тэҥэ Тютрин ыам ыйыгар Раменскайга (Москва уоб.) Россия устудьуоннарга чемпионатыгар бастаабыта. Итинэн, балаҕан ыйын 4-9 күннэригэр Бразилияҕа буолар устудьуоннарга аан дойду чемпионатыгар кыттар быраабы ылбыта.

Ол эрээри, Россия чемпионатын түмүгүнэн “Триумфка” тэриллибит пресс-конференцияҕа Арыйан Тютрин тус тренерэ Иван Дмитриев иһитиннэрбитинэн, тренерскэй састаап быһаарыытынан, Тютрин устудьуоннарга аан дойду чемпионатын оннугар оруобуна ити кэмҥэ Дьокуускайга тэриллэр улуу тренер Дмитрий Петрович Коркин кэриэһигэр норуоттар икки ардыларынааҕы XI турнирга кыттарга бэлэмнэнэрин эппитэ.

Бу быһаарыыга мин тус бэйэм сөпсөспөппүн, сыыһа дии саныыбын. Арыйан аан дойду чемпионатыгар кыттара ордук этэ. Омук тустууктарын кытта тустан уопут ылыа этэ. Итиэннэ норуоттар икки ардыларынааҕы турниртан – аан дойду чемпионатын аата-суол улахана да сыттаҕа дии. Арыйан Бразилияҕа барара эбитэ буоллар, быдан ситиһиилээхтик тустуо этэ.

Тоҕо диэтэргит, бары билэбит, турнирга икки киилэ ордуктаах буоларын көҥүллэнэр эбит буоллаҕына, чемпионакка ыйааһыҥҥын оруобуна оҥоруохтааххын. Оттон Арыйан ыйааһына 57-ҕэ оруобуна сөп түбэһэр. Ханныгын да иһин, 59 киилэҕэ тустуу – 57 кг ыйааһыҥҥа тустуутааҕар быдан атын. Ону исписэлиистэр билэллэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *