Бороҕоҥҥо, Мындаабаҕа саҥа спортивнай тутуулар олуктара охсулунна

Бэҕэһээ, атырдьах ыйын 28  күнүгэр Уус Алдан улууһун килбэйэр киинигэр,  историяҕа киирэр кэрэ-бэлиэ күн буолла.

Саха сиригэр физкултуураҕа күргүөмнээх хамсааһыны төрүттээбит, Саха АССР Министрдэрин Сэбиэтин физическэй култуураҕа уонна спорка кэмитиэтин бэрэссэдээтэлинэн үлэлээбит, өрөспүүбүлүкэҕэ көҥүл тустуу сайдарыгар сүҥкэн өҥөнү оҥорбут, саҥа көрүҥнэри көҕүлээбит, Саха сиригэр бастакы спортивнай бэстибээллэри, спартакиадалары көҕүлээбит уонна ситимнээхтик ыытыллалларын ситиспит, физкултуурунай-спортивнай хамсааһыны саҥа тыыннаабыт улахан таһымнаах салайааччы, төлөннөөх тэрийээччи, биллэр государственнай уонна общественнай деятель Николай Николаевич Тарскай аатын сүгэр, саҥа элбэх хайысхалаах чэбдигирдэр спортивнай комплекс  бастакы сваята түһэр үөрүүлээх түһүлгэтэ ыытылынна.

2022 сылга ыытыллар Саха сирин норуоттарын VIII спортивнай оонньууларын бэлиэ түгэннэрэ Уус Алдан улууһа өрөспүүбүлүкэ араас муннуктарыттан үгүс дьону түмүөҕэ.

“Якутагропромпроект” Аһаҕас Акционернай компания бырайыактаабыт 7.976 квадратнай миэтэрэ иэннээх, элбэх хайысхалаах чэбдигирдэр спортивнай комплекс 2022 сылга, бу оонньуулары көрсө аанын тэлэччи аһыаҕа.

Бастакы “кыһыл көмүс сваяны” спортивнай комплексы тутар “РусСтрой-89” хааччахтаммыт эппиэтинэстээх тэрилтэ тутааччылара түһэрдилэр.

Бу күн бастакы олуктара түспүт улахан сүдү тутуулар: Мындааба бөһүөлэгэр тустуу саалата, Майаҕатта Бэрт Хара аатын сүгэр эт-хаан чэбдигирдэр, өй-санаа тобуллар, чөл-чэбдик олоҕу көҕүлүүр стадион, Н.Н. Тарскай аатынан саҥа, сырдык, киэҥ-куоҥ спортивнай комплекс улуус дьонун-сэргэтин, кэлэр кэнчээри ыччаттарын элбэх ситиһиилэргэ, кыайыыга-хотууга кынаттыахтара. Кэлэр кэскилбит, кэнчээри ыччаппыт үүнэр-сайдар, чэгиэн-чэбдик буоларыгар аныгылыы ирдэбилгэ эппиэттиир объектары тутууну саҕалаабыт бас-көс дьонноругар махталларын, инникитин бу тутуулар үлэлэрин тэтимэ күргүөмнээхтик баралларыгар эрэллэрин биллэрдилэр.

Бэлиэ күҥҥэ кыттыыны ылан мустубут дьону эҕэрдэлээтилэр: СР Бырабыыталыстыбатын бэрэссэдээтэлин солбуйааччытын эбээһинэһин толорооччу Сергей Васильевич Местников, СР тутууга миниистирин солбуйааччыта Евгений Егорович Афанасьев, СР Ил Түмэнин бэрэссэдээтэлин I-кы солбуйааччы Александр Николаевич Жирков, “Уус Алдан улууһа (оройуона)” муниципальнай оройуон аҕа баһылыга Алексей Васильевич Федотов, СР физическэй култуураҕа уонна спорка миниистирин бастакы солбуйааччы Семен Сергеевич Чердонов, СР экономикаҕа министирин 1-кы солбуйааччыта Данил Семенович Саввинов, Сурдлимпийскай оонньуу чемпиона, көҥүл тустууга Россия спордун үтүөлээх маастара Василий Стрекаловскай, уонна да атыттар.

“Саха сирин норуоттарын VIII Спортивнай оонньууларын көрсө ыытыллар  бу баараҕай хамсааһыҥҥа улууспут хас биирдии олохтооҕо, биир дойдулаахтарбыт бары мустан, түмсүүлээхпитин көрдөрөн, дьулуурбутун түмэн, бары бииргэ турунуоххайыҥ, сомоҕолоһуоххайыҥ, айаммытын саҕалыаххайыҥ, аартыкпытын арыйыаххайыҥ!”, — диэн бу тэрээһин кыттыылаахтара биир санаалаахтарын биллэрдилэр.

“Дьулурҕан”.

Айаал Молокотин хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *